ເລຂາ UN ຊີ້ສິດທິແມ່ຍິງກ້າວໜ້າ ຈົນສັ່ນຄອນລະບົບຜູ້ຊາຍເປັນໃຫຍ່
ທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ (UN) ລະບຸວ່າ: ສິດທິ ແລະ ຄວາມເປັນຜູ້ນຳຂອງແມ່ຍິງມີຄວາມກ້າວໜ້າຢ່າງໂດດເດັ່ນຈົນສ້າງຄວາມບໍ່ພໍໃຈໃຫ້ແກ່ລະບົບທີ່ໃຫ້ຜູ້ຊາຍເປັນໃຫຍ່.
ທ່ານ ກູເຕີເຣັສ ອາຍຸ 69 ປີ ກ່າວໃນວັນແມ່ຍິງສາກົນ ຢູ່ສຳນັກງານໃຫຍ່ UN ໃນນະຄອນນິວຢ໋ອກວ່າ: ກະແສຊາດນິຍົມ, ປະຊານິຍົມ ແລະ ມາດຕະການຫລຸດຄ່າໃຊ້ຈ່າຍຂອງພາກລັດເຮັດໃຫ້ຜູ້ຊາຍ ແລະ ຜູ້ຍິງມີຄວາມບໍ່ສະເໝີພາບຫລາຍຂຶ້ນ ເພາະດຳເນີນນະໂຍບາຍທີ່ຈຳກັດສິດທິ ແລະ ຫລຸດບໍລິການສັງຄົມທີ່ໃຊ້ແກ່ຜູ້ຍິງ, ຂໍຮຽກຮ້ອງໃຫ້ໂລກສ້າງວິໄສທັດໃໝ່ເລື່ອງຄວາມສະເໝີພາບ ແລະ ໂອກາດ ເພື່ອໃຫ້ແມ່ຍິງ ເຊິ່ງເປັນປະຊາກອນເຄິ່ງໜຶ່ງຂອງໂລກໄດ້ມີສ່ວນຮ່ວມຕໍ່ຜົນສຳເລັດທັງໝົດຂອງໂລກໜ່ວຍນີ້.
UN ສະໜັບສະໜູນການຈັດງານວັນແມ່ຍິງສາກົນ ເຊິ່ງກົງກັບວັນທີ 8 ມີນາຂອງທຸກໆປີມາແຕ່ປີ 1975 ເພື່ອຍົກຍ້ອງຜົນສຳເລັດຂອງແມ່ຍິງ ແລະ ສົ່ງເສີມສິດທິແມ່ຍິງ. ປີນີ້ມີການເດີນຂະບວນ ແລະ ຊຸມນຸມຕາມເມືອງຕ່າງໆທົ່ວໂລກ ໂດຍໃຊ້ຄຳຂວັນ #BalanceforBetter ປຸກລະດົມການສ້າງໂລກທີ່ມີຄວາມສົມດູນທາງເພດຫລາຍຂຶ້ນ.
