ລັດຖະບານລາວ ປະດັບຫລຽນກາມິດຕະພາບ ໃຫ້ຜູ້ປະສານງານອົງການ ສປຊ ແລະ ຜູ້ຕາງຫນ້າອົງການ UNDP ປະຈໍາລາວ

ພິທີປະດັບຫລຽນກາມິດຕະພາບ ໃຫ້ແກ່ ທ່ານນາງ ກາຣິນາ ອິມໂມເນັ້ນ (Kaarina IMMONEN), ຜູ້ປະສານງານ ອົງການສະຫະປະຊາຊາດ (ສປຊ) ແລະ ຜູ້ຕາງຫນ້າອົງການ ສປຊ ເພື່ອການພັດທະນາ (UNDP) ປະຈໍາລາວ, ໄດ້ມີຂຶ້ນໃນວັນທີ 19 ເມສາຜ່ານມານີ້, ຢູ່ນະຄອນຫຼວງວຽງຈັນ, ເພື່ອເປັນການຍ້ອງຍໍຊົມເຊີຍຜົນງານຂອງຜູ້ກ່ຽວ ພາຍຫລັງສິ້ນສຸດການປະຕິບັດໜ້າທີ່ຢູ່ລາວ, ໂດຍທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ໄດ້ຕາງໜ້າລັດຖະບານໃຫ້ກຽດປະດັບຫຼຽນດັ່ງກ່າວ. ໃນໂອກາດນີ້, ທ່ານ ຮອງລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ວຽກງານຂອງ ທ່ານ ນາງ ກາຣິນາ ອິມໂມເນັ້ນ ທີ່ໄດ້ປະກອບສ່ວນເສີມຂະຫຍາຍ ການພົວພັນຮ່ວມມືຊ່ວຍເຫລືອລາວ ໃນດ້ານຕ່າງໆ ດັ່ງນັ້ນ, ລັດຖະບານລາວ ຈຶ່ງໄດ້ຕົກລົງປະດັບຫລຽນກາມິດຕະພາບນີ້. ພ້ອມດຽວກັນ, ທ່ານນາງ ກາຣິນາ ອິມໂມເນັ້ນ ກໍໄດ້ສະແດງຄວາມຂອບໃຈຕໍ່ການຮ່ວມມື ແລະ ສະໜັບສະໜູນຂອງ ລັດຖະບານລາວ ຕະຫລອດໄລຍະການປະຕິບັດໜ້າທີ່ຂອງຕົນຢູ່ລາວເປັນເວລາເກືອບ 5 ປີທີ່ຜ່ານມາ, ພ້ອມທັງຢືນຢັນ ຈະສືບຕໍ່ປະກອບສ່ວນຊຸກຍູ້ໃຫ້ມີການຊ່ວຍເຫລືອ ແລະ ສະໜັບສະໜູນຂອງ ອົງການ UNDP ໃຫ້ແກ່ລາວໃນຕໍ່ຫນ້າຕື່ມອີກ.