ປີໃໝ່ລາວສີສັນວັດທະນະທຳ ທີ່ເປັນເອກະລັກຂອງຊາດ
ໂດຍ: ທິດກ່ຳ
ບຸນປີໃໝ່ລາວຖືວ່າເປັນ ບຸນປາງໃຫຍ່ຂອງຊາດ. ພັກລັດຖະການເຖິງສາມວັນແຕ່ ປີນີ້ໄດ້ພັກຊົດເຊີຍຕື່ມອີກ 1 ວັນ ຄືວັນພຸດວັນທີ 17 ເມສາ.
ສຳລັບກິດຈະກຳບຸນປີໃໝ່ມີຫລາກຫລາຍສີສັນ ແລະ ມີການພັດທະນາສິ່ງ ຍອດຍິ່ງໄປຕາມຍຸກຕາມສະໄໝໄປເລື້ອຍໆ, ຕົວຢ່າງໃນຍຸກ ນີ້ເພິ່ນສະຫລອງບຸນປີໃໝ່ຕິດພັນກັບການທ່ອງທ່ຽວ, ການບໍລິການໃນດ້ານຕ່າງໆ ເພື່ອສ້າງລາຍໄດ້ໃຫ້ຜູ້ປະກອບການ ແລະ ສ້າງລາຍຮັບໃຫ້ປະເທດຊາດ.
ໃນເປີງພຸດທະການເພິ່ນເອີ້ນວ່າບຸນເດືອນຫ້າ ຫລື ວ່າບຸນຫົດນ້ຳມີການສະເຫລີມສະຫລອງກັນເຖິງເຈັດມື້ເຈັດຄືນຄົບຕາມຈຳນວນລູກສາວທັງເຈັດທີ່ ເປັນທິດາຂອງພະຍາກະບິນລະພົມ ຫລື ເອີ້ນກັນຢ່າງໜຶ່ງວ່າ ນາງສັງຂານທັງເຈັດ.
ພໍຕົກມາສະໄໝນີ້, ເພິ່ນມັກເອີ້ນກັນວ່າບຸນປີໃໝ່ຍ້ອນວ່າເປັນວັນສົ່ງທ້າຍປີເກົ່າຕ້ອນຮັບປີໃໝ່ໂດຍຄິດໄລ່ ການປ່ຽນ (ຈສ) ຈຸນລະສັກ ກະຣາດ ແລະ (ພສ) ພຸດທະສັກກະຣາດໂດຍ ຢຶດຖືເອົານັບແຕ່ມື້ມີສາດສະໜາພຸດ ຢູ່ລາວເຮົາເປັນຈຸນລະສັກ ກະຣາດ ແລະ ມີສາດສະໜາ ພຸດເກີດມາໃນໂລກເປັນພຸດທະສັກກະຣາດ.
ແນວໃດກໍຕາມ, ສຳລັບປະເທດລາວຂອງພວກເຮົາ ຖືວ່າບຸນປີໃໝ່ເປັນບຸນປະຈຳຊາດ, ນອນຢູ່ໃນຮີດ 12 ຄອງ 14 ຮີດຍີ່ຄອງຈຽງທີ່ໄດ້ ສືບທອດກັນມາແຕ່ປະຖົມບູຮານ. ສິ່ງທີ່ປະເສີດຍອດ ຍິ່ງຂອງບຸນ ປີໃໝ່ລາວ ທີ່ຄວນພ້ອມກັນສົ່ງເສີມນັ້ນຄື: ສິ່ງທີ່ສະແດງອອກທາງ ດ້ານສິລະປະວັດທະນະທຳ, ຮີດຄອງປະເພນີ, ອັນດີງາມທີ່ເປັນເອກະລັກຂອງຊາດເຊັ່ນ: ການເຮັດບຸນສິນກິນທານ ແລະ ສົງນ້ຳຕາມວັດ ວາອາຮາມ, ຕາມ ເຮືອນຊານບ້ານຊ່ອງ, ການບາສີສູ່ຂວັນ, ສົມມັດສົມມາຜູ້ໃຫຍ່ໄມ້ສູງ, ການນຳພັກ-ລັດ, ຜູ້ ອາຍຸສູງ, ພໍ່ແມ່ ແລະ ຜູ້ມີບຸນຄຸນຕໍ່ປະເທດບ້ານເມືອງ, ສີສັນແຫ່ງວັດນະທຳ, ອາລິຍະທຳຂອງບຸນປີໃໝ່ຍັງ ສະແດງອອກໃນການນຸ່ງຖື ທີ່ສວຍສົດງົດງາມ.
