ສະຫາຍເລຂາທິການໃຫຍ່, ປະທານປະເທດ ແຫ່ງ ສປປ ລາວ ພົບປະກັບ ປະທານສະພາປະຊາຊົນທົ່ວປະເທດຈີນ

ໃນໂອກາດຢ້ຽມຢາມລັດຖະກິດ ແລະ ເຂົ້າຮ່ວມກອງປະຊຸມເວທີປຶກສາຫາລືການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2 ທີ່ ສປ ຈີນ ໃນແລງວັນທີ 26 ເມສານີ້, ສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໄດ້ພົບປະກັບສະຫາຍ ລີ ຈ້ານຊູ, ຄະນະປະຈໍາກົມການເມືອງສູນກາງພັກກອມມູນິດຈີນ, ປະທານສະພາປະຊາຊົນທົ່ວປະເທດຈີນ.

   ສະຫາຍ ບຸນຍັງ ວໍລະຈິດ ໄດ້ສະແດງຄວາມພາກພູມໃຈທີ່ໄດ້ມາຢ້ຽມຢາມ ແລະ ຮ່ວມກອງປະຊຸມສໍາຄັນດັ່ງກ່າວ, ພ້ອມໄດ້ພົບສະຫາຍ ລີ ຈ້ານຊູ ຊຶ່ງໄດ້ຕີລາຄາສູງຕໍ່ ສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ ທີ່ໄດ້ສະເໜີແນວຄວາມຄິດອັນໃໝ່ ໃນການກໍ່ສ້າງ “ໜຶ່ງແລວ ໜຶ່ງເສັ້ນທາງ”, ຕີລາຄາສູງຕໍ່ຜົນສໍາເລັດຂອງການດໍາເນີນກອງປະຊຸມສະພາປະຊາຊົນທົ່ວປະເທດຈີນ ສະໄໝສາມັນ ເທື່ອທີ 2 ຊຸດທີ XIII ໃນເດືອນມີນາທີ່ຜ່ານມາ, ທັງໄດ້ຕີລາຄາສູງຕໍ່ຜົນສໍາເລັດອັນໃຫຍ່ຫຼວງ, ຮອບດ້ານ ໃນການພັດທະນາເສດຖະກິດ-ສັງຄົມ ຂອງ ສປ ຈີນ; ໄດ້ຕີລາຄາຄືນສາຍພົວພັນມິດຕະພາບ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍ່ຄືການພົວພັນ ລະຫວ່າງ ສອງອົງການນິຕິບັນຍັດ ແລະ ເຊື່ອໝັ້ນວ່າ ໃນຕໍ່ໜ້າ ສະພາ ຂອງ 2 ປະເທດ ຈະສືບຕໍ່ເສີມຂະຫຍາຍການພົວພັນຮ່ວມມື ເພື່ອຜົນປະໂຫຍດຂອງປະຊາຊົນສອງຊາດ ລາວ-ຈີນ.

ສະຫາຍ ລີ ຈ້ານຊູ ໄດ້ສະແດງຄວາມຍິນດີຕ້ອນຮັບ ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ພ້ອມດ້ວຍຄະນະທີ່ເດີນທາງມາຢ້ຽມຢາມ ສປ ຈີນ ຄັ້ງນີ້, ເຊິ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດ, ໄດ້ຕີລາຄາສູງຕໍ່ ການນໍາສູງສຸດ ຂອງ ສອງພັກ, ສອງລັດ ຈີນ-ລາວ ທີ່ເປັນຜູ້ນໍາໜ້າພາທາງໃນການເຮັດໃຫ້ການພົວພັນສອງປະເທດ ກ້າວຂຶ້ນສູ່ໄລຍະທີ່ດີທີ່ສຸດໃນປະຫວັດສາດ. ຝ່າຍຈີນ ຍິນດີຈະເພີ່ມທະວີການຮ່ວມມື ລະຫວ່າງ 2 ສະພາ ແລະ 2 ອົງການນິຕິບັນຍັດ ຂອງສອງປະເທດໃຫ້ໜັກແໜ້ນຍິ່ງຂຶ້ນ.