ເຄືອຂ່າຍຄອມພິວເຕີພາຍໃນຂອງກະຊວງປ້ອງກັນປະເທດ ແອັສປາຍຖືກເຈາະຂໍ້ມູນ (ຖືກແຮັກຂໍ້ມູນ)
ອີງຕາມຂ່າວສານຂອງປະເທດແອັສປາຍໃຫ້ຮູ້ວ່າ: ວັນທີ 26 ມີນານີ້, ເຄືອຂ່າຍຄອມພິວເຕີພາຍໃນຂອງກະຊວງປ້ອງກັນປະເທດແອັສປາຍຖືກໄວຣັສບຸກລຸກເຈາະເອົາຂໍ້ມູນລັບທາງການທະຫານຂອງປະເທດນີ້.
ໜັງສືພິມລາຍວັນຂອງຍີ່ປຸ່ນ EI Pais ໃຫ້ຮູ້ຜົນການກວດກາກ່ຽວກັບບັນຫານີ້ວ່າ: ໄວຣັສຄອມພິວເຕີດັ່ງກ່າວປາກົດວ່າຖືກສົ່ງມາທາງຈົດໝາຍເອເລັກໂຕຣນິກ (ອີເມວ) ແລະ ຖືກພົບເຫັນໃນຕົ້ນເດືອນມີນານີ້, ແຕ່ວ່າໄວຣັສດັ່ງກ່າວອາດຈະມີມາກ່ອນໜ້ານີ້ແລ້ວຫລາຍເດືອນ ແຕ່ຫາກບໍ່ພົບເຫັນມັນ.
ເຄືອຂ່າຍຄອມພິວເຕີພາຍໃນຂອງກະຊວງປ້ອງກັນປະເທດແອັສປາຍປັດຈຸບັນມີ 50.000 ຄົນນຳໃຊ້.
Microsoft ໄດ້ພົບເຫັນການບຸກລຸກຂອງໄວຣັສເຂົ້າໃສ່ອົງການຈັດຕັ້ງການເມືອງມາຫລາຍຄັ້ງແລ້ວ.
ອີງຕາມ EI Pais ເຖິງແມ່ນວ່າເຄືອຂ່າຍຄອມພິວເຕີພາຍໃນຂອງກະຊວງດັ່ງກ່າວຈະບໍ່ມີຂໍ້ມູນລັບກໍຕາມ, ແຕ່ກໍມີຄວາມເປັນຫ່ວງວ່າ: ໄວຣັສດັ່ງກ່າວອາດຈະບຸກລຸກເຄືອຂ່າຍອື່ນໆມາແລ້ວ ເຊິ່ງມີຈຸດປະສົງຢາກເຈາະເອົາຂໍ້ມູນລັບທີ່ພົວພັນເຖິງເຕັກໂນໂລຊີສູງທາງດ້ານການທະຫານ.
ພ້ອມດຽວກັນນັ້ນ ຍັງໃຫ້ຮູ້ວ່າ: ການກວດກາມາເຖິງປັດຈຸບັນນີ້ຍັງບໍ່ທັນສາມາດພົບເຫັນຜູ້ບຸກລຸກຕົວຈິງ, ແຕ່ມີຄວາມສົງໄສວ່າ: ອາດຈະມີປະເທດໃດປະເທດໜຶ່ງຢູ່ເບື້ອງຫລັງກໍອາດເປັນໄປໄດ້. ປັດຈຸບັນ ກະຊວງປ້ອງກັນປະເທດແອັສປາຍຍັງບໍ່ມີຄຳຄິດເຫັນຫຍັງກ່ຽວກັບເລື່ອງດັ່ງກ່າວ.
