ພູມໃຈນຳບ້ານເພິ່ນແລ້ວຫັນມາເບິ່ງບ້ານໂຕ
ໂດຍ: ທິດກ່ຳ
ໃນຫົວຂໍ້ທີ່ທິດກ່ຳໄດ້ຍົກມາຂ້າງເທິງນີ້ແມ່ນພົວພັນໄປເຖິງປະເທດເພື່ອນມິດຂອງເຮົາ ຄືປະເທດຈີນ ແລະ ປະເທດອິນເດຍ ໄດ້ຟື້ນຟູປ່າສີຂຽວເພີ່ມຂຶ້ນຫລາຍທີ່ສຸດໃນຮອບ 20 ປີ. ແຫລ່ງຂ່າວນີ້ ທິດກ່ຳ ໄດ້ມາຈາກ ເຟສລາວໂພສ (Laopost) ວັນທີ 20 ກຸມພາ 2019, ໂດຍອີງຕາມສຳນັກຂ່າວຕ່າງປະເທດລາຍງານວ່າ: ອົງການນາຊາໄດ້ເປີດເຜີຍຜົນການສຶກສາເກັບກຳຂໍ້ມູນດ້ານສິ່ງແວດລ້ອມພົບວ່າປະເທດຈີນ ແລະ ປະເທດອິນເດຍ ທັງສອງປະເທດທີ່ມີປະຊາກອນຫລາຍທີ່ສຸດໃນໂລກ ແຕ່ກາຍເປັນປະເທດທີ່ມີການເພີ່ມຂຶ້ນຂອງພື້ນທີ່ສີຂຽວໃຫ້ກັບໂລກຫລາຍທີ່ສຸດໃນໄລຍະ 20 ປີຜ່ານມາ.
ແຫລ່ງຂ່າວຍັງລະບຸວ່າ: ປັດຈຸບັນ ຈີນ ແລະ ອິນເດຍ ມີພື້ນທີ່ 1 ສ່ວນ 3 ຂອງປະເທດທີ່ມີພື້ນທີ່ສີຂຽວ. ແນວໃດກໍດີ, ຕາມທິດກ່ຳວ່າສາເຫດທີ່ເຮັດໃຫ້ສອງປະເທດມີພື້ນທີ່ສີຂຽວເພີ່ມຂຶ້ນຢ່າງຊັດເຈນນີ້ ກໍເນື່ອງມາຈາກມີການບໍລິ
ຫານຈັດການທີ່ດີ ແລະ ເຄັ່ງຄັດ, ທັງມີມາດຕະການຕ່າງໆໃນການສົ່ງເສີມການປູກປ່າ ແລະ ອີກເບື້ອງໜຶ່ງ ກໍແມ່ນການກຳຈັດຢ່າງເດັດຂາດໃນການຕັດໄມ້ທຳລາຍປ່າ ເພື່ອປົກປັກຮັກສາສິ່ງແວດລ້ອມ.
ເມື່ອເຫັນບ້ານເພິ່ນແລ້ວ, ກໍອ່ວາຍໜ້າມາເບິ່ງບ້ານໂຕວ່າມາຮອດປັດຈຸບັນນີ້, ພື້ນທີ່ສີຂຽວຢູ່ບ້ານເຮົາມັນຫລຸດໜ້ອຍຖອຍລົງ ຫລື ວ່າເພີ່ມຂຶ້ນ. ໃນແຜນພັດ
ທະນາເສດຖະກິດ-ສັງຄົມແຫ່ງຊາດ ນັບແຕ່ຄັ້ງທີ 7 ເປັນຕົ້ນມາ ກໍໄດ້ວາງຄາດໝາຍຊັດເຈນວ່າຮອດປີ 2015 ໃຫ້ມີພື້ນທີ່ສີຂຽວ 65% ກ້າວໄປຮອດ 2020 ແມ່ນໃຫ້ໄດ້ 70% ຂອງພື້ນທີ່ໃນທົ່ວປະເທດ ແລະ ຍັງອີກ 2 ປີ ກໍຈະຮອດ 2020 ເມື່ອຮອດໄລຍະນັ້ນລະ, ໝາກຜົນຕົວຈິງຈຶ່ງຈະຮູ້ວ່າມັນເພີ່ມຂຶ້ນຫລືວ່າຫລຸດລົງ ນີ້ຄືຕົວຊີ້ວັດວ່າພວກເຮົາເຮັດໄດ້ ຫລື ບໍ່?.