ອັນເປັນເອກະລັກຂອງຊາດ, ການແຫ່ຫວໍ, ແຫ່ນາງ ສັງຂານ, ຫົດສົງກັນດ້ວຍນ້ຳອົບນ້ຳຫອມ, ອວຍພອນ ກັນດ້ວຍຄຳເວົ້າຄຳວ່າທີ່ດີໆ ຈົບງາມ, ອ່ອນນ້ອຍທ່ອມຕົນ, ການປະພຶດທຸກອະລິຍະບົດຕໍ່ກັນນັ້ນມີແຕ່ສິ່ງຍອດຍິ່ງ ແລະ ປະເສີດເລີດລ້ຳ.
ແນວໃດກໍດີ, ຕາມທິດ ກ່ຳວ່າຕົກມາໃນຍຸກສະໄໝນີ້ໂລກຂອງເຮົານັບມື້ມີການ ປ່ຽນແປງ ແລະ ພັດທະນາກ້າວໄປ, ການສະຫລອງບຸນ ປີໃໝ່ຍິ່ງເຕັມໄປດ້ວຍຫລາຍສີສັນ ແລະ ສາລະພັດຢ່າງ ເປັນຕົ້ນ: ມີດົນຕີມະໂຫລີ, ມ່ວນຊື່ນລືນເລີງຫົດສົງອວຍພອນໃຫ້ກັນ ແລະ ກັນແຕ່ໄປ ຄຽງຄູ່ກັນນັ້ນກໍມີບາງອັນຕ້ອງໄດ້ປັບປຸງຕື່ມ.
ໂດຍສະເພາະແມ່ນການ ນຸ່ງຖືກໍໂລດຜົນເປົ່າແປນ, ນຸ່ງສັ້ນ, ນຸ່ງເຂີນ, ໂປ້ເປືອຍ, ດື່ມເຫລົ່າດື່ມເບຍເມົາຈົນເກີນເຫດ, ເກີດຄວາມກະສັນຫັນ ສາກໍຈົກຊ້າຍຈົກຂວາ, ເດົ້າເດັ້ງ, ໂຊກາຍ, ຍົວະຍວນຊວນໃຈຢ່າງບໍ່ກະດຽມຄີງ.
ອີກສິ່ງໜຶ່ງທີ່ໜ້າເປັນຫວ່ງໃນຍຸກປັດຈຸບັນຄືເອົາ ຄວາມເມົາເປັນໃຫຍ່, ງານປີໃໝ່ຕ້ອງຕິດພັນກັບເຫລົ້າກັບເບຍ, ພວກທຸລະກິດດ້ານນີ້ ກໍເຮັດທຸກສິ່ງທຸກຢ່າງເພື່ອ ໃຫ້ຕົນເອງມີລາຍຮັບ, ມີຜົນປະໂຫຍດສູງສຸດພາກັນຈັດຕັ້ງສະຖານກິນດື່ມຫລືສະຖານທີ່ທ່ອງທ່ຽວໃຫ້ໃຫຍ່ ໂຕມະໂຫຖານເບິ່ງຢ່າງໜຶ່ງງານບຸນປີໃໝ່ມັນຄືບຸນກິນເຫລົ້າກິນເບຍ.
ເມື່ອຕັ້ງໂຈດກັນ ວ່າສິ່ງຕາມມານັ້ນຄືຫຍັງ? ມັນກໍ ຄືເກີດອຸປະຕິເຫດຍ້ອນເມົາ ແລ້ວຂັບລົດ ແລະ ຍັງມີກໍລະນີອື່ນໆອີກຕາມມາ.
ຕາມທິດກ່ຳວ່າ, ປີຕໍ່ໄປເຮົາຈະຫລີກລ້ຽງເຄາະເຂັນ ເວນຮ້າຍນັ້ນມັນກໍພໍມີທາງ ອອກເຊ່ັນ: ມີສະຕິສຳປະຊັນຍະ, ກິນດື່ມພໍດ້າມພໍດີ, ມີສະຕິແລ້ວປັນຍາກໍຈະເກີດ, ທຸກ ສິ່ງຢ່າງເລື່ອງຄວາມປອດໄພນັ້ນມັນຂຶ້ນຢູ່ທີ່ເຮົາເອງບໍ່ໄດ້ ຂຶ້ນກັບເຫລົ້າເບຍຮີດຄອງ ປະເພນີ, ວັດທະນະທຳທີ່ ເປັນເອກະລັກຂອງຊາດນັ້ນ ມັນກໍແມ່ນພວກເຮົາເປັນຜູ້ ອະນຸລັກຮັກສາໃຫ້ຢືນຍົງກັບຊາດລາວ, ຄົນລາວຕະຫລອດໄປ, ການສໍ້ລາດບັງຫລວງຂໍໃຫ້ໜີໄປນຳປີເກົ່າ, ປີໃໝ່ຂໍໃຫ້ມີແຕ່ຜູ້ສັດຊື່ຕໍ່ຊາດບ້ານເມືອງ./.
