ກະຊວງການເງິນແຕ່ງຕັ້ງ ແລະ ສັບຊ້ອນບາງກົມກອງຄືນໃໝ່
ໃນວັນທີ 29 ມີນາ 2019 ທີ່ກະຊວງການເງິນ, ໄດ້ຈັດພິທີປະກາດການຈັດຕັ້ງ ປະຕິບັດນະໂຍບາຍຕໍ່ພະນັກ ງານຂັ້ນນຳກະຊວງການເງິນອອກພັກຜ່ອນ-ຮັບອຸດໜູນບໍານານ ແລະ ປະກາດການຈັດຕັ້ງຂັ້ນຫົວໜ້າກົມ, ຮັກສາສາການຫົວໜ້າກົມ, ຮອງຫົວໜ້າກົມ, ຮອງຫົວໜ້າຫ້ອງການກະຊວງການເງິນ; ພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີຫົວໜ້າຫ້ອງການກະຊວງ, ຫົວໜ້າກົມ ພ້ອມດ້ວຍພະນັກງານຫຼັກແຫຼ່ງຂະແໜງການການເງິນເຂົ້າຮ່ວມ.
ໂອກາດດັ່ງກ່າວ,ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ຜ່ານດໍາລັດຂອງນາຍົກລັດຖະມົນຕີ ສະບັບເລກທີ 38/39/40/07/ນຍ, ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດ ໜູນບໍານານຈໍານວນ 4 ທ່ານ, ປະກອບມີ: ທ່ານ ສີລາ ວຽງແກ້ວ ກໍາມະການຄະນະພັກກະຊວງ ຮອງລັດຖະມົນຕີກະຊວງການເງິນ, ທ່ານ ຄຸນຍົນ ຄໍາມະນີ ກຳມະການປະຈໍາພັກກະຊວງ ຫົວໜ້າກົມຈັດຕັ້ງ ແລະ ພະນັກງານ, ທ່ານ ສັງວອນ ພັນທະວິໄລ ກໍາມະການຄະນະພັກກະຊວງ, ຫົວໜ້າກົມງົບປະມານແຫ່ງລັດ, ທ່ານ ຈັນທະສິດ ເສນາພັນ ຫົວໜ້າກົມບັນຊີ ກະຊວງການເງິນ ແລະ ອີງຕາມດໍາລັດຂອງນາຍົກລັດຖະມົນຕີ ເລກທີ 348/ນຍ ວ່າດ້ວຍການແຕ່ງຕັ້ງ ທ່ານ ນາງ ດາວອນ ທອງຈັນ ເປັນຫົວໜ້າກົມບັນຊີ ກະຊວງການເງິນ.
ພ້ອມດຽວກັນນີ້, ຍັງໄດ້ປະກາດແຕ່ງຕັ້ງຜູ້ຮັກສາການຊົ່ວຄາວຂັ້ນຫົວໜ້າກົມ, ອີງຕາມຂໍ້ຕົກລົງຂອງກະຊວງການເງິນ ສະບັບເລກທີ 0829/0830/0869/ກງ, ໂດຍໄດ້ແຕ່ງຕັ້ງ ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານ ເປັນຜູ້ຮັກສາການຊົ່ວຄາວຫົວໜ້າກົມຈັດຕັ້ງ ແລະ ພະນັກງານ, ແຕ່ງຕັ້ງ ທ່ານ ພູວົງ ກິດຕະວົງ ຮອງຫົວໜ້າກົມງົບປະມານແຫ່ງລັດ ເປັນຮັກສາການຊົ່ວຄາວຫົວໜ້າກົມງົບປະມານແຫ່ງລັດ, ແຕ່ງຕັ້ງທ່ານ ນາງ ຄໍາຂວັນ ສີຊານົນ ຫົວໜ້າພະແນກແຜນການ ແລະ ການເງິນ ຫ້ອງການກະຊວງ ເປັນຮອງຫົວໜ້າຫ້ອງການກະຊວງການເງິນ ແລະ ອີງຕາມຂໍ້ຕົກລົງຂອງກະຊວງການເງິນ ສະບັບເລກທີ 0691/0828/ກງ, ວ່າດ້ວຍການຍົກຍ້າຍແຕ່ງຕັ້ງພະນັກງານໄປຮັບໜ້າທີ່ໃໝ່ຢູ່ກົມສະສົມແຫ່ງລັດ, ເຫັນດີຍົກຍ້າຍ ແລະ ແຕ່ງຕັ້ງທ່ານ ສໍາເພົາ ເລົາສີ ຮອງຫົວໜ້າຫ້ອງການກະຊວງການເງິນ ເປັນຮອງຫົວໜ້າກົມສະສົມແຫ່ງລັດ, ຍົກຍ້າຍແຕ່ງຕັ້ງທ່ານ ປອ ນາງ ພິລານີ ພິດສະໄໝ ຮັກສາການຫົວໜ້າກົມບັນຊີ ເປັນຮອງຫົວໜ້າກົມນະໂຍບາຍການເງິນ ແລະ ນິຕິກໍາ ກະຊວງການເງິນ, ອີງຕາມມະຕິຕົກລົງຂອງຄະນະບໍລິຫານງານພັກກະຊວງການເງິນ ສະບັບເລກທີ 029/ຄລພ.ກງ, ລົງວັນທີ 18 ມີນາ 2019 ວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກກົມບັນຊີເຫັນດີບົ່ງຕົວແຕ່ງຕັ້ງສະຫາຍ ນາງ ດາວອນ ທອງຈັນ ເປັນເລຂາໜ່ວຍພັກກົມບັນຊີ ນຳອີກດ້ວຍ.
ໂອກາດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ກຽດໂອ້ລົມຕໍ່ ພະນັກງານທີ່ໄດ້ອອກພັກການ-ຮັບອຸດໜູນບໍານານ ແລະ ການແຕ່ງຕັ້ງໜ້າທີ່ໃໝ່ຈໍານວນໜຶ່ງ, ພ້ອມທັງສະແດງຄວາມຂອບໃຈໃນໄລຍະຜ່ານຜ່າບັນດາສະຫາຍໄດ້ປະຕິບັດໜ້າທີ່ວຽກງານຕ່າງໆ… ດ້ວຍຈິດດ້ວຍໃຈດ້ວຍຄວາມຮັບຜິດຊອບ ແລະ ມີຜົນງານ, ບັນດາພະນັກງານທີ່ໄດ້ຮັບການອູດໜູນບໍານານໃນຄັ້ງເຖິງຈະບໍານານແລ້ວກໍ່ສາມາດສ່ອງແສງມີຄໍາຄິດຄໍາເຫັນອັນລວມ ຫຼື ອັນສະເພາະເຈາະຈົງຂອງແຕ່ລະບຸກຄົນ, ພ້ອມຮັບເອົາການ ຕໍານິສົ່ງຂ່າວການສ່ອງແສງຂອງພະນັກງານ-ລັດຖະກອນ, ຊ່ວຍຕິດຕາມສະພາບການປະຕິບັດວຽກງານຂອງຂະແໜງ ການເງິນໃຫ້ໄດ້ຮັບການປັບປຸງດີຂຶ້ນ.
