ສື່ລາວ ກຳລັງກ້າວຜ່ານພິທີການ
ໂດຍ: ມຶກບໍ່ແຫ້ງ
ວຽກງານສື່ຄືໝາກຫົວໃຈຂອງການຂັບເຄື່ອນ ຄວາມກ້າວໜ້າຂອງສັງຄົມດ້ວຍຫຼາຍເຫດຜົນ ແຕ່ການເຮັດວຽກຂອງນັກຂ່າວ ຢ່າງມີອິດສະຫຼະ ກ້າວຜ່ານຈາກພິທີການ ສູ່ການສ້າງສັນ, ກົງໄປກົງມາ ນັ້ນຍັງມີສິ່ງທ້າທາຍບໍ່ໜ້ອຍ.
ວຽກງານສື່ ປະກອບສ່ວນໃຫ້ສັງຄົມມີຄວາມກ້າວໜ້າບໍ່ໜ້ອຍ ເປັນຕົ້ນການ ເຜີຍແຜ່ຂໍ້ມູນຂ່າວສານ, ແນວທາງ ຂອງລັດຖະບານ, ວຽກບ້ານການເມືອງ ແລະເລື່ອງລາວອື່ນໆ ຈາກບ່ອນໜຶ່ງສູ່ ອີກບ່ອນໜຶ່ງ, ໃນປັດຈຸບັນ ການຂະຫຍາຍຕົວຂອງສື່ສັງຄົມອອນລາຍ ຍິ່ງໄວວາ ການຮັບຮູ້ຂໍ້ຂ່າວສານນັ້ນກໍຍິ່ງໄວຂຶ້ນ ແລະທົ່ວເຖິງກວ່າເກົ່າ.
ຜ່ານມາ ພວກເຮົາມັກຈົ່ມວ່າ ບັນດາໜັງສືພິມ, ສື່ ຕ່າງໆ ຂອງລາວ ຜະລິດເນື້ອໃນທີ່ມີ ແຕ່ຂາວກອງປະຊຸມ, ການເຄື່ອນໄຫວ ການຢ້ຽມຢາມ ຂອງແຂກ ແລະຂ່າວພິທີການ ອື່ນໆ ເຮັດໃຫ້ຄວາມສົນໃຈຂອງມວນຊົນລາວ ມີໜ້ອຍລົງ ແຕ່ໃນຄວາມຈິງແລ້ວ ຂ່າວພິທີການ ບາງອັນກໍຍັງຂາດບໍ່ໄດ້.
ການເກີດມີ ນັກຂ່າວສັນຈອນ, ການເຜີຍແຜ່ຂ່າວ ບັນຫາສັງຄົມ ຜ່ານຊ່ອງຂ່າວອອນລາຍ (online), ຜ່ານບຸກຄົນ ໄດ້ຕີແຜ່ ຄວາມສົນໃຈຈາກສັງຄົມເປັນວົງກວ້າງ, ສາມາດກະຕຸກຊຸກຍູ້ ຄວາມຕື່ນຕົວ ໃນນາມເປັນພົນລະເມືອງຂອງຊາດ ໄດ້ດີ ໃນການອອກຄຳຄິດເຫັນ, ການແລກປ່ຽນຄວາມຮູ້ ປະສົບການຕ່າງໆ, ການແລກປ່ຽນຂໍ້ມູນຂ່າວສານ ຢ່າງທັນການ ຈາກທຸກແຈມູມ.
ເຖິງວ່າ ບັນດາສື່ສັງຄົມ ອອນລາຍ ຍັງບໍ່ໄດ້ຮັບການຈົດທະບຽນ ຄຸ້ມຄອງຢ່າງເປັນລະບົບ, ແລະບາງເທື່ອກໍອອກຂ່າວຊະຊາຍ ເພື່ອດຶງດູດຄວາມສົນໃຈ ແຕ່ພວກເຮົາເຫັນວ່າ ຄົນລາວຈຳນວນຫຼວງຫຼາຍ ຕ້ອງການ ຂ່າວທີ່ມີລັກສະນະ ສ້າງສັນ, ກົງໄປກົງມາ ຫຼາຍກວ່າຂ່າວພິທີການ.
