ຢືນຢັນແລ້ວແຮ່ຄ້າຍຄືຄໍາຕິດມານໍາຫີນປູທາງ 16A ແຂວງອັດຕະປື ແມ່ນສານມີຄວາມອັນຕະລາຍ
ພະແນກພະລັງງານ ແລະ ບໍ່ແຮ່ແຂວງອັດຕະປືລາຍງານວ່າ: ໃນວັນທີ 15 ມິຖຸນາຜ່ານມານີ້, ໄດ້ມີປະຊາຊົນຈໍານວນໜຶ່ງພາກັນເກັບກ້ອນຫີນທີ່ມີແຮ່ສີເຫລືອງຄ້າຍຄືຄໍາຈໍານວນຫລາຍຕິດນໍາກ້ອນຫີນຕາມແຄມທາງ 16A ເຂດບ້ານທ່າຫີນໄຊ ຫາບ້ານໝືນຫົວເມືອງ (ຫລັກ 52) ເມືອງສາມັກຄີໄຊ ຫາ ເມືອງພູວົງ ແຂວງອັດຕະປືນັ້ນ, ຜ່ານການກວດກາຕົວຈິງເຫັນວ່າ: ຫີນທີ່ເອົາມາປູທາງດັ່ງກ່າວແມ່ນເອົາມາຈາກແຂວງເຊກອງເປັນຫີນນອນໃນຈໍາພວກ ຣິໂອຣິດ, ສ່ວນແຮ່ສີເຫລືອງເຫລື້ອມຄ້າຍຄືຄໍານັ້ນແມ່ນແຮ່ໂລຫະກໍາມະຖັນ (Metal sulpide), ແຮ່ປີຣິດ (Pyrite Res2), ຫລືແຮ່ການໂກພາຍໄຣ (chalcopyrite Cufes2) ແຮ່ຈໍາພວກນີໃນດ້ານອຸດສາຫະກໍາແມ່ນຈະເອົາໄປຜະລິດເປັນນໍ້າກົດ (H2 SO4), ຖາມີຈໍານວນຫລາຍປະໄວ້ແບບຊະຊາຍຈະເປັນພິດຕໍ່ສະພາບແວດລ້ອມ, ຖ້າໄຫລລົງສູ່ແມ່ນໍ້າກໍຈະເປັນກົດເຮັດໃຫ້ປາຕາຍ, ຕົ້ນໄມ້ໃນຫຍ້າຕາຍ, ກໍລະນີສິ່ງທີ່ມີຊີວິດດື່ມກິນ ຫລືນໍາມາໃຊ້ສອຍກໍຈະມີບັນຫາຕໍ່ສຸຂະພາບ, ດັ່ງນັ້ນຈຶ່ງບໍ່ຄວນເກັບມາຮັກສາໄວ້, ເນື່ອງຈາກແຮ່ດັ່ງກ່າວມີສ່ວນປະສົມຫລາຍທາດປົນຢູ່ນໍາເປັນຕົ້ນແຮ່ຊືນ (Pb), ສານບາຫລອດ (Hg), ແຮ່ອາຊີນິກ (As), ສ່ວນໃຫຍ່ແມ່ນເອົາໄປຜະລິດຢາເບື່ອໜູ ເຊິ່ງເຫັນວ່າມີຜົນກະທົບຮ້າຍແຮງຕໍ່ສຸຂະພາບ.
ຕໍ່ບັນຫາດັ່ງກ່າວຈຶ່ງໄດ້ມອບໃຫ້ອໍານາດການປົກຄອງບ້ານຕ່າງໆ ແຈ້ງໃຫ້ປະຊາຊົນພາຍໃນບ້ານຮັບຊາບ ແລະ ຫ້າມໄປເກັບຫີນດັ່ງກ່າວເອົາມາເກັບໄວ້ໂດຍເດັດຂາດ.
