ງາມສົດໃສ ຫ່າງໄກມະເຮັງ ດ້ວຍຫົວກະຫລົດ

   ຫົວກະຫລົດມີຖິ່ນກຳເນີດຈາກປະເທດອັຟການິສຖານ, ມີຫລາຍສາຍພັນດ້ວຍກັນ, ມີສີສົ້ມ, ສີມ້ວງ, ສີເຫລືອງ ແລະ ມີສັບພະຄຸນຊ່ວຍໃຫ້ທ່ານຫ່າງໄກຈາກພະຍາດມະເຮັງ ແລະ ຄວາມເຈັບໄຂ້ໄດ້ປ່ວຍຕ່າງໆໄດ້ ກໍຍ້ອນວ່າມີສານອາຫານຫລວງຫລາຍ ດັ່ງນີ້ :     

     ຄາໂບໄຮເດຣດ, ນຳ້ຕານ, ໄຍອາຫານ, ໂປຣຕິນ, ວິຕາມິນອາ, ເບຕ້າແຄໂຣທີນ, ວິຕາມິນເບ 1, ເບ 2, ເບ 3, ເບ 6, ວິຕາມິນເຊ, ທາດການຊຽມ, ທາດເຫລັກ, ແມັກນີຊຽມ, ຟົສຟໍ, ໂປຕັສຊຽມ ແລະ ໂຊດຽມ ສານອາຫານຫລວງຫລາຍທີ່ມີຢູ່ໃນຫົວກະຫລົດ ຈຶ່ງບໍ່ແປກໃຈເລີຍທີ່ມັນຈະສາມາດຊ່ວຍເຮັດໃຫ້ສຸຂະພາບຂອງຜູ້ທີ່ກິນມັນເຂົ້າໄປດີຂຶ້ນ ແລະ ຫ່າງໄກຈາກພະຍາດ ຮ້າຍຕ່າງໆໄດ້ ເຊິ່ງສານອາຫານຕ່າງໆທີ່ໄດ້ຈາກຫົວກະຫລົດນັ້ນມັນສາມາດຊ່ວຍປົກປ້ອງສຸຂະພາບຂອງທ່ານ ດັ່ງນີ້ :

     – ຊ່ວຍໃນການບຳລຸງສາຍຕາ ແລະ ເຮັດໃຫ້ເບິ່ງເຫັນໄດ້ດີໃນເວລາກາງຄືນ.

     – ຊ່ວຍປ້ອງກັນອາການຕາຟາງໄດ້.

 – ຊ່ວຍປ້ອງກັນພະຍາດມະເຮັງປອດ ແລະ ມະເຮັງຊະນິດອື່ນໆ.

     – ຊ່ວຍໃນການໄລ່ນຳ້ຍ່ຽວ.

     – ຊ່ວຍໄລ່ສານພິດອອກຈາກຕັບ.

     – ຊ່ວຍຫລຸດລະດັບຄໍເລສເຕີໂຣນ.

     – ຊ່ວຍຫລຸດຄວາມສ່ຽງໃນການເກີດພະຍາດຫົວໃຈ ແລະ ຫົວໃຈລົ້ມເຫລວ.

     – ຊ່ວຍເສີມສ້າງລະບົບພູມຕ້ານທານພະຍາດໃຫ້ແກ່ຮ່າງກາຍ.

     – ຊ່ວຍບຳລຸງແຊນຜິວໜັງ ແລະ ແຊນຕ່າງໆໃນຮ່າງກາຍ.

ຫົວກະຫລົດ ໄດ້ຊື່ວ່າເປັນຜັກທີ່ມີເບຕ້າແຄໂຣທີນຫລາຍ ເຊິ່ງມັນຊ່ວຍໃນການຕໍ່ຕ້ານອະນຸມູນອິດສະຫລະໃນຮ່າງກາຍໄດ້ຢ່າງດີເລີດ, ປົກປ້ອງຜິວຂອງທ່ານຈາກລັງສີຢູວີ, ເຮັດໃຫ້ຜິວຂອງທ່ານສຸຂະພາບດີ ແລະ ງາມສົດໃສ ທັງຍັງຊ່ວຍຂັດຂວາງການເກີດແຊນມະເຮັງຕ່າງໆໄດ້ເປັນຢ່າງດີ, ແຕ່ການຈະໄດ້ຮັບສານເບຕ້າແຄໂຣທີນຈາກຫົວກະຫລົດຫລາຍທີ່ສຸດ ຄວນເອົາຫົວກະຫລົດໄປຜ່ານຂະບວນການຕົ້ມ ຫລື ເຮັດໃຫ້ຮ້ອນສາກ່ອນ ເພື່ອໃຫ້ຄວາມຮ້ອນທຳລາຍຜິວໜັງແຊນຂອງຫົວກະຫລົດ ເຮັດໃຫ້ເບຕ້າແຄໂຣທີນສາມາດອອກມາຈາກແຊນຂອງຫົວກະຫລົດໄດ້ດີຍິ່ງຂຶ້ນ ແລະ ຮ່າງກາຍສາມາດດູດຊຶມ ແລະ ເອົາເບຕ້າແຄໂຣທີນໄປໃຊ້ໃນການຕໍ່ຕ້ານອະນຸມູນອິດສະຫລະໄດ້ດີຂຶ້ນ.

     ການກິນນຳ້ປັ່ນຫົວກະຫລົດ ຫລື ຫົວກະຫລົດໃນປະລິມານທີ່ຫລາຍເກີນໄປອາດເຮັດໃຫ້ໂຕເຫລືອງໄດ້ ເຊິ່ງບໍ່ເປັນອັນຕະລາຍຕໍ່ຮ່າງກາຍ ຫາກກິນຫົວກະຫລົດໜ້ອຍລົງ ອາການໂຕເຫລືອງກໍຈະຫາຍໄປເອງ.