ທະນາຄານໂລກຄາດວ່າການຂະຫຍາຍຕົວຂອງເສດຖະກິດພາກພື້ນອາຊີຕາເວັນອອກ ຈະຢູ່ໃນລະດັບປານກາງ

ອີງຕາມບົດລາຍງານຂອງທະນາຄານໂລກຄາດຄະເນວ່າການຂະຫຍາຍຕົວຂອງເສດຖະກິດໃນພາກພື້ນອາຊີຕາເວັນອອກ ແລະ ປາຊີຟິກ ຈະຫລຸດລົງຢູ່ໃນລະດັບ 6,0%  ໃນປີ 2019-2020 ຈາກ 6,3% ໃນປີ 2018.

  ທ່ານນາງ ວິກຕໍເລຍ ຄວາຄາ ຮອງປະທານທະນາຄານໂລກປະຈຳພາກພື້ນອາຊີຕາເວັນອອກ ແລະ ປາຊີຟິກ ລາຍງານໃຫ້ຮູ້ໃນວັນທີ 24 ເມສານີ້ ວ່າ: ການຂະຫຍາຍຕົວທີ່ມີຄວາມໝັ້ນຄົງຂອງພາກພື້ນຈະຊ່ວຍຫລຸດຜ່ອນຄວາມທຸກຍາກໄດ້ຕື່ມອີກ. ພ້ອມດຽວກັນນັ້ນ, ພາຍໃນປີ 2021 ຄາດວ່າຄວາມທຸກຍາກຂັ້ນຮ້າຍແຮງຈະຫລຸດລົງຕໍ່າກວ່າ 3%, ແຕ່ເຖິງຢ່າງໃດກໍຕາມ ປະຊາ ຊົນເຄິ່ງຕື້ ທີ່ອາໃສ່ຢູ່ໃນພາກພື້ນແມ່ນຍັງຂາດຄວາມໝັ້ນຄົງທາງເສດຖະກິດ, ເຊິ່ງເປັນສິ່ງຢັ້ງຢືນທີ່ສຳຄັນໃຫ້ຮູ້ເຖິງບັນດາສິ່ງທ້າທ້າຍທີ່ພວມປະເຊີນໜ້າຂອງຫລາຍປະເທດ.   ທ່ານນາງ ວິກຕໍເລຍ ຄວາຄາ ໃຫ້ຮູ້ຕື່ມວ່າ: ທ່າອ່ຽງຂອງບັນດາປະເທດ ທີ່ມີເສດຖະກິດຂະຫຍາຍຕົວຊ້າໃນພາກພື້ນຍັງສືບຕໍ່ໄປໃນທາງທີ່ດີ ແລະ ຄາດການວ່າໂຄງການພື້ນຖານໂຄງລ່າງຂະໜາດໃຫຍ່ຈະຊ່ວຍເສດຖະກິດຂອງ ສປປ ລາວ ແລະ ມົງໂກລີ ຂະຫຍາຍຕົວດີຂຶ້ນ, ສ່ວນກໍາປູເຈຍຄາດວ່າຍັງຈະສືບຕໍ່ມີລັກສະນະເຂັ້ມແຂງ ແລະ ປະເທດມຽນມາ ຄາດການວ່າ: ນະໂຍບາຍການເງິນແບບຂະຫຍາຍ ຈະຊ່ວຍຍູ້ດັນການຂະຫຍາຍຕົວຂອງເສດຖະກິດໃນໄລຍະສັ້ນ ແລະ ໄລຍະກາງ. ສຳລັບເສດຖະກິດຂອງປະເທດ ປາປົວນິວກີນີ ໃນປີ 2019 ຄາດວ່າ: ຈະປັບຕົວດີຂຶ້ນ, ສ່ວນການຂະຫຍາຍຕົວຂອງເສດຖະກິດປະເທດ ຟິຈິ ຈະສືບຕໍ່ເພີ່ມຂຶ້ນ.