ປະເທດສິງກະໂປຈະຈຳຄຸກ 10 ປີຕໍ່ຜູ້ເຜີຍແຜ່ຂ່າວປອມ
ກົດບັດຍັດຕ້ານຂ່າວປອມຂອງສິງກະໂປ ຈະມອບສິດອຳນາດທັງໝົດໃຫ້ລັດຖະບານເປັນຜູ້ຄວບຄຸມທຸກຂໍ້ມູນຂ່າວສານຂອງສື່ສັງຄົມຕ່າງໆທັງໝົດ ແລະ ຈະລົງໂທດໜັກຕໍ່ບຸກຄົນ ແລະ ການຈັດຕັ້ງທີ່ລ່ວງລະເມີດ.
ວິທະຍຸ CNN ຂອງອາເມລິກາ ອອກມາວິພາກວິຈານແບບເຢາະເຢີ້ຍຕໍ່ສຳນັກສື່ຕ່າງໆວ່າ: ຜູ້ກໍ່ຕັ້ງ Facebook, Mark Zuckerberg ກຳລັງອອກມາສະແດງຄວາມດີໃຈຕ້ອນຮັບບົດບັນຍັດໃໝ່ ແຕ່ຄວາມໃນໃຈແລ້ວອາດບໍ່ແມ່ນແນວນັ້ນ.
ຖ້າຫາກວ່າກົດບັນຍັດໃໝ່ຖືກຮັບຮອງຈາກສະພາ, ລັດຖະບານຈະມີອຳນາດປັບໃໝ Facebook ແລະ ສື່ສັງຄົມອື່ນໆຢ່າງໜັກ, ຖ້າພວກເຂົາບໍ່ປະຕິບັດຕາມຄຳສັ່ງຂອງອຳນາດການປົກຄອງໃນການກວດກາເນື້ອໃນຂ່າວ, ການຕີແຜ່ຂ່າວບໍ່ມີຄວາມຈິງ ໂດຍສະເພາະແມ່ນຂ່າວທີ່ສ້າງຄວາມເສຍຫາຍຕໍ່ຄວາມໝັ້ນຄົງຂອງຊາດ, ຄວາມສະຫງົບທາງສັງຄົມ, ຄວາມປອດໄພຂອງສາທາລະນະ ຫລື ແຕະຕ້ອງເຖິງຄວາມສຳພັນຂອງສິງກະໂປກັບປະເທດຕ່າງໆໃນໂລກ.
ຖ້າບຸກຄົນໃດຫາກຝ່າຝືນກົດບັນຍັດດັ່ງກ່າວຈະຖືກປັບໄໝເປັນເງິນສູງເຖິງ 36.000 ໂດລາສະຫະລັດ ແລະ ຈຳຄຸກບໍ່ກາຍ 5 ປີ. ຖ້າເປັນຂ່າວປອມທີ່ບໍ່ໄດ້ລະບຸຊື່ ຈະຖືກປັບໄໝ 73.000 ໂດລາສະຫະລັດ ແລະ ຈຳຄຸກສູງສຸດ 10 ປີ.
ບັນດາບໍລິສັດ ດັ່ງ Facebook ຖ້າຖືກກ່າວຫາວ່າຕີແຜ່ຂ່າວປອມກໍຈະຖືກປັບໃໝຫລາຍເຖິງ 735.000 ໂດລາສະຫະລັດ. ແນວໃດຈຶ່ງເອີ້ນວ່າ: ຂ່າວປອມ ? ແມ່ນຂຶ້ນກັບລັດຖະບານສິງກະໂປເປັນຜູ້ຕັດສິນ ແລະ ວາງຮູບການລົງໂທດທີ່ເໝາະສົມ ນັບທັງການດັດແປງຂ່າວ, ລຶບບົດຂຽນ ຈະຖືກຮ້ອງຟ້ອງຂຶ້ນສານທັນທີ.
# ລູກເມືອງພວນ, ຈາກຂ່າວ vnexpress.net, 9/4
