ການຄວບຄຸມເຫດຮ້າຍ ແລະ ບັນຫາດ້ວຍກົດໝາຍ ແລະ ລະບຽບສະເພາະ
ໂດຍ: ວິເສດ ສະແຫວງສຶກສາ.
ມື້ນີ້ລອງໄປເບິ່ງວິທີການຂອງບາງປະເທດໃນການ ເຝົ້າລະວັງບໍ່ໃຫ້ມີການໃຊ້ຄວາມຮຸນແຮງໃນເວລາມີ ງານບຸນ ແລະ ມາດຕະການ ກຳຈັດການໃຊ້ອຳນາດເກີນ ຂອບເຂດຂອງຜູ້ມີອຳນາດເງິນ.
ການປ້ອງກັນບັນຫາການໃຊ້ຄວາມຮຸນແຮງ, ອາລະວາດຜິດຖຽງຕ່ອຍຕີກັນຍາມມີງານບຸນ ນັ້ນຢູ່ປະເທດ ໃດເຂົາກໍມີວິທີປ້ອງກັນໄວ້ ກ່ອນເພາະໃນໄລຍະມີງານບຸນນັ້ນຄົນມັກຈະເພີດເພີນເກີນໄປຈົນຂາດສະຕິບວກ ກັບລິດນ້ຳຕາຜີເຜດເຂົ້າ ໄປຕື່ມບັນຫານ້ອຍກໍກາຍເປັນໃຫຍ່. ຢູ່ຊິດນີ, ນະຄອນໃຫຍ່ທີ່ສຸດຂອງ ອົດສະຕຼາ ລີນັ້ນ ມີປະເພນີຈັດບຸນ ມຸມບາ (Moomba) ເຊິ່ງເປັນງານມ່ວນຊື່ນເລີ່ນ ເລິງທົ່ວຊຸມຊົນ (Free Community) ແກ່ຍາວເປັນເວລາ 4 ວັນເຕັມໆ. ແຕ່ມາພ້ອມໆ ກັນບັນຍາກາດມ່ວນ ຊື່ນດັ່ງກ່າວ ກໍເຄີຍເກີດມີບັນຫາ ອາລະ ວາດຕ່ອຍຕີກັນລະຫວ່າງ ກຸ່ມແກ້ງຊາວໜຸ່ມ ອັນທະພານໃນງານບຸນ ມຸມບາ ປະຈຳປີ 2016.
ດັ່ງນັ້ນເພື່ອບໍ່ໃຫ້ເກີດບັນຫາຊ້ຳຮອຍທາງການນະຄອນຊິດນີ ຈິ່ງໄດ້ມອບສິດ ເດັດຂາດໃຫ້ກອງ ກຳລັງ ຕຳຫລວດມີອຳນາດພິເສດ ຫລາຍດ້ານເຊ່ັນ: ສິດກວດຄົ້ນໃຜກໍໄດ້ເພື່ອຊອກຫາ ອາວຸດ, ສິດໄດ້ຮັບການຊ່ວຍ ເຫລືອຈາກສູນຕິດຕາມກວດກາ ແລະ ຕີລາຄາສະຖານະການ (MAC) ເພື່ອປະສານ ງານກັນຮັບມືກັບເຫດຮ້າຍ ທີ່ອາດເກີດຂຶ້ນ.
ເຫດຮ້າຍທີ່ເກີດຂຶ້ນໃນງານບຸນມຸມບາ ປີ 2016 ໄດ້ສ້າງຄວາມເສຍຫາຍໃຫ້ທັງຝ່າຍເຈົ້າໜ້າທີ່ຕຳຫລວດ ແລະ ສະມາຊິກຊຸມຊົນຈົນມີຄົນເອີ້ນງານບຸນປະຈຳປີນັ້ນວ່າ ງານບາບບໍ່ແມ່ນງານບຸນ!
