ຄາດໂອເປັກເດີນໜ້າຫລຸດ ຜະລິດນ້ຳມັນໜູນລາຄາເພີ່ມຂຶ້ນ
ສັນຍານ້ຳມັນດິບລ່ວງໜ້າເວສເທັກຊັສ ປິດຕະຫລາດວັນທີ 26 ກຸມພາ ປັບຂຶ້ນ, ຂະນະທີ່ນັກລົງທຶນຄາດວ່າກຸ່ມປະເທດຜູ້ສົ່ງອອກນ້ຳມັນ (ໂອເປັກ) ຈະຍັງເດີນໜ້າຫລຸດກຳລັງການຜະລິດຕໍ່ໄປ ເຖິງວ່າປະທານາທິບໍດີ ໂດນັລ ທຣຳ ກົດດັນໃຫ້ລາຄານ້ຳມັນປັບລົງກໍຕາມ.
ສັນຍານ້ຳມັນດິບເວສເທັກຊັສ ສົ່ງມອບເດືອນເມສາ ເຊິ່ງມີການຊື້ຂາຍຢູ່ຕະຫລາດໄນເມັກ ເພີ່ມຂຶ້ນ 2 ເຊັນ ປິດຕະຫລາດ 55,50 ໂດລາ/ບາເຣລ, ສ່ວນສັນຍານ້ຳມັນດິບເບຣນ ເພີ່ມຂຶ້ນ 45 ເຊັນ ປິດ 65,21 ໂດລາ/ບາເຣລ.
ເຖິງຢ່າງໃດກໍຕາມ, ລາຄານ້ຳມັນຫລຸດລົງກວ່າ 3% ໃນວັນທີ 25 ກຸມພາ ຫລັງຈາກປະທານາທິບໍດີ ໂດນັລ ທຣຳ ລະບຸວ່າ: ທ່ານມີຄວາມກັງວົນກ່ຽວກັບການເພີ່ມຂຶ້ນຂອງລາຄານ້ຳມັນ ແລະ ໄດ້ຮຽກຮ້ອງໃຫ້ກຸ່ມໂອເປັກໂຈະການປັບຂຶ້ນລາຄານ້ຳມັນ.
ເຖິງວ່າລາຄານ້ຳມັນປັບຂຶ້ນໃນວັນທີ 27 ກຸມພາ, ແຕ່ໄລຍະບວກຖືກຈຳກັດຈາກການຄາດຄະເນທີ່ວ່າ: ລີບີຈະເພີ່ມກຳລັງການຜະລິດນ້ຳມັນ ແລະ ການຄາດຄະເນທີ່ວ່າ: ປະລິມານນ້ຳມັນດິບຢູ່ສາງຂອງອາເມລິກາຈະເພີ່ມຂຶ້ນ 3,6 ລ້ານບາເຣລ ໃນອາທິດຜ່ານມາ.
