ອາເມລິກາຂູ່ຂວ້ຳບາດສະຖາບັນການເງິນ ຕ່າງປະເທດທີ່ສະໜັບສະໜູນທ່ານ ມາດູໂຣ
ທ່ານ ຈອນ ໂບລຕັນ ທີ່ປຶກສາດ້ານຄວາມໝັ້ນຄົງອາເມລິກາ ກ່າວວ່າ: ອາເມລິກາອາດໃຊ້ມາດຕະການຂວ້ຳບາດຕໍ່ສະຖາບັນການເງິນຕ່າງປະເທດທີ່ອຳນວຍຜົນປະໂຫຍດໃຫ້ທ່ານ ນິໂກລັສ ມາດູໂຣ ປະທານາທິບໍດີເວເນຊູເອລາ ແລະ ຄະນະ.
ທ່ານ ໂບລຕັນ ລະບຸວ່າ: ອາເມລິກາໄດ້ແຈ້ງເຕືອນສະຖາບັນການເງິນຕ່າງປະເທດວ່າ ອາດຈະມີການຂວ້ຳບາດສະຖາບັນການເງິນເຫລົ່ານັ້ນ ເນື່ອງຈາກຊ່ວຍອຳນວຍຄວາມສະດວກທາງການເຮັດທຸລະກຳໂດຍຜິດກົດໝາຍ ເຊິ່ງອຳນວຍຜົນປະໂຫຍດຕໍ່ທ່ານ ມາດູໂຣ ແລະ ເຄືອຂ່າຍການທຸຈະລິດຂອງທ່ານ.
ນອກຈາກນີ້, ທ່ານ ເອລລຽດ ອັບຣາມ ທູດພິເສດອາເມລິກາປະຈຳເວເນຊູເອລາ ກ່າວວ່າ: ມີຄວາມເປັນໄປໄດ້ວ່າ: ອາເມລິກາຈະໃຊ້ມາດຕະການຂວ້ຳບາດຄັ້ງທີ 2 ຕໍ່ປະຊາຊົນທີ່ບໍ່ແມ່ນຊາວອາເມລິກາ ຫລື ອົງການທີ່ກ່ຽວຂ້ອງກັບລັດຖະບານຂອງທ່ານ ມາດູໂຣ.
ສຳນັກຂ່າວຊິນຮົວລາຍງານວ່າ: ໃນໄລຍະຜ່ານມາ, ອາເມລິກາໄດ້ໃຊ້ນະໂຍບາຍຂວ້ຳບາດທາງເສດຖະກິດ ແລະ ການໂດດດ່ຽວທາງການທູດຕໍ່ລັດຖະບານຂອງເວເນຊູເອລາ ເພື່ອສະໜັບສະໜູນທ່ານ ຮວນ ກຸຍໂດ ຜູ້ນຳພັກຝ່າຍຄ້ານ.
ໃນວັນທີ 23 ມັງກອນຜ່ານມາ, ປະທານາທິບໍດີ ໂດນັລ ທຣຳ ຂອງອາເມລິກາ ປະກາດວ່າ: ອາເມລິກາໃຫ້ການຍອມຮັບທ່ານ ຮວນ ກຸຍໂດ ປະທານສະມັດຊາແຫ່ງຊາດ ແລະ ຜູ້ນຳພັກຝ່າຍຄ້ານຂອງເວເນຊູເອລາ ໃນຖານະປະທານາທິບໍດີຊົ່ວຄາວຂອງເວເນຊູເອລາ ເຊິ່ງສົ່ງຜົນໃຫ້ປະທານາທິບໍດີ ມາດູໂຣ ປະກາດຕັດການພົວພັນທາງການທູດ ແລະ ການເມືອງກັບອາເມລິກາ.
