ການເມືອງເວເນຊູເອລາວິກິດໜັກ ຜູ້ປະທ້ວງປະທະທະຫານ ມີຜູ້ເສຍຊີວິດ 4 ຄົນ
ຜູ້ນຳຝ່າຍຄ້ານເວເນຊູເອລາຮຽກຮ້ອງໃຫ້ປະຊາຄົມໂລກຫາທາງປົດປ່ອຍເວເນຊູເອລາ ຫລັງເກີດເຫດປະທະລະຫວ່າງທະຫານກັບຜູ້ປະທ້ວງ ຈົນເຮັດໃຫ້ມີຜູ້ເສຍຊີວິດ 4 ຄົນ.
ສະຖານະການການເມືອງຂອງເວເນຊູເອລາກຳລັງວິກິດຢ່າງໜັກ. ຫລ້າສຸດ ທ່ານ ຮວນ ກຸຍໂດ ຜູ້ນຳຝ່າຍຄ້ານ ຮຽກຮ້ອງໃຫ້ປະຊາຄົມໂລກພິຈາລະນາທຸກມາດຕະການ ເພື່ອປົດປ່ອຍເວເນຊູເອລາໃຫ້ຫລຸດພົ້ນຈາກການປົກຄອງຂອງປະທານາທິບໍດີ ນິໂກລັສ ມາດູໂຣ ຫລັງເກີດເຫດປະທະກັນລະຫວ່າງທະຫານຮ່ວມກັບກຸ່ມຜູ້ປະທ້ວງບໍລິເວນຊາຍແດນເບຣຊິນ ທີ່ຕ້ອງການໃຫ້ນຳເອົາເຄື່ອງຊ່ວຍເຫລືອດ້ານມະນຸດສະທຳເຂົ້າມາໃນປະເທດ.
ເຫດຮຸນແຮງບໍລິເວນຊາຍແດນເບຣຊິນທີ່ເກີດຂຶ້ນແຕ່ວັນທີ 22 ກຸມພາ ເຮັດໃຫ້ມີຜູ້ເສຍຊີວິດແລ້ວ 4 ຄົນ. ນອກຈາກນີ້ ຍັງມີຜູ້ບາດເຈັບຫລາຍກວ່າ 300 ຄົນ, ສ່ວນຢູ່ຊາຍແດນໂກລົມບີມີຜູ້ບາດເຈັບຢ່າງໜ້ອຍ 285 ຄົນ ແລະ ມາຮອດປັດຈຸບັນ ຝ່າຍຄ້ານເວເນຊູເອລາຍັງບໍ່ສາມາດນຳເອົາເຄື່ອງຊ່ວຍເຫລືອໃນເບຣຊິນ ແລະ ໂກລົມບີເຂົ້າມາໃນປະເທດໄດ້, ເຖິງວ່າຈະພົ້ນເສັ້ນຕາຍໃນວັນທີ 23 ກຸມພາ. ສ່ວນສະຫະພາບເອີຣົບ ປະນາມລັດຖະບານເວເນຊູເອລາທີ່ໃຊ້ຄວາມຮຸນແຮງ ເພື່ອປິດກັ້ນການຈັດສົ່ງເຄື່ອງຊ່ວຍເຫລືອ. ຂະນະທີ່ ທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ ບອກວ່າ: ຮູ້ສຶກຊັອກ ແລະ ເສຍໃຈຕໍ່ການເສຍຊີວິດຂອງພົນລະເຮືອນຊາວເວເນຊູເອລາ, ສ່ວນທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ກ່າວສະແດງຄວາມໝັ້ນໃຈວ່າ: ເວລາໃນການບໍລິຫານປະເທດຂອງທ່ານ ມາດູໂຣ ເຫລືອອີກບໍ່ດົນ. ຂະນະທີ່ ປະທານາທິບໍດີ ໂດນັລ ທຣຳ ເຄີຍກ່າວເອົາໄວ້ວ່າ: ອາດຈະຕ້ອງມີການໃຊ້ກຳລັງທະຫານເຂົ້າແຊກແຊງບັນຫາພາຍໃນເວເນຊູເອລາ ຖ້າຈຳເປັນ.