ໄລຍະຜ່ານມາ, ບໍ່ວ່າຂັ້ນສູນກາງ ແລະ ທ້ອງຖິ່ນ ແຕ່ລະປີພວກເຮົາພາກັນປູກຕົ້ນໄມ້ຢ່າງເປັນຂະບວນຟົດຟື້ນສົມຄວນ, ປູກປີໃດກໍເປັນຮ້ອຍເປັນພັນເປັນໝື່ນເປັນແສນຕົ້ນໃນທົ່ວປະເທດ, ແຕ່ປະກົດການທີ່ເຮົາເຫັນນັ້ນປ່າມັນຄືນັບມື້ກຸດຫ້ຽນໄປແຕ່ລະປີດ້ວຍຫລາຍສາເຫດຄື: ອັນທີໜຶ່ງແມ່ນຍ້ອນການສ້າງສາພັດທະນາປະເທດຊາດ. ອັນທີສອງມາ ກໍແມ່ນຍ້ອນບຸກຄົນຈັບຈອງເອົາດິນດອນຕອນຫຍ້າແລ້ວກໍເອົາໄປຂາຍຕິດຂາຍຕໍ່ໃຫ້ຜູ້ມີເງິນ ຫລື ນັກລົງທຶນ ເຮັດໃຫ້ປ່າໄດ້ຫັນປ່ຽນສະພາບເປັນຢ່າງອື່ນໄປນັບມື້. ສ່ວນວ່າເຫດຜົນອີກອັນໜຶ່ງກໍແມ່ນເຖິງວ່າມີຄຳສັ່ງເລກທີ 15/ນຍ ຄຸມຢູ່ ກໍຍັງມີປະຊາຊົນ ແລະ ພວກທີ່ຫາກິນນຳໄມ້ພາກັນສວຍໂອກາດລັກລອບຕັດດັ່ງພວກເຮົາເຫັນຕາມແຫລ່ງຂ່າວຄາວການຢືດໄມ້, ສົ່ງໄມ້ໄປຂາຍຢູ່ຕ່າງປະເທດທີ່ຜິດກົດໝາຍຢ່າງເປັນປະຈຳ ແລະ ຍິ່ງໄປກວ່ານັ້ນ ພວກເຮົາຍັງເຫັນວ່າປ່າສະຫງວນທີ່ເປັນຂອງທ້ອງຖິ່ນ ແລະ ຂອງຊາດ ກໍພວມຖືກຄຸກຄາມຈາກພວກລັກຕັດໄມ້, ເຮັດໃຫ້ໄມ້ໃຫຍ່, ໄມ້ດີໆ ນັບມື້ມະຫັບມະຫາຍເປົ່າແປນໄປແຕ່ລະມື້, ເພາະສະນັ້ນ, ຈຶ່ງເຫັນໄດ້ວ່າເພື່ອໄປຮອດ 2020 ພື້ນທີ່ສີຂຽວບ້ານເຮົາຍັງບໍ່ທັນຮູ້ວ່າມັນຈະເພີ່ມຂຶ້ນ ຫລື ວ່າຫລຸດລົງ.
ໃນຜ່ານມາ, ກໍຍັງບໍ່ທັນມີແຫລ່ງຂ່າວຄາວໃດອອກມາຢັ້ງຢືນວ່າມາຮອດປັດຈຸບັນນີ້ ຄາດໝາຍການປູກປ່າ, ຮັກສາສິ່ງແວດລ້ອມໃຫ້ກາຍເປັນພື້ນທີ່ສີຂຽວໄດ້ຕາມຄາດໝາຍແລ້ວບໍ່ ຫລື ວ່າຍັງຈັກເປີເຊັນ.
ເຖິງຢ່າງໃດກໍດີ, ເທົ່າທີ່ທິດກ່ຳເຫັນນັບແຕ່ມີຄຳສັ່ງເລກທີ 15/ນຍ ເປັນຕົ້ນມາເຫັນວ່າການບຸກລຸກຕັດໄມ້ທຳລາຍປ່າແມ່ນຫລຸດລົງຢ່າງເຫັນປະຈັກຕາ ຄາດວ່າໃນອະນາຄົດຖ້າພວກເຮົາພ້ອມກັນຫັນທິດຕາມແຜນພັດທະນາເສດຖະກິດ-ສັງຄົມຂອງປະເທດໄປຕາມທິດສີຂຽວ ແລະ ຍືນຍົງ, ທັງມີມາດຕະການຕ່າງໆຢ່າງເດັດຂາດແລ້ວເຊື່ອແນ່ວ່າອະນາຄົດປະເທດລາວອາດກາຍເປັນປະເທດທີ່ມີກິ່ນຫອມທາງດ້ານສິ່ງແວດລ້ອມ, ມີອາກາດສົດຊື່ນ ແລະ ເຕັມໄປດ້ວຍພື້ນທີ່ສີຂຽວ.
