ນະຄອນຫລວງວຽງຈັນສັ່ງໂຈະການລວງຄອງຕ້ານແລ້ງຕ້ານຖ້ວມຢູ່ເຂດຕົວເມືອງຕ່າງໆ.
ຫ້ອງວ່າການນະຄອນຫລວງວຽງຈັນ ໃຫ້ຮູ້ວ່າ: ເມື່ອບໍ່ດົນມານີ້, ໄດ້ອອກແຈ້ງການໃຫ້ໂຈະໂຄງການລວງຄອງລະບາຍນ້ຳຢູ່ເຂດເມືອງໄຊເສດຖາ, ສີສັດຕະນາກ, ຫາດຊາຍຟອງ, ໄຊທານີ ແລະ ນາຊາຍທອງ, ເນື່ອງຈາກວ່າມີຜົນກະທົບຕໍ່ປະຊາຊົນ ຍ້ອນບໍລິສັດຜູ້ຮັບເຫມົາບໍ່ປະຕິບັດຕາມແຜນວຽກ, ມີການລັກຈົກດິນເກີນກຳນົດ ແລະ ອື່ນໆ ເຮັດໃຫ້ສັງຄົມເດືອດຮ້ອນ, ລ່າສຸດແມ່ນເກີດຂຶ້ນຢູ່ບ້ານດົງໝາກຄາຍ, ເມືອງໄຊທານີ ທີ່ບໍລິສັດຮັບເຫມົາ VVTS ໄດ້ຂຸດຈົກເອົາດິນເປັນວົງກ້ວາງບໍ່ໄປຕາມແຜນ, ສ້າງຄວາມເດືອດຮ້ອນໃຫ້ປະຊາຊົນພາຍໃນບ້ານດັ່ງກ່າວ, ໂດຍສະເພາະເນື້ອທີ່ນາຂອງເຂົາເຈົ້າ, ຈາກປີຜ່ານມາສາມາດຜະລິດໄດ້ 30 ເຮັກຕາ ແຕ່ໃນປີນີ້ຍັງເຫລືອມີພຽງ 15 ເຮັກຕາເທົ່ານັ້ນ ແລະ ຍັງເຮັດໃຫ້ນ້ຳກັກເກັບໄວ້ທຳການຜະລິດກະສິກຳຂອງປະຊາຊົນບໍ່ພຽງພໍ, ສາເຫດຍ້ອນມີການຂຸດຈົກເປັນວົງກ້ວາງກ່ວາ 20 ແມັດ ແລະ ບັນຫາອື່ນໆ, ຊຶ່ງປະຊາຊົນ ກໍໄດ້ມີການສະເຫນີໄປຍັງພາກສ່ວນກ່ຽວຂ້ອງ ເພື່ອໃຫ້ບໍລິສັດຢຸດຕິ ແຕ່ກໍບໍ່ໄດ້ຮັບຄຳຕອບ ແລະ ບໍລິສັດຮັບເຫມົາກໍຍັງດຳເນີນໂຄງການດັ່ງກ່າວຕໍ່ໄປສົ່ງຜົນກະທົບຮ້າຍແຮງຕໍ່ເນື້ອທີ່ການຜະລິດກະສິກຳຂອງປະຊາຊົນເຂດດັ່ງກ່າວ.
ແຈ້ງການລະບຸວ່າ: ໃຫ້ຜູ້ປະກອບການໂຈະການລວງຄອງລະບາຍນ້ຳດັ່ງກ່າວໄວ້ຊົ່ວຄາວກ່ອນ, ເພື່ອຈະມີການປະເມີນຜົນໄດ້ຜົນເສຍຄືນໃໝ່ ແລະ ເມື່ອໃດໄດ້ຮັບແຈ້ງການຂອງທ່ານເຈົ້າຄອງນະຄອນຫລວງວຽງຈັນ ອານຸຍາດຈຶ່ງຈັດຕັ້ງປະຕິບັດໄດ້, ຖ້າຜູ້ຮັບເໝົາຫາກລະເມີດທາງຂະແຫນງຊົນລະປະທານນະຄອນຫລວງວຽງຈັນ ຈະບໍ່ຮັບຜິດຊອບໃນເວລາຄະນະກຳມະການສະເພາະກິດລົງກວດກາ, ປັບໃໝ ແລະ ຍຶດພາຫະນະຂອງທ່ານຕາມລະບຽບກົດໝາຍ, ດັ່ງນັ້ນນັບແຕ່ວັນທີ 30 ມັງກອນ 2019 ເປັນຕົ້ນໄປ ຈົນກ່ວາຈະມີແຈ້ງການອະນຸຍາດໃຫ້ສືບຕໍ່ຈຶ່ງສາມາດຈັດຕັ້ງປະຕິບັດໄດ້.
