ເບິ່ງຄືນລະບຽບຄຸ້ມຄອງລົດບັນທຸກດິນຊາຍ ແລະ ແຮ່ແລ່ນເຂົ້າຕົວເມືອງ

ໂດຍ: ທ່ຽງທຳ

ສະບາຍດີ, ເພື່ອນຜູ້ອ່ານ ທີ່ຮັກແພງຫລາຍທ່ານກໍຈະເຫັນເປັນເອກະພາບກັບທ່ຽງທຳ.ປັດຈຸບັນນີ້ຢູ່ນະຄອນຫລວງເຮົາ ເບິ່ງຄືວ່າການປະຕິບັດລະບຽບຄຸ້ມຄອງລົດບັນທຸກດິນ ແລະ ແຮ່, ຊາຍແລ່ນເຂົ້າຕົວເມືອງບໍ່ຄ່ອຍເຂັ້ມງວດພໍປານໃດ, ທຸກມື້ນີ້ຖ້າເຮົາຜ່ານໄປເສັ້ນທາງ 450 ປີ, ຖະໜົນເລກ 1 ແຕ່ທ່າເດື່ອເຂົ້າມາຕົວເມືອງ ຫລື ເຂດເສັ້ນທາງຊານເມືອງຕ່າງໆ, ຈະເຫັນຂະບວນລົດດັ່ງກ່າວ ເປັນຈຳນວນຫລາຍ, ຫລາຍຄົນບໍ່ມີການປົກປິດ ຫລື ປົກປິດກໍບໍ່ແໜ້ນໜາເຮັດໃຫ້ຂີ່ດິນ, ຂີ້ຊາຍ ແລະ ຫີນແຮ່ຕົກເຮຍໄປຕາມທາງຢ່າງບໍ່ປານີ, ເຮັດໃຫ້ເສັ້ນທາງເປື້ອນເປີະ ແລະ ມີຄວາມສ່ຽງຕໍ່ລົດຄັນອື່ນ ແລະ ຜູ້ທຽວທາງທີ່ຈະໄດ້ຮັບບາດເຈັບຈາກຫີນແຮ່ທີ່ຕົກຝັງລົງມາຈາກລົດບັນທຸກທີ່ຂາດຄວາມຮັບຜິດຊອບນັ້ນ.

ແຕ່ເບິ່ງແລ້ວເບື້ອງເຈົ້າໜ້າທີ່ເຮົາກໍບໍ່ຄ່ອຍເຂັ້ມງວດຕໍ່ບັນຫາດັ່ງກ່າວພໍເທົາໃດ ຫລື ມີນອກມີໃນນຳກັນບໍ່?   ແລະ ຖ້າປະປ່ອຍໃຫ້ມີສະພາບແບບນີ້ ກໍຈະເປັນສ່ວນເຮັດໃຫ້ຖະໜົນໃນຕົວເມືອງເຮົາຂາດຄວາມສະອາດ.

ດັ່ງນັ້ນໃນສະພາບແບບນີ້ ສັງຄົມຂໍຮຽກຮ້ອງມາຍັງພາກສ່ວນຮັບຜິດຊອບຈົ່ງໄດ້ເອົາໃຈໃສ່ຕື່ມໃນການປະຕິບັດລະບຽບການຄຸ້ມຄອງ ນີ້ໃຫ້ເຂັ້ມງວດກວ່າເກົ່າ./.