ຊາວກະສິກອນໃນຫຼາຍແຂວງເລີ່ມລົງມືເກັບກ່ຽວເຂົ້ານາແຊງແລ້ວ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ປັດຈຸບັນຊາວກະສິກອນໃນຂອບເຂດທົ່ວປະເທດ ພວມເລັ່ງເກັບກ່ຽວມ້ຽນມັດຜົນຜະລິດເຂົ້ານາແຊງ ໃນເນື້ອທີ່ປັກດໍາໄດ້ 89 ພັນກວ່າເຮັກຕາ ເທົ່າກັບ 90% ຂອງເນື້ອທີ່ແຜນການສູ້ຊົນ 1 ແສນເຮັກຕາ. ສ່ວນການປູກພືດລະດູແລ້ງປັດຈຸບັນ ບັນລຸໄດ້ 135.470 ເຮັກຕາ ເທົ່າກັບ 73,22% ຂອງເນື້ອທີ່ແຜນການ 185 ພັນເຮັກຕາ. ພືດທີ່ປູກຫຼາຍກວ່າໝູ່ແມ່ນສາລີອາຫານສັດ, ສາລີຫວານ, ຢາສູບ, ອ້ອຍ, ມັນຕົ້ນ, ຖົ່ວດິນ ແລະ ເຜືອກມັນຕ່າງໆ, ໃນນັ້ນ, ແຂວງທີ່ປູກຫຼາຍກວ່າໝູ່ແມ່ນບັນດາແຂວງພາກເໜືອ ປະຕິບັດໄດ້ 57 ພັນກວ່າເຮັກຕາ, ພາກກາງ 48 ພັນກວ່າເຮັກຕາ ແລະ ພາກໃຕ້ 28 ພັນກວ່າເຮັກຕາ. ສໍາລັບພືດຜັກແມ່ນເກັບກ່ຽວໄດ້ຫຼາຍຮອບແລ້ວ ເປັນຕົ້ນ: ໝາກຖົ່ວ, ຜັກສະລັດ, ຜັກຫອມ, ຜັກບົ່ວ, ຜັກກາດ, ຫອມລາບ, ຜັກບົ້ງ ແລະ ຜັກອື່ນໆ.

    ກະຊວງກະສິກໍາ ແລະ ປ່າໄມ້ ໃຫ້ຮູ້ອີກວ່າ: ໃນໜຶ່ງເດືອນຜ່ານມານີ້, ໜ່ວຍງານຂອງຕົນສາມາດຢຶດໄມ້ທີ່ຜິດລະບຽບກົດໝາຍ ຢູ່ແຂວງສະຫວັນນະເຂດ ປະເພດໄມ້ແຄນ ໄດ້ 146 ໂຕ, ມີບໍລິມາດ 6 ເມັດກ້ອນ, ໄມ້ທ່ອນ 14 ພັນກວ່າເມັດກ້ອນ, ໄມ້ແປຮູບໄດ້ 19 ພັນກວ່າເມັດກ້ອນ, ຈັກສະຕິນ 1 ເຄື່ອງ ແລະ ໄດ້ດໍາເນີນຄະດີກັບຜູ້ຕ້ອງຫາ ທັງໝົດ 14 ລາຍ, ໃນນັ້ນມີຄະດີ ກ່ຽວກັບໄມ້ 13 ລາຍ, ເຄື່ອງປ່າຂອງດົງ 1 ລາຍ ແລະ ພວມ ສືບສວນ-ສອບສວນ 11 ລາຍ ແລະ ສຶກສາອົບຮົມ 2 ລາຍ. ພ້ອມນັ້ນຍັງສາມາດຢຶດສັດນໍ້າ-ສັດປ່າ ໄດ້ 27 ກວ່າກິໂລ ແລະ ເຄື່ອງຂອງດົງ 1 ພັນກວ່າກິໂລ. ສ່ວນຜູ້ກະທໍາຜິດແມ່ນໄດ້ສຶກສາອົບຮົມ ແລະ ປັບໄໝຕາມລະບຽບກົດໝາຍ. ນອກນີ້ກໍລົງຕິດຕາມກວດກາການເຂົ້າບຸກລຸກທີ່ດິນປ່າໄມ້ ຢູ່ເມືອງສັງທອງ ນະຄອນຫຼວງວຽງຈັນ ຈົນເຮັດໃຫ້ເກີດໄຟໄໝ້ປ່າ 20 ເຮັກຕາ ແລະ ລົງກວດກາການຂຸດຄົ້ນໄມ້ ແລະ ເຄື່ອນຍ້າຍໄມ້ໃນເຂດອ່າງນໍ້າງຽບ ແຂວງໄຊສົມບູນ ແລະ ແຂວງບໍລິຄໍາໄຊ ນໍາອີກ.