ເປັນເລື່ອງທີ່ດີຢ່າງຍິ່ງ ໃນກອງປະຊຸມສື່ມວນຊົນລາວ ເທື່ອຫຼັງສຸດ ການນຳຂອງລາວ ໄດ້ມີຄຳເຫັນວ່າ “ສື່ມວນຊົນລາວ ຄວນເນັ້ນໜັກ ຂ່າວທີ່ມີເນື້ອຫາສະລະຫຼາຍຂຶ້ນ, ເຈາະຈິ້ມບັນຫາ ກ່ຽວກັບການພັດທະນາ ທີ່ສັງຄົມໃຫ້ຄວາມສົນໃຈ ແລະຊອກວິທີທາງແກ້ໄຂ, ຫຼຸດຜ່ອນຂ່າວພິທີການລົງ” ເຊິ່ງເປັນບາດກ້າວສຳຄັນທີ່ ສື່ລາວ ຈະຄ່ອຍໆ ກ້າວຜ່ານ ຈາກການເນັ້ນໃສ່ຂ່າວ ພິທີການ ສູ່ຂ່າວທີ່ມີການວິເຄາະວິໄຈບັນຫາຄັນແນ່.
ຈາກວິໄສທັດດັ່ງກ່າວ, ຈາກການຄຸ້ນເຄີຍກັບການ ເຊື່ອຟັງ, ຄວາມຢ້ານກ່ຽວກັບ ຄຳວ່າ “ຜິດ ຫຼື ຖືກ” ນັ້ນ ຍັງສັ່ນຄອນແນວຄິດປະດິດສ້າງຂອງນັກຂ່າວຈຳນວນຫຼາຍ ເຊິ່ງເປັນສິ່ງທ້າທາຍ ທີ່ພວກເຮົາອາດ ຄ່ອຍໆ ຜ່ານຈາກຈຸດນີ້ໄປໃຫ້ໄດ້.
ພ້ອມນັ້ນ, ເມື່ອບໍ່ດົນຜ່ານມາ (ເມສາ 2019) ການເຜີຍແຜ່ຂໍ້ມູນ “ດັດສະນີ ເສລີພາບ ຂອງວຽກງານສື່ມວນຊົນ” ໃນທົ່ວໂລກ ເຊິ່ງໃນນັ້ນ ປະເທດ ນອກແວ (Norway) ເປັນປະເທດທີ່ນັກຂ່າວມີສິດເສລີພາບຫຼາຍກວ່າໝູ່, ເຖິງວ່າ ສປປລາວ ຈະໄດ້ຄະແນນໜ້ອຍ ແຕ່ດ້ວຍ ວິໄສທັດໃໝ່ ຂອງລັດຖະບານລາວ ກ່ຽວກັບສື່ມວນຊົນ ຈະເຮັດໃຫ້ ຂ່າວລາວ ກ້າວສູ່ຄຸນນະພາບໃໝ່ ທີ່ໃສ່ໃຈບັນຫາ ທີ່ເຄັ່ງຮ້ອນ ທີ່ມວນຊົນສົນໃຈ, ປະກອບສ່ວນໃຫ້ ການພັດທະນາເສດຖະກິດ-ສັງຄົມ ຂອງປະເທດມີຄວາມໂປ່ງໃສຫຼາຍຂຶ້ນ. ແນວໃດກໍຕາມ, ການອອກຂ່າວທີ່ໜ້າສົນໃຈຂອງມວນຊົນ ກໍຄວນຮັກສາໄວ້ ເຊິ່ງຈັນຍາບັນ ທີ່ບໍ່ບິດເບືອນຄວາມຈິງ ເພື່ອສ້າງຄວາມສົນໃຈ ໂດຍໄຮ້ການຮິ່ນຕອງ ໂດຍສະເພາະ ຜ່ານສື່ສັງຄົມອອນລາຍ ທີ່ຍັງບໍ່ທັນ ໄດ້ຮັບການຄຸ້ມຄອງຄັກແນ່ ທັງນີ້ເພື່ອຮັບປະກັນວ່າ ຄົນລາວ ສາມາດຮັບຮູ້ຂໍ້ມູນຂ່າວສານທີ່ໜ້າສົນໃຈ ແລະຖືກຕ້ອງກວ່າເກົ່າ
