ແກ້ໄຂຮ້ານອາຫານໃນຕົວເມືອງເຄື່ອນໄຫວຜິດລະບຽບ

ທ້າຍອາທິດຜ່ານມາ, ຕຳຫລວດສະກັດກັ້ນ ແລະ ຕ້ານການຄ້າມະນຸດນະຄອນຫລວງວຽງຈັນ, ໄດ້ລົງກວດກາແກ້ໄຂບັນດາຮ້ານອາຫານທີ່ເຄື່ອນໄຫວໃຫ້ບໍລິການບໍ່ຖືກຕ້ອງຕາມລະບຽບກົດໝາຍໃນເຂດເມືອງຫາດຊາຍຟອງ, ໄຊທານີ, ສີສັດຕະນາກ ແລະ ເມືອງສີໂຄດຕະບອງ ແລະ ສາມາດພົບເຫັນຈໍານວນ 6 ແຫ່ງທີ່ມີການແອບແຝງຄ້າໂສເພນີ, ໂດຍພົບຍິງສາວເປັນຈໍານວນຫລາຍຄົນພັກອາໄສຢູ່ພາຍໃນຮ້ານອາຫານຈໍານວນດັ່ງກ່າວ.

ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ເປັນເຈົ້າຂອງຮ້ານຮັບສາລະພາບວ່າ: ພວກຕົນໄດ້ມາເຊົ່າສະຖານທີ່ຕ່າງໆແລ້ວເປີດເປັນຮ້ານບໍລິການກິນດື່ມ, ໂດຍໄດ້ເອົາຍິງສາວຈາກຕ່າງແຂວງມາເປັນພະນັກງານບໍລິການເສີບປະຈໍາຢູ່ຮ້ານ, ໂດຍໃຫ້ພັກເຊົາຢູ່ກັບຮ້ານເລີຍ ແລະ ບໍ່ໄດ້ໃຫ້ເງິນເດືອນເຂົາເຈົ້າ, ເຊິ່ງແຕ່ລະວັນແມ່ນຈະໃຫ້ຍິງສາວນັ່ງນຳແຂກທີ່ມາໃຊ້ບໍລິການຄັ້ງລະ 10 ພັນກີບຕໍ່ໂຕະ ແລະ ຈະເກັບຄ່າອອກຮ້ານເມື່ອແຂກເອົາຍິງສາວອອກໄປນອກຮ້ານໃນລາຄາ 30.000-100.000 ກີບຕໍ່ຄັ້ງ.

ຜ່ານການລົງແກ້ໄຂຄັ້ງນີ້, ເຈົ້າໜ້າທີ່ໄດ້ກັກຕົວເຈົ້າຂອງຮ້ານ 3 ແຫ່ງໄປດໍາເນີນຄະດີຕາມລະບຽບກົດໝາຍໃນຂໍ້ຫາຄ້າຂາຍໂສເພນີຜິດຕໍ່ລະບຽບກົດໝາຍ ແລະ ຮີດຄອງປະເພນີ. ສ່ວນຍິງສາວທັງໝົດແມ່ນໄດ້ເອົາຕົວໄປສຶກສາອົບຮົມແລ້ວສົ່ງຄືນຜູ້ປົກຄອງນໍາໄປສຶກສາອົບຮົມຕື່ມອີກ.  ທ່ານຮອງຫົວໜ້າຫ້ອງຕຳຫລວດນະຄອນຫລວງວຽງຈັນ ກ່າວວ່າ: ບັນຫາຄ້າປະເວນີແມ່ນປະກົດການຫຍໍ້ທໍ້ໜຶ່ງຂອງສັງຄົມ, ສ້າງຄວາມບໍ່ເປັນລະບຽບຮຽບຮ້ອຍ ແລະ ນຳເອົາພະຍາດຕິດຕໍ່ທາງເພດຕ່າງໆມາແຜ່ລະບາດໃນສັງຄົມ. ນອກນີ້ຍັງເປັນບັນຫາເຮັດໃຫ້ຄອບຄົວເກີດຄວາມແຕກແຍກ ແລະ ບັນຫາທີ່ສ້າງຄວາມບໍ່ສະຫງົບອື່ນໆໃນສັງຄົມຕາມມາ. ສະນັ້ນ ຈຶ່ງຮຽກຮ້ອງມາຍັງພໍ່ແມ່ປະຊາຊົນ ຈົ່ງເອົາໃຈໃສ່ສຶກສາອົບຮົມລູກຫລານຂອງຕົນໃຫ້ເຮັດວຽກທີ່ບໍ່ຜິດຮີດຄອງປະເພນີ ແລະ ລະບຽບກົດໝາຍ, ພ້ອມທັງມີສະຕິລະວັງເພື່ອບໍ່ໃຫ້ຕົກເປັນເຫຍື່ອຂອງຂະບວນການຄ້າມະນຸດໂດຍເດັດຂາດ.