ຕໍ່ໄປຂໍເວົ້າກ່ຽວກັບມາດຕະການມັດມືມັດຕີນຜູ້ມີອຳ ນາດເງິນບໍ່ໃຫ້ໃຊ້ອຳນາດ ເກີນຂອບເຂດ. ເລື່ອງນີ້ຄວນ ໄປເບິ່ງກົດໝາຍເຫລັກຂອງ ສ. ເກົາຫລີ. ໃນຕົ້ນປີ 2015 ລັດຖະສະພາ ສ. ເກົາຫລີ ໄດ້ພິຈາລະນາ ແລະ ຮັບຮອງ ເອົາກົດໝາຍທີ່ມີຊື່ຍາວໆວ່າ “ກົດໝາຍພິເສດວ່າດ້ວຍການຄວບຄຸມການປະພຶດ ຂອງກຸ່ມບໍລິຫານ” ກຸ່ມບໍລິຫານໃນທີ່ນີ້ໝາຍເຖິງສະມາຊິກຄອບຄົວກຸ່ມທຸລະກິດຂະໜາດໃຫຍ່ທີ່ມີອິດທິພົນ ຍ້ອນອຳນາດເງິນ.
ເຫດການທີ່ບັງຄັບໃຫ້ ມີກົດໝາຍນີ້ອອກມາແມ່ນ ຍ້ອນກໍລະນີລູກສາວປະທານບໍລິສັດສາຍການບິນ ເກົາຫລີ ຄຸມອາລົມບໍ່ຢູ່ເຖິງຂັ້ນໄດ້ໄລ່ຫົວໜ້າພະນັກງານເສີບ ໃນເຄື່ອງບິນລົງອອກຈາກຍົນ ຍ້ອນບໍ່ພໍໃຈທີ່ຜູ້ເສີບເອົາແກ່ນມາຄາເດເມຍ (Macadamia) ເປັນຖົງໃຫ້ ນາງແທນທີ່ຈະໃສ່ຈານຈົບເຈືອເຫດການຄັ້ງນັ້ນເຮັດ ໃຫ້ສາຍການບິນຖ້ຽວ ນິວຢອກ ເຊອູນ ໃນວັນທີ 5 ທັນວາ 2014 ຊັກຊາ ແລະ ສ່ຽງໄພ.
ເລື່ອງນີ້ໄດ້ສ້າງຄວາມ ບໍ່ພໍໃຈໃນທົ່ວສັງຄົມ ສ. ເກົາ ຫລີ ທີ່ເຫັນວ່າ ນາງ ໂຈຮຸນອາລູກສາວ ປະທານສາຍການ ບິນໃຊ້ອຳນາດບາດໃຫຍ່ເຮັດຕາມໃຈ. ສຸດທ້າຍນາງຄົນນີ້ ກໍຖືກສານຕັດສິນຈຳຄຸກເປັນເວລາໜຶ່ງປີ.
ເພື່ອມອດໄຟໄວ້ກ່ອນ ຫົວລົມ, ທາງການ ສ. ເກົາຫລີ ຈຶ່ງຮີບຮ້ອນສ້າງກົດໝາຍ ສະບັບນີ້ອອກມາເພື່ອຄວບຄຸມການປະພຶດກຸ່ມອຳນາດເງິນ ເຊິ່ງເມື່ອກ່ອນ ເຖິງຈະຕິດຄະດີແຕ່ກໍມັກຈະໄດ້ຮັບອະໄພຍະໂທດ, ໄດ້ຮັບໂທດ ເບົາບາງ ຫລື ບໍ່ມີການໃຫ້ຮັບໂທດຈຳຄຸກເລີຍ.
ພາຍໃຕ້ກົດໝາຍໃໝ່ນີ້ ກຸ່ມອຳນາດເງິນຈະ “ຢຶກ” ຕາມໃຈຄືເກົ່າບໍ່ໄດ້ອີກແລ້ວ ເພາະຖ້າສານຫາກຕັດສິນວ່າ ມີຄວາມຜິດແລ້ວອຳນາດເງິນກໍຈະຊ່ວຍຫຍັງພວກເຂົາບໍ່ໄດ້, ນອກຈາກຈະຮັບ ໂທດທາງອາຍາແລ້ວພວກເຂົາຍັງຈະຖືກຫ້າມຫຍຸ້ງກ່ຽວກັບທຸລະກິດເປັນເວລາ 5 ປີອີກ./.
