ລະວັງອາຫານນຳເຂົ້າ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ປັດຈຸບັນນີ້ ນັບວ່າພວກເຮົາມີຄວາມສ່ຽງຫລາຍ ຈາກອາຫານນຳເຂົ້າຂອງ ຕ່າງປະເທດໂດຍສະເພາະຊີ້ນ, ອາຫານທະເລ ແລະ ໝາກໄມ້ຕ່າງໆ ໃນເມື່ອພວກເຮົາບໍ່ມີຄວາມອາດສາມາດ ແລະ ເງື່ອນໄຂພຽງພໍ ໃນການກວດກາ ແລະ ຄຸ້ມຄອງອາ ຫານດັ່ງກ່າວໂດຍສະເພາະກໍແມ່ນອົງການອາຫານ ແລະ ຢາ ຫລື ຂະແໜງອຸດສາຫະກຳ-ການຄ້າ ແລະ ກະສິກຳ- ປ່າໄມ້ເປັນຕົ້ນຈາກຄວາມບໍ່ເຂັ້ມແຂງດັ່ງກ່າວກໍບໍ່ສາມາດ ຄຸ້ມຄອງ ແລະ ປົກປ້ອງຜູ້ບໍລິໂພກໄດ້ ຈິ່ງກໍ່ໄດ້ເກີດມີ ຄວາມສ່ຽງຕາມມາຢ່າງໜ້າຕົກໃຈ, ຈາກການເບື່ອອາຫານ ແລະ ຄວາມສ່ຽງຕ່າງໆ ໃນໄລຍະຍາວ, ສົ່ງຜົນ ໃຫ້ພະຍາດຕ່າງໆຕາມມາ.
ກໍດັ່ງປັດຈຸບັນ ກະຊວງກະສິກຳ ແລະ ປ່າໄມ້ກໍໄດ້ອອກມາແຈ້ງເຕືອນໃຫ້ປະຊາຊົນຈົ່ງມີສະຕິບໍລິໂພກຊີ້ນໝູ, ດີທີ່ສຸດຄວນຢຸດຕິໃນໄລຍະນີ້, ເພາະມີການລະບາດ ຂອງ ພະຍາດໝູອາຟຣິກກາ, ເຊິ່ງຕິດແປດມາຈາກການນຳເຂົ້າຊີ້ນໝູ, ໝູ ແລະ ອາຫານສຳເລັດຮູບຈາກຊີ້ນໝູ ຂອງປະເທດໃກຄຽງດັງ ສປ ຈີນ, ສສ ຫວຽດນາມ, ທີ່ກຳລັງມີການລະບາດຮ້າຍ ແຮງຂອງພະຍາດດັ່ງກ່າວ, ເຊິ່ງອາດມີຜົນກະທົບຕໍ່ຜູ້ບໍລິໂພກໄດ້ ແລະ ເມື່ອມໍ່ໆມານີ້ສື່ສັງຄົມອອນລາຍກໍ ໄດ້ນຳສະເໜີຄົນປ່ວຍຜູ້ໜຶ່ງ ຈາກການບໍລິໂພກຊີ້ນນຳເຂົ້າມາແລ້ວ, ແຕ່ກໍຍັງໂຊກດີທີ່ການແພດໄດ້ຊ່ວຍຊີວິດຂອງຍິງສາວຜູ້ນັ້ນໄວ້ໄດ້ ແລະ ສິ່ງນີ້ກໍອາດເປັນບົດຮຽນອັນເລິກເຊິ່ງໃຫ້ແກ່ຂະແໜງການກ່ຽວຂ້ອງໃນການເຂັ້ມງວດກວດຂັນອາຫານນຳເຂົ້າໃຫ້ມີຄວາມປອດໄພ, ເພາະເບິ່ງເຫັນວ່າໃນປັດຈຸບັນການນຳເຂົ້າອາຫານດັ່ງກ່າວຍັງມີແພ່ຫລາຍ ແລະ ຂາດການຄຸ້ມຄອງກວດກາຂອງເຈົ້າໜ້າທີ່ກ່ຽວຂ້ອງ./.
