ງານຕະຫຼາດນັດ ເພື່ອສົ່ງເສີມແນວຄິດຕ່າງໆໃນການປະຕິບັດຕົວຈິງ ນັກສຶກສາພາກວິຊາ ການເງິນ-ການທະນາຄານ

ໃນວັນທີ 25 ກຸມພາ ຫາ 1 ມີນານີ້, ພາກວິຊາ ການເງິນ-ການທະນາຄານ ຄະນະເສດຖະສາດ ແລະ ບໍລິຫານທຸລະກິດ (ຄສບ) ໄດ້ຈັດງານຕະຫຼາດນັດນັກສຶກສາ ຄັ້ງທີ 12 ປະຈຳສົກຮຽນ 2018-2019 ຂຶ້ນທີ່ສະຖານບັນຕົນເອງ, ເພື່ອໃຫ້ນັກສຶກສາໄດ້ນຳໃຊ້ບົດຮຽນທີ່ຮຽນມາທິດສະດີເຂົ້າໃນການປະຕິບັດຕົວຈິງ ແລະ ທັງເປັນການແລກປ່ຽນບົດຮຽນ ແລະປະສົບການຕ່າງໆນໍາກັນອີກດ້ວຍ, ພ້ອມເປັນການຝຶກແອບການເຮັດວຽກເປັນທີມ ເພື່ອຫາປະສົບການໃໝ່ນອກຫ້ອງຮຽນຕື່ມອີກ, ເພື່ອຮຽນຈົບມາຮູ້ແກ້ໄຂບັນຫາຕ່າງໆໃນການປິຕິບັດວຽກງານຕົວຈິງ ຮູ້ປັບປຸງແກ້ໄຂ ແລະ ກຽມຄວາມພ້ອມ ໃນການປະກອບທຸລະກິດຂອງຕົນໃນອານາຄົດປະສົບຜົນສໍາເລັດ.

ທ່ານຫົວໜ້າພາກວິຊາ ການເງິນ-ການທະນາຄານ ກ່າວວ່າ: ການຈັດງານຕະຫຼາດນັດນັກສຶກສາ (ຄສບ) ເປັນອີກແນວຄວາມຄິດລິເລີ່ມໜຶ່ງ ຂອງຄູ-ອາຈານ ສາຂາວິຊາການຕະຫຼາດ ເຊິ່ງໄດ້ເລີ່ມຕົ້ນຄັ້ງທຳອິດໃນປີ 2007 ເພື່ອຢາກໃຫ້ນັກສຶກສາໄດ້ລົງມືເຮັດພາກປະຕິບັດຕົວຈິງ, ຊຶ່ງເປັນກິດຈະກໍາໜຶ່ງທີ່ຕິດພັນກັບການຮຽນ-ການສອນ ເປັນການທົດສອບເອົາທິດສະດີລົງສູ່ພາກປະຕິບັດຕົວຈິງ ເພື່ອການຮຽນຮູ້ເອົາປະສົບການຕ່າງໆ ເຊັ່ນ: ການຄາດຄະເນຄວາມຕ້ອງການຂອງຕະຫຼາດ, ການຄິດໄລ່ກໍາໄລຕົ້ນທຶນ, ການຈັດສັນບຸກຄະລາກອນ, ການບໍລິຫານເຄື່ອງໃນສາງ, ການພົວພັນຜູ້ສະໜອງ ແລະ ຕົວແທນຈຳໜ່າຍ, ການບັນທຶກລາຍຮັບ-ລາຍຈ່າຍ ເຫຼົ່ານີ້ເປັນຕົ້ນ. ໃນງານຄັ້ງນີ້, ມີຫ້າງຮ້ານຕ່າງໆຂອງນັກສຶກສາຈາກ 5 ພາກວິຊາຂອງ ຄສບ ເຂົ້າຮ່ວມວາງສະແດງ 20 ກວ່າຮ້ານ, ສ່ວນຜະລິດຕະພັນລວມມີອາຫານ, ເຂົ້າໜົມ, ເຄື່ອງດື່ມ ແລະ ຂອງທີ່ລະນຶກຕ່າງໆ.