ອາເມລິກາຈະຮັກສາທະຫານ 200 ຄົນ ໃນຊີຣີຫລັງພາລະກິດຖອນທະຫານ
ທຳນຽບຂາວອາເມລິກາ ຖະແຫລງວ່າ: ກອງທັບອາເມລິກາຈະຮັກສາທະຫານປະມານ 200 ຄົນໃນຊີຣີ ພາຍຫລັງປະທານາທິບໍດີ ໂດນັລ ທຣຳ ປະກາດແຜນຖອນທະຫານອອກຈາກຊີຣີ.
ໂຄສົກທຳນຽບຂາວອາເມລິກາ ກ່າວວ່າ: ກອງກຳລັງອາເມລິກາຈະຮັກສາກຳລັງທະຫານຂະໜາດນ້ອຍໄວ້ປະມານ 200 ຄົນໃນຊີຣີໄລຍະເວລາໜຶ່ງ. ຄຳປະກາດດັ່ງກ່າວມີຂຶ້ນ ທ່າມກາງສຽງວິຈານຕຳໜິປະທານາທິບໍດີ ທຣຳ ທີ່ມີແຜນຖອນທະຫານກວ່າ 2.000 ຄົນອອກຈາກຊີຣີພາຍໃນວັນທີ 30 ເມສາ. ທ່ານ ທຣຳ ປະກາດໄຊຊະນະເໜືອກຸ່ມອິສລາມ (IS) ຢູ່ຊີຣີໃນເດືອນທັນວາ, ເຖິງວ່າມີນັກຮົບອີກຫລາຍພັນຄົນຍັງລີ້ຊ້ອນ ແລະ ສູ້ຮົບຢູ່ຊີຣີ. ທ່ານ ແພທຣິກ ຊານາຮານ ຮັກສາການລັດຖະມົນຕີປ້ອງກັນປະເທດອາເມລິກາ ເດີນທາງຢ້ຽມຢາມເອີຣົບ ໃນອາທິດຜ່ານມາ ເພື່ອພະຍາຍາມສ້າງຄວາມໝັ້ນໃຈໃຫ້ປະເທດພັນທະມິດຮັກສາກຳລັງທະຫານໄວ້ໃນຊີຣີ ຫລັງຈາກອາເມລິກາຖອນທະຫານອອກໄປ.
