ລາວເລັ່ງພັດທະນາຕະຫຼາດແຮງງານ
ເພື່ອເປັນການຜັນຂະຫຍາຍຜົນຂອງກອງປະຊຸມໂຕະມົນປະຈຳປີ 2017 ກ່ຽວກັບ “ການລົງທຶນໃສ່ການພັດທະນາສີມືແຮງງານ ເຊິ່ງເປັນປັດໄຈສຳຄັນໃນການພັດທະນາຊັບພະຍາກອນມະນຸດ” ແລະ ທັງເປັນການປະຕິບັດຕາມແຈ້ງການແນະນຳສະບັບເລກທີ 0194/ຮສສ, ລົງວັນທີ 01/02/2018 ຂອງ ລັດ ຖະມົນຕີກະຊວງແຮງງານ ແລະ ສະຫວັດດີການສັງຄົມ ໃນການພັດທະນາລະບົບຂໍ້ມູນຂ່າວສານຕະຫຼາດແຮງງານແຫ່ງຊາດ (Labour Marketing Information System-LMIS) ຂອງກົມພັດທະນາສີມືແຮງງານ ແລະ ຈັດຫາງານ ເພື່ອເຮັດໃຫ້ຜູ້ອອກແຮງງານ ແລະ ຜູ້ປະກອບການສາມາດຮັບຮູ້ຂໍ້ມູນຂ່າວສານແຮງງານທີ່ຖືກຕ້ອງ ແລະ ສອດຄ່ອງກັບຄວາມຕ້ອງການຂອງຕະ ຫຼາດແຮງງານ; ຊຸກຍູ້ ແລະ ພັດທະນາຂໍ້ມູນຂ່າວສານຕະຫຼາດແຮງງານເຂົ້າໃນການດັດສົມມະຫາພາກດ້ານແຮງງານແຕ່ລະໄລຍະໃຫ້ມີຄວາມຄ່ອງຕົວ ເພື່ອເປັນເງື່ອນໄຂໃນການຂຶ້ນແຜນສ້າງ ແລະ ພັດທະນາກໍາລັງແຮງງານໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມ ແລະ ຕະຫຼາດແຮງງານຢ່າງມີປະສິດທິພາບ ທັງໃນປັດຈຸບັນ ແລະ ອະນາຄົດ. ສະນັ້ນ ໃນວັນທີ 19 ກຸມພານີ້ ທີ່ກະຊວງແຮງງານ ແລະ ສະຫວັດດີການສັງຄົມ ຈຶ່ງໄດ້ມີກອງປະ ຊຸມເຜີຍແຜ່ແບບຈຳລອງການພະຍາກອນຕະຫຼາດແຮງງານຂອງ ສປປ ລາວ ຂຶ້ນ ເພື່ອຮັບຟັງລາຍງານຜົນຂອງການວິເຄາະເບື້ອງຕົ້ນແບບຈໍາລອງຂອງການພະຍາກອນຕະຫຼາດແຮງງານຂອງ ສປປ ລາວ ໂດຍທ່ານຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ ຊຶ່ງທ່ານໃຫ້ຮູ້ວ່າ: ການຄົ້ນຄວ້າ ແລະ ກຳນົດເອົາການສ້າງແບບຈຳຮອງພະຍາ ກອນຕະຫຼາດແຮງງານໄລຍະສັ້ນ 2019-2021 ແມ່ນເປັນທາງເລືອກຂັ້ນພື້ນ ຖານໃນການສະໜອງຂໍ້ມູນຂ່າວສານຕະຫຼາດແຮງງານ; ການລາຍງານທ່າອ່ຽງການເໜັງຕີງຂອງຕະຫຼາດແຮງງານ ເພື່ອເປັນເຄື່ອງມືຮັບໃຊ້ຂອງຄະນະກຳມາທິການແຫ່ງຊາດ ທີ່ຮັບຜິດຊອບໃນການວາງແຜນພັດທະນາຊັບພະຍາກອນມະນຸດຂອງ ສປປ ລາວ. ນອກນັ້ນ ຍັງໄດ້ມີຄວາມຄືບໜ້າໃນການຈັດຕັ້ງປະຕິ ບັດວຽກງານຕົວຈິງຮ່ວມກັບພາກສ່ວນຕ່າງໆເຊັ່ນ: ກະຊວງສຶກສາທິການ ແລະ ກິລາ, ສະຖາບັນຄົ້ນຄວ້າເສດຖະກິດແຫ່ງຊາດ, ມະຫາວິທະຍາໄລແຫ່ງຊາດ, ສູນສະຖິຕິແຫ່ງຊາດ, ທະນາຄານແຫ່ງ ສປປ ລາວ, ກະຊວງແຜນການ ແລະ ການລົງທຶນ, ກະຊວງອຸດສາຫະກຳ ແລະ ການຄ້າ, ກະຊວງພາຍໃນ ແລະ ນັກຄົ້ນຄວ້າຈາກສູນຮຽນຮູ້ການພັດທະນາອົດສະຕຣາລີ (LADFL) ຊຶ່ງເຮັດໃຫ້ສາມາດຮັບຮູ້ໄດ້ເຖິງຂໍ້ສະດວກ, ຂໍ້ຫຍຸ້ງຍາກ ທີ່ເປັນສິ່ງທ້າທາຍ ເພື່ອຊອກຫາວິທີທາງການແກ້ໄຂຮ່ວມກັນ. ນອກນັ້ນ ກອງປະຊຸມຍັງໄດ້ຮັບຟັງການນໍາສະ ເໜີການພັດທະນາລະບົບຂໍ້ມູນຂ່າວສານຕະຫຼາດແຮງງານ (LMIS) ຂອງທ່ານ ພຸດທະວົງ ພູມມະສັກ ຫົວໜ້າພະແນກຂໍ້ມູນຂ່າວສານຕະຫຼາດແຮງງານ ແລະ ແບບຈຳລອງພະຍາກອນກຳລັງແຮງງານ ໂດຍອາຈານຈາກມະຫາວິທະຍາໄລແຫ່ງຊາດ ແລະ ກອງປະຊຸມໄດ້ມີການແລກປ່ຽນ ແລະ ປະກອບຄຳຄິດຄຳເຫັນຢ່າງກົງໄປກົງມາຂອງຜູ້ເຂົ້າຮ່ວມ ເພື່ອເຮັດໃຫ້ວຽກງານດັ່ງກ່າວບັນລຸຕາມຄາດໝາຍທີ່ວາງໄວ້.
