ຊາວນາຜະລິດເຄື່ອງເຕືອນໄພນ້ຳຖ້ວມ
ພໍ່ລຸງ ຫງວຽນດຶກແທ່ງ, ອາຍຸ 60 ປີ ຢູ່ແຂວງບັກຢາງ ສສ. ຫວຽດນາມ ໄດ້ຜະລິດ ເຄື່ອງເຕືອນໄພນໍ້າຖ້ວມຂຶ້ນມາໂດຍມີສັນຍານເຕືອນ ດ້ວຍແສງໄຟ ແລະ ໂຫວດ.
ເຄື່ອງເຕືອນໄພທີ່ເພີ່ນ ປະດິດຂຶ້ນມານັ້ນ, ມີໂຄງປະກອບສ້າງທີ່ງ່າຍດາຍແຕ່ໄດ້ ຮັບຜົນສູງ. ເຄື່ອງເຕືອນໄພ ດັ່ງກ່າວລວມມີ: ມີ 3 ເສົາ, ແຕ່ ລະເສົາຈະຕິດຕັ້ງແຜ່ນໂຊລາເຊວ(ໄຟຟ້າແສງຕາເວັນ), ອຸປະກອນເຕືອນໄພ ແລະ ເຄື່ອງຮັບຂໍ້ມູນຂ່າວສານ. ເຄື່ອງເຕືອນໄພດັ່ງກ່າວຈະເຕືອນເປັນໄລຍະຕາມ ລະດັບນໍ້າຂຶ້ນ-ລົງ ຢູ່ຈຸດຕີນ ເສົາ. ຜູ້ທີ່ມີຄວາມສົນໃຈຫຼື ຜູ້ ຄວບຄຸມ, ຕິດຕາມເຫດການ ນໍ້າຖ້ວມສາມາດຕິດຕາມໃນ ຄອມພິວເຕີ ຫຼື ໃນສະມາດ ໂຟນຂອງຕົນເອງໄດ້.
ເສົາອາດຈະເຮັດດ້ວຍໂລຫະ ຫຼື ບໍ່ແມ່ນໂລຫະກໍໄດ້, ຢູ່ເທິງປາຍເສົາຈະຕິດຕັ້ງກັບອັນໜຶ່ງໄວ້, ໃນກັບນັ້ນ ຈະມີ ອຸປະກອນຕ່າງໆເຊັ່ນ: ໝໍ້ໄຟ, ເຄື່ອງສາກໄຟ, ໂຫວດ, ທໍ່ໄຟສັນຍານເຕືອນ, ສາຍນຳສົ່ງ ແລະ ເຄື່ອງບັນທຶກ ຂໍ້ມູນຂ່າວສານ. ອ້ອມຮອບຕີນເສົາເທດ້ວຍຊີເມັນ. ຂີດໝາຍລະດັບນໍ້າ ແມ່ນໃຫ້ເອົາລະດັບພຽງໜ້າດິນເປັນຈຸດເລີ່ມຕົ້ນ.
ເສົາທີ1: ຈະເປັນເສົາ ເຕືອນໄພລະດັບນໍ້າຂຶ້ນສູງຂັ້ນອັນຕະລາຍ ທີ່ມາຈາກທໍ່ນໍ້າ, ແລວນໍ້າສຸທັ່ງ, ການແຕກພັງຂອງຄູກັ້ນນໍ້າ, ສຶນາມິ… ເສົາ ປະເພດນີ້ໄດ້ຕິດຕັ້ງເຄື່ອງ ສັນຍານເຕືອນດ້ວຍແສງໄຟ, ໝາຍຄວາມວ່າ ເມື່ອລະດັບນໍ້າເພີ່ມຂຶ້ນມັນຈະມີແສງໄຟ ເຕືອນພ້ອມທັງມີສຽງໂຫວດ ດັງຂຶ້ນພ້ອມໆກັນ ເພື່ອເຕືອນໃຫ້ທຸກຄົນຮູ້ວ່າ, ຢູ່ໃນບໍລິເວນອ້ອມຮອບ ແລະ ຢູ່ຈຸດ ຕີນເສົາ ມີລະດັບນໍ້າຂຶ້ນສູງ.
ເສົາທີ 2: ເປັນເສົາເຕືອນ ໄພ ໃຫ້ຮູ້ລະດັບຄວາມເລິກ ຂອງນໍ້າຖ້ວມ. ເມື່ອມີນໍ້າຖ້ວມ ເສົາພຽງໃດມັນຈະໃຫ້ຮູ້ ຄວາມເລິກຂອງນໍ້າພຽງນັ້ນ ໂດຍຕົວເລກສະແດງອອກ ຢູ່ໃນກະດານທີ່ຕິດຕັ້ງໄວ້ກັບເສົາ. ທັງນີ້ກໍເພື່ອຊ່ວຍໃຫ້ຜູ້ ຄົນສັນຈອນຕາມຖະໜົນຮູ້ໄດ້ຄວາມເລິກຂອງ ນໍ້າຕາມ ເສັ້ນທາງ.
ເສົາທີ 3: ເປັນເສົາປະສົມ ປະສານຈາກສອງເສົາຂ້າງເທິງ, ມັນລວມມີທັງແສງໄຟເຕືອນແບບໄຟຈະລາ ຈອນ: ມີສີຂຽວ, ແດງ, ເຫຼືອງ, ມີໂຫວດ, ມີໂທລະໂຄ່ງເພື່ອຊ່ວຍໃຫ້ທຸກຄົນສາມາດຮັບຮູ້ທີ່ຖືກຕ້ອງຈະແຈ້ງຂອງລະດັບນໍ້າຖ້ວມ.
ຮຽບຮຽງໂດຍ:ລູກເມືອງພວນ
