ຍາກທີ່ຈະຫ້າມການໄປອອກແຮງງານຢູ່ປະເທດໃກ້ຄຽງ
ປະທານຄະນະບໍລິຫານງານ ສະຫະພັນກໍາມະບານ ເມືອງ ທ່ານປາງທອງ ແຂວງສະຫວັນນະເຂດ ໃຫ້ຮູ້ວ່າ: ມັນເປັນບັນຫາຍາກຫຼາຍທີ່ຈະຫ້າມບໍ່ໃຫ້ຊາວໜຸ່ມລາວ, ໂດຍສະເພາະຊາວເມືອງ ທ່າປາງທອງ ນີ້ເອງ, ບໍ່ໃຫ້ເດີນທາງໄປອອກແຮງງານຢູ່ປະເທດໃກ້ຄຽງເຮົາ (ເປັນຕົ້ນແມ່ນປະເທດໄທ) ເນື່ອງຈາກວ່າສິ່ງດັ່ງກ່າວມັນເຄີຍມີມາດົນນານແລ້ວ, ບາງຄົນກໍຖືກຕ້ອງຕາມລະບຽບກົດໝາຍ ແລະ ບາງຄົນກໍບໍ່ຖືກຕ້ອງ, ລັກລອບເຂົ້າໄປນໍາໝູ່ເພື່ອນ, ຜູ້ລຶ້ງເຄີຍ ແລະ ການຊັກຊວນຂອງພວກນາຍໜ້າ ແລະ ອັນສໍາຄັນອີກອັນໜຶ່ງ ແມ່ນສອງປະເທດມີຊາຍແດນຕິດຈອດກັນ, ເຄີຍໄປມາຫາສູ່ກັນ, ມີພາສາປາກເວົ້າ ແລະ ຂະນົບທໍານຽມທີ່ຄ້າຍຄືກັນ, ເປັນປະເທດທີ່ພັດທະນາກວ່າ, ມີເງື່ອນໄຂສ້າງລາຍຮັບໄດ້ດີກວ່າ ແລະ ອື່ນໆ.
ດັ່ງທ່ານປະທານສະຫະພັນກໍາມະບານເມືອງດັ່ງກ່າວໃຫ້ຮູ້ວ່າ: ການໄປອອກແຮງງານຢູ່ຕ່າງປະເທດກໍມີດ້ານດີ ແລະ ບໍ່ດີຂອງມັນຄື: ຈຸດດີ: ແມ່ນໄດ້ໄປເຫັນບ່ອນຈະເລີນທັນສະໄໝກວ່າ, ມີຄ່າແຮງງານສູງກວ່າ, ໄດ້ປະສົບການອັນໃໝ່ ແລະ ສີມືແຮງງານກໍອາດໄດ້ຮັບການພັດທະນາດີຂຶ້ນ, ສ່ວນອັນບໍ່ດີກໍແມ່ນ ຄວາມຫຍຸ້ງຍາກໃນການໄປດໍາລົງຊີວິດຢູ່ປະເທດອື່ນທີ່ຫ່າງໄກຈາກຄອບຄົວ, ມີຄ່າໃຊ້ຈ່າຍສູງ, ມີຄວາມສ່ຽງໃນການຖືກສໍ້ໂກງຄ່າແຮງງານ ຫຼືຖືກເຈົ້າໜ້າທີ່ປັບໃໝການເຂົ້າເມືອງຜິດກົດໝາຍ ຫຼືອາດຕົກເປັນເຫຍື່ອຂອງຂະບວນການຄ້າມະນຸດໄດ້ງ່າຍ ແລະ ອື່ນໆ.
ດັ່ງນັ້ນເພື່ອແກ້ໄຂສະພາບດັ່ງກ່າວ, ສິ່ງສໍາຄັນແມ່ນອໍານາດການປົກຄອງທ້ອງຖິ່ນ, ອົງການຈັດຕັ້ງມະຫາຊົນຕ້ອງເປັນເຈົ້າການຊ່ວຍເຫຼືອເຂົາເຈົ້າໃນການໄປອອກແຮງງານຢູ່ຕ່າງປະເທດ ຕ້ອງຖືກຕ້ອງຕາມລະບຽບກົດໝາຍ.
