ອິນໂດເນເຊຍ-ມາເລເຊຍ ຄັດຄ້ານ EU ຖອດນ້ຳມັນປາມຈາກເຊື້ອໄຟໝູນວຽນ
ປະທານາທິບໍດີ ໂຈໂກ ວິໂດໂດ ແຫ່ງອິນໂດເນເຊຍ ແລະ ທ່ານ ມະຫາເທ ໂມຮຳໝັດ ນາຍົກລັດຖະມົນຕີມາເລເຊຍ ໄດ້ລົງນາມໃນຈົດໝາຍຮ່ວມກັນ ເພື່ອປະຕິເສດແຜນຂອງສະຫະພາບເອີຣົບ (EU) ທີ່ຕ້ອງການຈະກຳນົດໃຫ້ນ້ຳມັນຟາມດິບບໍ່ຢູ່ໃນລາຍການວັດຖຸດິບສຳລັບເຊື້ອໄຟຊີວະພາບ.
ສຳນັກຂ່າວຊິນຮົວລາຍງານວ່າ: ການເຄື່ອນໄຫວດັ່ງກ່າວເກີດຂຶ້ນຫລັງຈາກຄະນະກຳມາທິການເອີຣົບໄດ້ຜ່ານກົດໝາຍທີ່ກຳນົດໃຫ້ນ້ຳມັນປາມດິບບໍ່ແມ່ນຜະລິດຕະພັນທີ່ຍືນຍົງ ເຊິ່ງຈະເຮັດໃຫ້ມີການຍົກເວັ້ນນ້ຳມັນປາມດິບຈາກລາຍການວັດຖຸດິບທີ່ໃຊ້ກັບເຊື້ອໄຟສຳລັບການຂົນສົ່ງ ແລະ ເປັນມິດຕໍ່ສິ່ງແວດລ້ອມ ໂດຍກົດໝາຍສະບັບນີ້ຈະຖືກສົ່ງໃຫ້ລັດຖະສະພາເອີຣົບພິຈາລະນາ ແລະ ຕັດສິນພາຍໃນໄລຍະເວລາ 2 ເດືອນວ່າ: ຈະມີການບັງຄັບໃຊ້ກົດໝາຍນີ້ ຫລື ບໍ່ ພາຍໃນປີ 2020.
ລັດຖະມົນຕີຝ່າຍປະສານງານກິດຈະການທາງນ້ຳຂອງອິນໂດເນເຊຍ ກ່າວວ່າ: ໃນວັນທີ 8 ເມສາ, ປະທານາທິບໍດີ ໄດ້ລົງນາມໃນຈົດໝາຍ ເພື່ອຄັດຄ້ານຮ່ວມກັນກັບນາຍົກລັດຖະມົນຕີ ມະຫາເທ ກ່ຽວກັບການປະຕິເສດແຜນຂອງ EU ໃນການສັ່ງຫ້າມຜະລິດຕະພັນນ້ຳມັນປາມດິບທົ່ວໂລກ ແລະ ຈົດໝາຍດັ່ງກ່າວໄດ້ຖືກສົ່ງໄປ EU ແລ້ວໃນທ້າຍອາທິດຜ່ານມາ.
