ຊາວລາວສະເຫລີມສະຫລອງປີໃໝ່ດ້ວຍບັນຍາກາດຟົດຟື້ນ

ການສະເຫລີມສະຫລອງສົ່ງທ້າຍປີເກົ່າ ຈສ 1380 ພສ 2561 ແລະຕ້ອນຮັບປີໃໝ່ ຈສ 1381 ພສ 2562 ແມ່ນເຕັມໄປດ້ວຍບັນຍາກາດເບີກບານມ່ວນຊື່ນ ແລະ ມີຄວາມຊຸ່ມເຢັນກັນທົ່ວໜ້າ, ໂດຍປີນີ້ຊາວລາວໄດ້ຮ່ວມກັນສະເຫລີມສະຫລອງແຕ່ວັນທີ 14-16 ເມສາ, ເຊິ່ງເປັນໂອກາດດີໃຫ້ປະຊາຊົນເຮົາໄດ້ພ້ອມພາກັນສະຫລອງປີໃໝ່ຕາມຮີດຄອງປະເພນີ ແລະ ວັດທະນະທໍາອັນດີງາມຂອງຊາດ, ບົນຈິດໃຈປະຢັດມັດທະຍັດ ແລະໄດ້ຖືເອົາໂອກາດນີ້ເປັນການໂຄສະນາເຜີຍແຜ່ຮີດຄອງປະເພນີ ແລະວັດທະນະທໍາອັນດີງາມຂອງຊາດຕິດພັນກັບການສົ່ງເສີມການທ່ອງທ່ຽວ ແລະ ສາມາດດຶງດູດນັກທ່ອງທ່ຽວເຂົ້າມາຢ້ຽມຢາມໃນປີທ່ອງທ່ຽວລາວ-ຈີນ 2019 ນີ້ນັບມື້ຫລາຍຂຶ້ນ.

ຄືດັ່ງຮູ້ນໍາກັນແລ້ວວ່າ, ການສະເຫລີມສະຫລອງປີໃໝ່ລາວປີນີ້ແມ່ນມີບັນຍາກາດຟົດຟື້ນແຕ່ຫົວທີ, ໂດຍສະເພາະນັບແຕ່ວັນທີ 12-13 ເມສາ, ບັນດາອົງການຈັດຕັ້ງພັກ-ລັດ, ລັດວິສາຫະກິດ, ບໍລິສັດ, ຫ້າງຮ້ານ, ສະຖາບັນການສຶກສາ, ໂຮງຈັກ-ໂຮງງານຕ່າງໆ ກໍໄດ້ຈັດງານລ້ຽງສົ່ງທ້າຍປີເກົ່າ ພສ 2561 ແລະຕ້ອນຮັບປີໃໝ່ ພສ 2562 ຢ່າງມີຄວາມໝາຍ ແລະ ຖືເອົາໂອກາດທີ່ເປັນສີລິມຸງຄຸນນີ້ ເພື່ອສະຫລຸບຜົນງານຂອງຕົນທີ່ຍາດມາໄດ້ໃນໄລຍະໜຶ່ງປີຜ່ານມາ ສ່ວນໃນວັນທີ 14 ເມສາ  ເປັນມື້ສັງຂານລ່ວງ, ນັບແຕ່ຕອນບ່າຍເປັນຕົ້ນໄປ ຊາວພຸດລາວໃນທົ່ວປະເທດຕ່າງກໍໄດ້ຈັດກິດຈະກໍາສໍາຄັນຕ່າງໆທາງພຸດທະສາສະໜາ ຄື: ຢູ່ຕາມວັດວາອາຮາມແຕ່ລະແຫ່ງຕ່າງກໍໄດ້ນໍາເອົາພະພຸດທະຮູບລົງປະດິດສະຖານໄວ້ທີ່ຫໍສົງ ເພື່ອເປີດໂອກາດໃຫ້ຊາວພຸດທັງຫລາຍ ແລະ ປະຊາຊົນລາວບັນດາເຜົ່າໄດ້ເຂົ້າໄປຫົດສົງຕາມຮີດຄອງປະເພນີອັນດີງາມທີ່ມີມາແຕ່ດຶກດໍາບັນ.

ສະເພາະຢູ່ນະຄອນຫລວງວຽງຈັນ ກໍໄດ້ນຳເອົາພະພຸດທະຮູບມິ່ງບ້ານມິ່ງເມືອງຄືພະພຸດທະຮູບຄຳທີ່ປະດິດສະຖານຢູ່ວັດພະທາດຫລວງລົງມາຫົດສົງໃນໂອກາດດັ່ງກ່າວນີ້ດ້ວຍ ໂດຍການເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ແລະມວນຊົນເຂົ້າຮ່ວມຢ່າງຫລວງຫລາຍ. ສໍາລັບວັນທີ15-16 ເມສາ, ບັນຍາກາດການຫລິ້ນນໍ້າຫົດສົງເຊິ່ງກັນ ແລະ ກັນກໍດໍາເນີນໄປດ້ວຍບັນຍາກາດຟົດຟື້ນໄປຄຽງຄູ່ກັບການຈັດພິທີບາສີສູ່ຂວັນ, ສົມມາຜູ້ຊົງຄຸນວຸດທິ, ພໍ່ແມ່-ເຖົ້າແກ່ອາວຸໂສ ເພື່ອສະແດງຄວາມຮູ້ບຸນຄຸນ, ຄວາມກະຕັນຍູຕໍ່ຜູ້ມີພະຄຸນ ເພື່ອສົ່ງທ້າຍປີເກົ່າ ແລະ ຕ້ອນຮັບປີໃໝ່ບົນຈິດໃຈແຫ່ງຄວາມເບີກບານມ່ວນຊື່ນ, ຮັກສາໄດ້ຮີດຄອງປະເພນີທີ່ເປັນເອກະລັກອັນດີງາມຂອງຊາດໃຫ້ຄົງຢູ່ຄູ່ຊາວພຸດເຮົາຕະຫລອດກາລະນານ.

ຂອບໃຈພາບງາມໆຈາກເພື່ອນເຟສ Anouphon Phomhaksa, Houmphet manisouk, jidmani sook