ລັດຖະມົນຕີ ຖວທ ເຊີນຊວນນັກທ່ອງທ່ຽວຈີນມາທ່ຽວລາວໃຫ້ຫລາຍຂຶ້ນ

ງານສະແດງຜະລິດຕະພັນທ່ອງທ່ຽວ ແລະ ວັດທະນະທໍາອາຊີ ໄດ້ໄຂຂຶ້ນໃນຕອນເຊົ້າວັນທີ 16 ພຶດສະພານີ້ທີ່ນະຄອນຫລວງປັກກິ່ງ ສປ ຈີນ ໂດຍມີຕົວແທນຈາກ 47 ປະເທດໃນຂົງເຂດອາຊີເຂົ້າຮ່ວມຢ່າງພ້ອມພຽງ.

ໃນໂອກາດເປີດງານດັ່ງກ່າວນີ້, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ມີຄໍາເຫັນວ່າ: ໃນປີ 2018 ຜ່ານມາ, ລັດຖະບານລາວ ໄດ້ເປີດປີທ່ອງທ່ຽວລາວ ເຫັນວ່າໄດ້ຮັບຜົນສໍາເລັດບໍ່ໜ້ອຍ ເຊິ່ງມີນັກທ່ອງທ່ຽວເຂົ້າມາຢ້ຽມຢາມລາວ ເຖິງ 4 ລ້ານກວ່າຄົນ ໃນນັ້ນ, ນັກທ່ອງທ່ຽວຈີນມີເກືອບ 8 ແສນຄົນ, ເພີ່ມຂຶ້ນ 8% ທຽບໃສ່ປີ 2017 ແລະ ຄາດວ່າປີ 2019 ນີ້ຈໍານວນນັກທ່ອງທ່ຽວຈີນ ຈະເພີ່ມຂຶ້ນຫລາຍກວ່າປີ 2018 ຜ່ານມາ.

ເພື່ອເປັນການສົ່ງເສີມການຮ່ວມມືດ້ານການທ່ອງທ່ຽວ ລະຫວ່າງ ສປປ ລາວ ແລະ ສປ ຈີນໃຫ້ດີຂຶ້ນກວ່າເກົ່າ ລັດຖະບານ ສອງປະເທດ ໄດ້ສືບຕໍ່ເປີດປີທ່ອງທ່ຽວ ລາວ-ຈີນ 2019 ທັງຈັດຕັ້ງປະຕິບັດຫລາຍກິດຈະກໍາຮ່ວມກັນທີ່ໜ້າສົນໃຈທີ່ສອງຝ່າຍເຫັນດີເປັນເອກະພາບຮ່ວມກັນຄື: ຈັດສໍາມະນາສົ່ງເສີມການທ່ອງທ່ຽວລາວ-ຈີນ, ວາງ ສະແດງກ່ຽວກັບວັດທະນະທໍາ, ສິລະປະດົນຕີແລະອື່ນໆ. ຕະຫລອດໄລຍະຜ່ານມາ ລັດຖະບານໄດ້ເອົາໃຈໃສ່ ແລະ ເລັ່ງລັດພັດທະນາພື້ນຖານໂຄງລ່າງ ແລະ ສິ່ງອໍານວຍຄວາມສະດວກການ ທ່ອງທ່ຽວ ຈາກພາກເໜືອເຖິງພາກໃຕ້ຂອງລາວ ເພື່ອເຊື່ອມໂຍງກັບບັນດາປະເທດເພື່ອນບ້ານໃກ້ຄຽງ, ໄດ້ພັດທະນາຜະລິດຕະພັນທ່ອງທ່ຽວ ແບບຊຸມຊົນມີສ່ວນຮ່ວມ ແນໃສ່ເພື່ອຫລຸດຜ່ອນຄວາມທຸກຍາກຂອງປະຊາຊົນ ແລະ ການພັດທະນາເສດຖະ ກິດ-ສັງຄົມແບບຍືນຍົງ.

ແນວໃດກໍດີ ວຽກງານທ່ອງທ່ຽວ ແມ່ນໜຶ່ງໃນຂະແໜງເສດຖະກິດ ທີ່ໄດ້ຮັບການຂະຫຍາຍ ຕົວເພີ່ມຂຶ້ນຢ່າງຕໍ່ເນື່ອງ ແລະ ວ່ອງໄວ ໃນຫລາຍປະເທດໂດຍສະເພາະໃນຂົງອາຊີ ແລະ ທົ່ວໂລກ. ໃນໄລຍະຜ່ານມາ ລັດຖະບານລາວ ໄດ້ຖືເອົາວຽກງານດັ່ງກ່າວເປັນໜຶ່ງໃນຫລາຍບຸລິມະສິດສໍາຄັນ ທີ່ນອນໃນແຜນພັດທະນາເສດຖະກິດ-ສັງຄົມ ໂດຍສຸມໃສ່ນະໂຍບາຍການທ່ອງທ່ຽວແບບທໍາມະຊາດ, ປະຫວັດສາດ ແລະ ວັດທະນະທໍາ ເປັນກົກເພື່ອດຶງດູດນັກທ່ອງທ່ຽວຕ່າງປະເທດ ລວມທັງນັກທ່ອງທ່ຽວ ສປ ຈີນ ເຂົ້າມາຢ້ຽມຢາມ ສປປ ລາວ.

  ທ່ານ ລັດຖະມົນຕີຖະແຫລງຂ່າວ ວັດທະນະທໍາ ແລະ ທ່ອງທ່ຽວ ກ່າວວ່າ:  ສປປ ລາວ ແລະ ສປ ຈີນ ມີຊາຍແດນຕິດຈອດກັນ ເຊິ່ງມີດ່ານສາກົນ 2 ແຫ່ງ ແລະ 6 ດ່ານປະເພນີ ອັນໄດ້ປະກອບສ່ວນສໍາຄັນເອື້ອອໍານວຍຄວາມສະດວກ ໃຫ້ແກ່ນັກທ່ອງທ່ຽວ, ຂະນະດຽວກັນນີ້ ຍັງໄດ້ເປີດສາຍການບິນ ລະຫວ່າງປະເທດແບບບິນໂດຍກົງຮ່ວມກັນ ລະຫວ່າງນະຄອນຫລວງວຽງຈັນ ແລະ ເມືອງມໍລະດົກໂລກ ແຂວງຫລວງພະບາງ ຫາ ກວາງໂຈ, ຄຸນໝິງ, ໜານໜິງ, ຊາງໂຈ, ເຊີນຕູ, ຊາງໄຮ ແລະ ອື່ນໆ. ຍິ່ງກວ່ານັ້ນພາຍໃນປີ 2021 ນີ້ໂຄງການກໍ່ ສ້າງເສັ້ນທາງລົດໄຟຄວາມໄວສູງ ລາວ-ຈີນ ຈະສໍາເລັດ ແລະ ເປີດໃຫ້ບໍລິການຢ່າງເປັນທາງການ ເຊິ່ງຈະກາຍເປັນສັນຍານອັນດີລະຫວ່າງ ສປປ ລາວ, ຈີນ ແລະ ອາຊຽນ ໃນການເພີ່ມທະວີການເຊື່ອມຈອດ ແລະ ສ້າງຄວາມເຂັ້ມແຂງ ໃນການຮ່ວມມືສອງຝ່າຍສໍາລັບຂະແໜງອຸດສາຫະກໍາທ່ອງທ່ຽວຢ່າງຈະແຈ້ງ.