ອິນເດຍ-ປາກິດສະຖານ ເຄັ່ງຕຶງໜັກ ຫລາຍຝ່າຍກົດດັນເລັ່ງແກ້ບັນຫາຂັດແຍ່ງ
ຫລາຍຝ່າຍພາກັນກົດດັນໃຫ້ ອິນເດຍ ແລະ ປາກິດສະຖານ ແກ້ໄຂບັນຫາຄວາມຂັດແຍ່ງ, ຫລັງທັງສອງປະເທດຕ່າງຍິງເຮືອບິນຮົບຂອງອີກຝ່າຍຕົກ ຫລັງຈາກອິນເດຍສົ່ງເຮືອບິນເຂົ້າໄປໂຈມຕີພາຍໃນປາກິດສະຖານເປັນຄັ້ງທຳອິດນັບແຕ່ປີ 1971.
ການພົວພັນລະຫວ່າງ ອິນເດຍ ກັບ ປາກິດສະຖານ ທະວີຄວາມເຄັ່ງຕຶງນັບແຕ່ຕຳຫລວດອິນເດຍຫລາຍກວ່າ 40 ຄົນ ຕ້ອງເສຍຊີວິດຈາກເຫດລະເບີດລົດຂ້າຕົວຕາຍໃນແຄວ້ນກາສເມຍ ທີ່ຢູ່ໃນການເບິ່ງແຍງຂອງອິນເດຍ ໃນວັນທີ 14 ກຸມພາຜ່ານມາ ແລະ ໃນວັນທີ 26 ກຸມພານີ້, ອິນເດຍໄດ້ສົ່ງເຮືອບິນເຂົ້າໄປໂຈມຕີທາງອາກາດໃນເຂດແດນຂອງປາກິດສະຖານ ໂດຍລະບຸວ່າເປັນການໂຈມຕີຄ້າຍຝຶກຂອງກຸ່ມຫົວຮຸນແຮງທີ່ອອກມາອ້າງວ່າເປັນຜູ້ກໍ່ເຫດໂຈມຕີອິນເດຍໃນຄັ້ງນັ້ນ. ແຫລ່ງຂ່າວລັດຖະບານອິນເດຍລະບຸວ່າ: ມີຜູ້ເສຍຊີວິດເຖິງ 300 ຄົນ ຈາກການໂຈມຕີໃນວັນທີ 26, ແຕ່ປາກິດສະຖານບອກວ່າບໍ່ມີຜູ້ເສຍຊີວິດ.
ຕໍ່ມາໃນວັນທີ 27 ກຸມພາ, ທັງສອງຝ່າຍໄດ້ຍິງປືນໃຫຍ່ໂຈມຕີກັນກ່ອນຈະເປີດສາກໂຈມຕີທາງອາກາດ ໂດຍປາກິດສະຖານໄດ້ໂຈມຕີເຮືອບິນຮົບອິນເດຍທີ່ລະເມີດເຂົ້າມາໃນນ່ານຟ້າ ເຮັດໃຫ້ເຮືອບິນ 2 ລຳຖືກຍິງຕົກ ເຮືອບິນລຳໜຶ່ງຕົກລົງໃນເບື້ອງຂອງອິນເດຍ, ອີກລຳໜຶ່ງຕົກໃນເຂດຂອງປາກິດສະຖານ ແລະ ນັກບິນຖືກຈັບໄປ 1 ຄົນ.
ຂະນະທີ່ຝ່າຍອິນເດຍບອກວ່າ: ອິນເດຍໄດ້ຍິງເຮືອບິນປາກິດສະຖານຕົກ 1 ລຳ ໃນເຂດປາກິດສະຖານ ແລະ ອິນເດຍສູນເສຍເຮືອບິນ 1 ລຳ ຫລັງເກີດເຫດປາກິດສະຖານປິດນ່ານຟ້າທົ່ວປະເທດແບບບໍ່ມີກຳນົດ ສົ່ງຜົນກະທົບຕໍ່ສາຍການບິນຫລາຍແຫ່ງທົ່ວໂລກ.
