ໂມຊຳບິກພົບຜູ້ເສຍຊີວິດຄົນທຳອິດ ຈາກອະຫິວານັບແຕ່ພາຍຸພັດຖະຫລົ່ມ
ລັດຖະບານໂມຊຳບິກລາຍງານການພົບຜູ້ເສຍຊີວິດຄົນທຳອິດຢ່າງເປັນທາງການຈາກພະຍາດອະຫິວາທີ່ເປັນຜົນມາຈາກພາຍຸໄຊໂຄນໄອດາຍ ເຊິ່ງພັດຖະຫລົ່ມໃນກາງເດືອນຜ່ານມາ ສົ່ງຜົນໃຫ້ມີຜູ້ເສຍຊີວິດຈຳນວນຫລາຍ ແລະ ເກີດພະຍາດລະບາດຕາມມາ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງໂມຊຳບິກລາຍງານໃນວັນທີ 31 ມີນາຜ່ານມາ ເລື່ອງການພົບຜູ້ເສຍຊີວິດຄົນທຳອິດຈາກພະຍາດອະຫິວາ ຢູ່ເມືອງເບຣາ ທາງຕອນກາງຂອງປະເທດ ເຊິ່ງເປັນພື້ນທີ່ໄດ້ຮັບຄວາມເສຍຫາຍຫລາຍທີ່ສຸດຈາກອິດທິພົນຂອງພາຍຸໄຊໂຄນໄອດາຍ (Idai) ເຊິ່ງສ້າງຄວາມເສຍຫາຍຢ່າງໜັກໃຫ້ແກ່ໂມຊຳບິກ ແລະ ປະເທດໃກ້ຄຽງ ຄືຊິມບຳເວ ແລະ ມາລາວີ ໃນກາງເດືອນມີນາຜ່ານມາ ໂດຍຈຳນວນຜູ້ເສຍຊີວິດລວມທັງສາມປະເທດມີທ່າອ່ຽງເຖິງ 1.000 ຄົນ ຫລື ອາດຫລາຍກວ່ານັ້ນ.
ທັງນີ້ ລາຍງານລະບຸວ່າ: ຈຳນວນຜູ້ປ່ວຍຈາກພະຍາດອະຫິວາ ໂດຍສະເພາະຢູ່ຊິມບຳເວເພີ່ມຂຶ້ນຫລາຍກວ່າ 2 ເທົ່າ ຈາກ 217 ຄົນໃນວັນທີ 30 ມີນາຜ່ານມາ ເປັນຢ່າງໜ້ອຍ 517 ຄົນໃນວັນທີ 31 ມີນາຜ່ານມາ ແລະ ທຸກຝ່າຍທີ່ກ່ຽວຂ້ອງເຊື່ອວ່າຈຳນວນຜູ້ຕິດເຊື້ອຈະເພີ່ມຂຶ້ນອີກ.
ອົງການອະນາໄມໂລກ (WHO) ຢືນຢັນວ່າ: ວັກແຊັງປ້ອງກັນພະຍາດອະຫິວາຊຸດທຳອິດຈຳນວນ 900.000 ໂດສ ຈະເດີນທາງເຖິງໂມຊຳບິກໃນຕົ້ນອາທິດນີ້ ແລະ ເຈົ້າໜ້າທີ່ຈະລົງພື້ນທີ່ແຈກຢາຍທັນທີ, ສ່ວນອົງການແພດໄຮ້ພົມແດນ (MSF) ເລັ່ງສົ່ງວັກແຊັງ ພ້ອມເຈົ້າໜ້າທີ່ມາສົມທົບ. ນອກຈາກນີ້ ຍັງຮ່ວມມືໃນການສ້າງສູນຊົ່ວຄາວຮ່ວມກັບສະຫະປະຊາຊາດ (UN) ນຳອີກ.
