ບໍລິສັດໃນເຄືອກູເກິລໃຫ້ບໍລິການສົ່ງສິນຄ້າ ດ້ວຍໂດຣນຄັ້ງທຳອິດໃນໂລກຢູ່ອົດສະຕຣາລີ
ວິງ ຂອງບໍລິສັດອັລຟາເບດ ເຊິ່ງເປັນບໍລິສັດແມ່ຂອງກູເກິລ ເລີ່ມບໍລິການສົ່ງສິນຄ້າເປັນຄັ້ງທຳອິດໃນໂລກຢູ່ອົດສະຕຣາລີ ຫລັງຈາກທົດລອງບິນມາຫລາຍປີ.
ວິງ ຈະສົ່ງອາຫານ, ກາເຟ ແລະ ຢາ ໄປເຮືອນປະມານ 100 ຫລັງໃນນະຄອນຫລວງແຄນເບີຣາ, ບໍລິສັດເລີ່ມທົດລອງບິນສົ່ງເຄື່ອງດ້ວຍໂດຣນມາແຕ່ປີ 2014 ແລ້ວ, ແຕ່ຜູ້ອາໄສຢູ່ໃນພື້ນທີ່ຫລາຍຄົນຕຳໜິເລື່ອງສຽງລົບກວນ.
ບໍລິສັດລະບຸວ່າ: ສຽງຕອບຮັບທີ່ໄດ້ລະຫວ່າງການທົດລອງບິນຖືເປັນສິ່ງມີຄ່າ ແລະ ພວກເຂົາຫວັງວ່າ: “ບົດສົນທະນາ” ທຳນອງນີ້ຈະດຳເນີນຕໍ່ໄປ.
ສຳນັກງານການບິນພົນລະເຮືອນອົດສະຕຣາລີອະນຸຍາດໃຫ້ວິງເລີ່ມສົ່ງສິນຄ້າ ຫລັງຈາກກວດສອບປະຫວັດຄວາມປອດໄພ ແລະ ແຜນດຳເນີນທຸລະກິດຂອງບໍລິສັດແລ້ວ ແລະ ຕັດສິນໃຈວ່າການດຳເນີນງານຂອງບໍລິສັດບໍ່ສ້າງຄວາມສ່ຽງຕໍ່ຜູ້ຢູ່ອາໄສ ແລະ ເຮືອບິນອື່ນໆຢູ່ນ່ານຟ້າ.
ໂດຣນຂອງບໍລິສັດຈະນຳສິນຄ້າອັນນ້ອຍໆໄປຢ່ອນລົງບໍລິເວນໜ້າເຮືອນຂອງລູກຄ້າ. ເຖິງຢ່າງໃດກໍຕາມ ໃບອະນຸຍາດນີ້ມາພ້ອມກັບເງື່ອນໄຂຫລາຍປະກາດຄື: ຈະບິນໄດ້ສະເພາະຕອນກາງເວັນ ແລະ ຫລັງ 8 ໂມງເຊົ້າໃນທ້າຍອາທິດ ແລະ ຈະບໍ່ບິນເໜືອຝູງຊົນ ແລະ ຖະໜົນສາຍຫລັກນຳອີກ.
ຜ່ານມາ ຄົນໃນພື້ນທີ່ຮ້ອງຮຽນເລື່ອງສຽງດັງລົບກວນ ໂດຍບອກວ່າ: ໃນຂະນະທີ່ໂດຣນຫລຸດລະດັບລົງເພື່ອສົ່ງເຄື່ອງ ສຽງດັງຄືເຄື່ອງດູດຝຸ່ນ, ໃນເວລາຕໍ່ມາ ບໍລິສັດໄດ້ແກ້ບັນຫາ ດ້ວຍການພັດທະນາໂດຣນທີ່ບິນດ້ວຍສຽງເບົາກວ່າເກົ່າ ແລະ ສຳນັກງານການບິນພົນລະເຮືອນອົດສະຕຣາລະບຸວ່າ: ວິງຕ້ອງໃຊ້ໂດຣນຮຸ່ນນີ້ໃນການສົ່ງເຄື່ອງເທົ່ານັ້ນ.
