ການກໍ່ສ້າງຫໍຫລັກເມືອງແຂວງໄຊຍະບູລີຄືບໜ້າແລ້ວ 60%
ຫໍຫຼັກເມືອງແຂວງໄຊຍະບູລີ ແມ່ນ ສັນຍາລັກແຫ່ງ ຄວາມສາມັກຄີ, ຄວາມເປັນ ສີລິມຸງຄຸນ, ຄວາມຜາສຸກ, ຄວາມອຸດົມສົມບູນຢູ່ເຢັນ ເປັນສຸກ ແລະ ຄວາມສີວິໄລ ທາງດ້ານຈິດໃຈ ແລະ ຍັງ ເປັນການຢັ້ງຢືນເຖິງຄວາມ ອົງອາດກ້າຫານ ໃນການ ຕໍ່ສູ້ປົກ ປັກຮັກສາບ້ານ ເມືອງ ພາຍໃຕ້ການນຳພາຂອງພັກ ແລະ ລັດຖະບານລາວ.
ທ່ານ ສຸລິເດດ ວັນຄຳ ຮອງອຳນວຍການບໍລິສັດ ເດດທະວີຊັບສຳຫຼວດອອກແບບແລະທີ່ປຶກສາໄດ້ໃຫ້ ຮູ້ວ່າ: ການກໍ່ສ້າງຫໍຫຼັກເມືອງ ແຂວງໄຊຍະບູລີໄດ້ມີພິທີວາງສີລາລຶກ ແລະກໍ່ສ້າງມາແຕ່ວັນທີ 20 ມີນາ 2018 ແລະ ມາຮອດປັດຈຸບັນມີ ຄວາມຄືບໜ້າແລ້ວ 60% ຄາດວ່າຈະໃຫ້ສຳເລັດທ້າຍປີ 2019 ຫໍຫຼັກເມືອງດັ່ງ ກ່າວມີ ຮູບຊົງຫໍປະສາດມີ ໜ້າມຸກ 4 ດ້ານ, 4 ໜ້າປະດັບດ້ວຍດອກດວງລວດ ລາຍອັນວິຈິດບັນຈົງ, ເຊິ່ງ ສະແດງໃຫ້ເຫັນເຖິງການ ດຳລົງຊີວິດຮີດຄອງປະເພນີ ອັນດີງາມ ທີ່ນຳເອົາສະຖາປັດຕະຍະກຳທີ່ເປັນເອກະ ລັກທາງດ້ານວັດທະນະທຳ ມາລວມຢູ່ຫໍຫຼັກເມືອງແຫ່ງນີ້, ເຊິ່ງມີຄວາມສູງ 19 ແມັດ, ສ່ວນຖ້ານເທິງມີ 4 ດ້ານ, ມີຄວາມກ້ວາງດ້ານລະ 9 ແມັດ, ມີເສົາຫຼັກເມືອງທີ່ເຮັດ ດ້ວຍໄມ້ຈັນຫອມ 1 ເສົາ ປະດິດສະຖານຢູ່ພາຍໃນ ມີຄວາມສູງ 9 ແມັດເສັ້ນຜ່າສູນກາງ 60 ຊັງຕີແມັດ ສ່ວນອີກ 8 ເສົາ ແມ່ນມີຄວາມສູງຕົ້ນລະ 8 ແມັດ ອ້ອມຮອບສະຖານທີ່ຫໍຫຼັກ ເມືອງຈະມີປະຕູໂຂງເຂົ້າທັງ 4 ດ້ານໃນເນື້ອທີ່ 1,5 ເຮັກຕາລວມມູນຄ່າກໍ່ສ້າງ ທັງໝົດ 8,3 ຕື້ກວ່າ ກີບ ໂດຍນຳໃຊ້ທຶນພັດທະນາ ທ້ອງຖິ່ນ ແລະ ທຶນສົມທົບ ຂອງປະຊາຊົນພາຍໃນ ແຂວງ, ຕ່າງແຂວງ ແລະ ຕ່າງປະເທດເຂົ້າໃນການ ກໍ່ສ້າງດັ່ງກ່າວ./.
