ນະຄອນຫລວງຈະປັບໃໝ 20 ເທົ່າຕໍ່ຜູ້ລະເມີດລະບຽບຈະລາຈອນ
ນັບແຕ່ວັນທີ 1 ເມສານີ້, ນະຄອນຫລວງວຽງຈັນຈະເລີ່ມປັບໃໝ 20 ເທົ່າຕໍ່ຜູ້ລະເມີດລະບຽບຈະລາຈອນ ວ່າດ້ວຍມາດຕະການຫລຸດຜ່ອນອຸປະຕິເຫດ ແລະ ຮັກສາຄວາມປອດໄພຕາມຖະໜົນທົ່ວນະຄອນຫລວງວຽງຈັນ ເລກທີ 1323/ຈນວ, ລົງວັນທີ 21 ທັນວາ 2018 ແລະ ມາດຕາ 5 ຂອງດຳລັດວ່າດ້ວຍການປັບໃໝຕໍ່ຜູ້ລະເມີດກົດໝາຍການຈະລາຈອນທາງບົກ ແລະ ການປົກປັກຮັກສາທາງຫລວງ ເລກທີ 188/ນຍ ແລະ ຕາມມາດຕາ 2 ຂອງມະຕິກອງປະຊຸມສະໃໝສາມັນເທື່ອທີ 4 ຂອງສະພາປະຊາຊົນນະຄອນຫລວງວຽງຈັນ ຊຸດທີ I ສະບັບເລກທີ 028/ສປນວ, ລົງວັນທີ 6 ກັນຍາ 2018 ເຊິ່ງໄດ້ລະບຸໄວ້ວ່າ:
– ຄັ້ງທີ 1 ໃຫ້ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 1 ເດືອນ ແລະ ປັບໃໝຕາມປະເພດລົດດັ່ງນີ້: ລົດຖີບ 10.000 ກີບ; ລົດຈັກ, 3 ລໍ້ຕິດເຄື່ອງຈັກ, ລົດໄຖນາເດີນຕາມ 50.000 ກີບ; ລົດເບົາ: ລົດເກັງ, ກະບະ, ຈິບ, ຕູ້ 100.000 ກີບ; ລົດໂດຍສານ 4 ລໍ້ 250.000 ກີບ; ລົດບັນທຸກ 6 ລໍ້ຂຶ້ນໄປ 500.000 ກີບ; ລົດໂດຍສານ (ລົດບັດ) 1.000.000 ກີບ.
– ຄັ້ງທີ 2 ໃຫ້ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 3 ເດືອນ ແລະ ປັບໃໝ 10 ເທົ່າຕາມປະເພດລົດດັ່ງນີ້: ລົດຖີບ 100.000 ກີບ; ລົດຈັກ, ລົດ 3 ລໍ້ຕິດເຄື່ອງຈັກ, ລົດໄຖນາເດີນຕາມ 500.000 ກີບ; ລົດເບົາ: ລົດເກັງ, ກະບະ, ຈິບ, ຕູ້ 1.000.000 ກີບ; ລົດໂດຍສານ 4 ລໍ້ 2.500.000 ກີບ; ລົດບັນທຸກ 6 ລໍ້ຂຶ້ນໄປ 5.000.000 ກີບ; ລົດໂດຍສານ (ລົດບັດ) 10.000.000 ກີບ.
– ຄັ້ງທີ 3 ໃຫ້ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 6 ເດືອນ ແລະ ປັບໃໝ 20 ເທົ່າຕາມປະເພດລົດດັ່ງນີ້: ລົດຖີບ 200.000 ກີບ; ລົດຈັກ, ລົດ 3 ລໍ້ຕິດເຄື່ອງຈັກ, ລົດໄຖນາເດີນຕາມ 5.000.000 ກີບ; ລົດເບົາ: ລົດເກັງ, ກະບະ, ຈິບ, ຕູ້ 2.000.000 ກີບ; ລົດໂດຍສານ 4 ລໍ້ 5.000.000 ກີບ; ລົດບັນທຸກ 6 ລໍ້ຂຶ້ນໄປ 10.000.000 ກີບ; ລົດໂດຍສານ (ລົດບັດ) 20.000.000 ກີບ. – ຄັ້ງທີ 4 ໃຫ້ຂຽນໃບຮັບສາລະພາບລະເມີດກົດຈະລາຈອນ, ຢຶດໃບຂັບຂີ່ເລີຍ ຮອດ 1 ປີຈຶ່ງອະນຸຍາດໃຫ້ເສັງໃບຂັບຂີ່ຄືນໃໝ່ ແລະ ປັບໃໝ 20 ເທົ່າຕາມປະເພດລົດດັ່ງນີ້: ລົດຖີບ 200.000 ກີບ, ລົດຈັກ, ລົດ 3 ລໍ້ຕິດເຄື່ອງຈັກ, ລົດໄຖນາເດີນຕາມ 5.000.000 ກີບ; ລົດເບົາ: ລົດເກັງ, ກະບະ, ຈິບ, ຕູ້ 2.000.000 ກີບ; ລົດໂດຍສານ 4 ລໍ້ 5.000.000 ກີບ; ລົດບັນທຸກ 6 ລໍ້ຂຶ້ນໄປ 10.000.000 ກີບ; ລົດໂດຍສານ (ລົດບັດ) 20.000.000 ກີບ.
