ໄທຈະສົ່ງເສີມການຄ້າ ແລະ ການລົງທຶນກັບແຂວງໄຊຍະບູລີ
ໃນວັນທີ 15 ມີນານີ້, ຫໍການຄ້າ ແຫ່ງຣາສະອານາຈັກໄທ ນໍາໂດຍ ທ່ານ ກະລິນ ສາຣະສິນ ປະທານກໍາມະການຫໍການຄ້າດັ່ງກ່າວໄດ້ຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ, ໂດຍມີຈຸດປະສົງເພື່ອຮັດແໜ້ນສາຍພົວພັນມິດຕະພາບ ແລະ ການຮ່ວມມືສອງຝ່າຍເວົ້າລວມ, ເວົ້າສະເພາະແມ່ນແຂວງໄຊຍະບູລີ ໃນດ້ານການຄ້າ, ການລົງທຶນ ແລະ ການທ່ອງທ່ຽວ ແລະ ທັງເປັນການແລກປ່ຽນວັດທະນະທໍາອັນດີງາມລະຫວ່າງສອງປະເທດ.
ໃນໂອກາດດັ່ງກ່າວ, ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ໄດ້ລາຍງານສະພາບການຮ່ວມມືລະຫວ່າງແຂວງໄຊຍະບູລີ ແລະ ບັນດາແຂວງຂອງໄທທີ່ມີຊາຍແດນຕິດກັບແຂວງໄຊຍະບູລີ ແລະ ໄດ້ລາຍງານສະພາບຈຸດພິເສດ, ການພັດທະນາ, ການຄ້າ ແລະ ການທ່ອງທ່ຽວຂອງແຂວງ ໃຫ້ຊາບວ່າ: ປັດຈຸບັນ, ສະພາບເສັ້ນທາງຄົມມະນາຄົມໃນແຂວງໄຊຍະບູລີແມ່ນໄດ້ຮັບການພັດທະນາຍົກລະດັບດີຂຶ້ນ, ເປັນຈຸດເຊື່ອມຕໍ່ບໍລິການທາງຜ່ານກັບບັນດາແຂວງພາກເໜືອ, ເຂົ້າສູ່ເມືອງມໍລະດົກໂລກຫລວງພະບາງ ແລະ ອອກສູ່ດ່ານບໍ່ເຕັນ-ບໍ່ຫານ ສປ ຈີນ ແລະ ດ່ານປາງຫົກ-ໄຕຈ່າງ ສສ ຫວຽດນາມ. ໃນໄລຍະຜ່ານມາ, ລາວ-ໄທ ແມ່ນມີສາຍພົວພັນແບບບ້ານໃກ້ເຮືອນຄຽງທີ່ດີຕໍ່ກັນ ນັບແຕ່ລະດັບປະເທດຈົນເຖິງລະດັບທ້ອງຖິ່ນເຊັ່ນ: ກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ແຂວງໄຊຍະບູລີ-ຈັງຫວັດພະ ເຍົາ, ແຂວງໄຊຍະບູລີ-ຈັງຫວັດນ່ານ, ແຂວງໄຊຍະບູລີ-ຈັງຫວັດເລີຍ ແລະ ແຂວງໄຊຍະບູລີ-ຈັງຫວັດອຸດຕະຣະດິດ ໄດ້ຈັດຂຶ້ນເປັນປະຈໍາ, ພ້ອມດຽວກັນນັ້ນ, ແຂວງໄຊຍະບູລີ ຍັງໄດ້ສ້າງເງື່ອນໄຂໃຫ້ຂະແໜງການ ແລະ ທ້ອງຖິ່ນມີການພົບປະແລກປ່ຽນດ້ານການຄ້າ (ການຄ້າຊາຍແດນ), ກິລາ, ສິລະປະວັດທະນະທຳ, ການຝຶກອົບຮົມດ້ານວິຊາການສາທາລະນະສຸກ ແລະ ຂະແໜງຕ່າງໆ ຕາມຂອບການຮ່ວມມື ASEAN, ACMECS, GMS ແລະ ສົນທິສັນຍາທະວີພາຄີ ເຮັດໃຫ້ການຄ້າຊາຍແດນໄດ້ຮັບການປັບປຸງດີຂຶ້ນເປັນກ້າວໆ.
