ອິນເດຍເປີດໂຈມຕີທາງອາກາດ ຂ້າມເຂດຢຸດຍິງໃນແຄສເມຍ
ກອງທັບອິນເດຍປະຕິບັດການໂຈມຕີທາງອາກາດຂ້າມເຂດຢຸດຍິງໃນແຄສເມຍ ເພື່ອທຳລາຍເປົ້າໝາຍເຊິ່ງເປັນຖານທີ່ໝັ້ນຂອງກຸ່ມກໍ່ການຮ້າຍ, ສ່ວນກອງທັບປາກິດສະຖານປະກາດຈະຕອບໂຕ້ຕາມຄວາມເໝາະສົມ.
ສຳນັກຂ່າວຕ່າງປະເທດລາຍງານວ່າ: ພົນຕີ ອາຊີບ ກາຟູ ໂຄສົກກອງທັບປາກິດສະຖານ ຖະແຫລງໃນວັນທີ 26 ກຸມພາວ່າ: ເຮືອບິນຂອງກອງທັບອິນເດຍຫລາຍລຳປະຕິບັດການໂຈມຕີທາງອາກາດຂ້າມເສັ້ນຄວບຄຸມ (LOC) ເຊິ່ງເປັນເຂດຢຸດຍິງໃນແຄສເມຍ ພາກພື້ນທີ່ຢູ່ທາງເໜືອ ແລະ ເປັນຈຸດຍາດຊີງລະຫວ່າງອິນເດຍກັບປາກິດສະຖານມາຫລາຍທົດສະວັດ ໂດຍຜົນການກວດສອບໃນເບື້ອງຕົ້ນພົບວ່າ: ເປົ້າໝາຍຖືກໂຈມຕີຈົນເສຍຫາຍ.
ເຖິງວ່າຍັງບໍ່ມີລາຍງານວ່າເກີດຄວາມເສຍຫາຍຕໍ່ລະຄົບໂຄງລ່າງພື້ນຖານຂະໜາດໃຫຍ່ຂອງປາກິດສະຖານໃນບໍລິເວນທີ່ມີການໂຈມຕີ ຄືເຂດມູຊາຟາຣາບັດ ເຊິ່ງເປັນພື້ນທີ່ສ່ວນໜຶ່ງຂອງແຄສເມຍທີ່ຢູ່ພາຍໃນອານາເຂດຂອງປາກິດສະຖານ ຫລື ບໍ່, ເຊັ່ນດຽວກັບຈຳນວນຜູ້ເສຍຊີວິດ ແລະ ຜູ້ໄດ້ຮັບບາດເຈັບ ແຕ່ປະຕິບັດການດັ່ງກ່າວຂອງອິນເດຍຖືວ່າລະເມີດອະທິປະໄຕ ແລະ ຂໍ້ຕົກລົງຢຸດຍິງສະບັບປີ 2003 ຢ່າງຈະແຈ້ງກໍຕາມ ແລະ ກອງທັບປາກິດສະຖານຈະຕອບໂຕ້ຕາມຄວາມເໝາະສົມ.
