ມອບ-ຮັບ ສະຖານນີວັດແທກລະດັບນ້ຳ ແລະ ຕິດຕາມສະພາບອາກາດ

ພິທີ​ມອບ-ຮັບສະຖານນີວັດແທກລະດັບນ້ຳ ແລະ ຕິດຕາມສະພາບອາກາດ (ເຄື່ອງໂທລະມາດ) ລະ​ຫວ່າງ​ກົມ​ເຕັກ​ໂນ​ໂລ​ຊີ ​ແລະ ນະ​ວັດຕະ​ກຳ ​ແລະ ໃຫ້ກົມອຸຕຸນິ ຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ​ໄດ້​ມີ​ຂຶ້ນ​ໃນ​ວັນ​ທີ 19 ​ເມສາ​ນີ້ ເພື່ອນຳໃຊ້ເຂົ້າໃນການຄຸ້ມຄອງຊັບພະຍາກອນນ້ຳ ​ແລະ ເປັນໂຄງການຮ່ວມມືຄົ້ນຄວ້າ-ທົດລອງນຳໃຊ້ວິທະຍາສາດ ແລະ ເຕັກໂນໂລຊີ ເຂົ້າໃນການຄຸ້ມຄອງຊັບພະຍາກອນນ້ຳ, ຊຶ່ງໄດ້ຮັບການຊ່ວຍເຫລືອ ຈາກສະຖາບັນຂໍ້ມູນ-ຂ່າວສານ ຊັບພະຍາກອນນ້ຳ ແລະ ກະສິກຳ ກະຊວງວິ ທະຍາສາດ ແລະ ເຕັກໂນໂລຊີ ຣາຊະອານາຈັກໄທ.

ກົມເຕັກໂນໂລຊີ ແລະ ນະວັດຕະກຳ ໃນນາມຄູ່ຮ່ວມມື ຈຶ່ງໄດ້ຄົ້ນຄ້ວາທົດລອງນຳໃຊ້ ແລະ ເຫັນວ່າເປັນເຕັກໂນໂລຊີທີ່ທັນສະໄໝ ແລະ ເໝາະສົມ ໃນການນຳໃຊ້ເຂົ້າໃນການຕິດຕາມສະພາບອາກາດ, ລະດັບນ້ຳ ແລະ ປະລິມານນ້ຳຝົນ ເພື່ອເປັນການຫລຸດຜ່ອນໄພທຳມະຊາດ ເປັນຕົ້ນ ໄພແຫ້ງແລ້ງ ແລະ ໄພນ້ຳຖ້ວມ, ທັງຮັບປະກັນໃຫ້ມີນ້ຳໃຊ້ ເຂົ້າໃນການຜະລິດລະດູແລ້ງ ແລະ ມີນ້ຳໃຊ້ຕະຫລອດລະດູການ, ໂດຍສະເພາະການຜະລິດກະສິກຳຂອງຊາວກະສິກອນ ເພື່ອບັນລຸໄດ້ເປົ້າໝາຍການພັດທະນາ ແລະ ການແກ້ໄຂຄວາມທຸກຍາກ ຂອງປະຊາຊົນ​ໃຫ້​ຫລຸດຜ່ອນ​ລົງ.