ເຈົ້າໜ້າທີ່ເລັ່ງແກ້ໄຂສະພາບການສັນຈອນແອອັດ
ປັດຈຸບັນ ສະພາບການສັນຈອນຕາມທ້ອງຖະໜົນໃນນະຄອນ ຫລວງວຽງຈັນ ມີສະພາບແອອັດຫລາຍ, ເນື່ອງຈາກພາຫະນະເພີ່ມຂຶ້ນເປັນຕົ້ນແມ່ນຊົ່ວໂມງເລັ່ງດ່ວນ ເລີ່ມແຕ່ 7:30-8:30 ໂມງ ແລະ 16:00-17:00 ໂມງ ແມ່ນມີຄວາມຫຍຸ້ງຍາກສັບສົນຫລາຍ ໂດຍສະເພາະເສັ້ນທາງແຕ່ສະໜາມມ້າ-ຕະຫລາດຫົວຂົວ, ເສັ້ນທາງທາດຫລວງ, ຖະໜົນໄກສອນ, ຖະໜົນໂພນຕ້ອງ-ໂຮງກາຍະສິນ, ຖະໜົນເຈົ້າອານຸວົງ, ຖະໜົນປາກທ້າງ-ດົງນາໂຊກ ແລະ ອື່ນໆ.
ຮອງຫົວໜ້າພະແນກຕໍາຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ໃນຜ່ານມາ ພະແນກຕໍາຫລວດຈະລາຈອນ ນະຄອນ ຫລວງວຽງຈັນ ກໍໄດ້ເອົາໃຈໃສ່ແກ້ໄຂສະພາບການສັນຈອນແອອັດ ແລະ ຄວາມເປັນລະບຽບຮຽບຮ້ອຍຂອງຜູ້ໃຊ້ລົດ-ໃຊ້ຖະໜົນ ໂດຍສະເພາະໄດ້ເພີ່ມທະວີລະບຽບການຈະລາຈອນໃນຈຸດແອອັດຕ່າງໆ ພ້ອມເອົາໃຈໃສ່ກວດກາຜູ້ລະເມີດກົດຈະລາຈອນຢ່າງເຂັ້ມງວດ ໂດຍໄດ້ສຸມໃສ່ 5 ແຜນວຽກເປັນຕົ້ນແມ່ນ ໄດ້ເພີ່ມທະວີວຽກງານໂຄສະນາເຜີຍແຜ່ກົດໝາຍຈະລາຈອນທາງບົກຢູ່ຕາມສໍານັກງານອົງການ, ໂດຍ ໂຮງຮຽນ, ໂຮງຈັກ-ໂຮງງານ, ບໍລິສັດ-ຫ້າງຮ້ານ ຕ່າງໆ ແລະ ການ ອໍານວຍຄວາມສະດວກໃຫ້ຜູ້ໃຊ້ລົດ-ໃຊ້ຖະໜົນ, ໂດຍໄດ້ວາງກໍາລັງລົງປະຕິບັດໜ້າທີ່ຢູ່ຕາມຈຸດ 3 ແຍກ, 4 ແຍກ ທີ່ສັບສົນ ເພື່ອລະບາຍການສັນຈອນໃຫ້ມີຄວາມສະດວກຄ່ອງຕົວ, ພ້ອມທັງສຸມໃສ່ວຽກງານແກ້ໄຂຄະດີອຸບັດຕິເຫດ ໂດຍແຕ່ງຕັ້ງພະນັກງານປະຈໍາການ ຕະຫລອດ 24 ຊົ່ວໂມງ ເພື່ອແກ້ໄຂທັນເຫດການ.
