ຢ່າ​ວັດ​ຄວາມສຸກ​ດ້ວຍ​ເງິນ​ຢ່າງ​ດຽວ

ໂດຍ: ວິ​ເສດ ສະ​ແຫ​ວງສຶກສາ

ຜູ້ຂຽນບັງເອີນໄດ້ອ່ານ ພົບຄໍລຳດີໆ ຈາກເດິເນເຊິນ (The Nation) ໜັງສືພິມ ພາສາອັງກິດສະບັບຕຳນານຂອງໄທ ປະຈຳວັນທີ 24 ມັງ ກອນປີນີ້ເອງ. ມັນເປັນບົດຄວາມທີ່ ອາດຕອບໂຈດຂອງ ຜູ້ທີ່ຍັງສົງໄສວ່າ ເງິນຄືພະເຈົ້າ- ເງິນບັນດານຄວາມສຸກທຸກຢ່າງໃຫ້ຄົນເຮົາໄດ້ ຫລື ບໍ່? ເພາະຜ່ານມາຄົນເຮົາຈຳ ນວນຫລວງຫລາຍຖືເງິນ ເປັນປັດໄຈຕົ້ນຕໍທີ່ໃຫ້ຄວາມ ສຸກຈົນມີຄຳເວົ້າຕິດປາກວ່າ “ມີເງິນປາກໄດ້ໄອດັງ!” ຫລື “ມີເງິນປາກໄດ້ມີໄມ້ເຮັດເຮືອນງາມ” ດັ່ງນີ້ເປັນຕົ້ນ.

ແຕ່ກໍມີຄົນຈຳນວນໜຶ່ງ ອອກຄຳເຫັນທວນກະແສວ່າ ເງິນບໍ່ແມ່ນພະເຈົ້າ, ບໍ່ສາມາດ ບັນດານຄວາມສຸກທຸກຢ່າງ ໃຫ້ຄົນເຮົາໄດ້. ສຸດທ້າຍກໍມີ ຄົນໃນກຸ່ມສາຍກາງທີ່ບອກ ວ່າ “ມີເງິນແຮໄວ້ຈະອຸ່ນໃຈ ເຮັດໃຫ້ມີກຳລັງຕໍ່ລອງໃນຊີວິດຫລາຍຂຶ້ນ”.

ບັດນີ້ມາຟັງຜົນສຳ ຫລວດຂອງໄທເລື່ອງຄວາມສຸກອັນແທ້ຈິງຂອງຄົນໄທ ໃນນະຄອນຫລວງບາງກອກກັບບັນດາແຂວງບອກວ່າ ການມີເງິນຫລາຍຫລືໜ້ອຍ ນັ້ນແມ່ນໃຜມີຄວາມສຸກກວ່າກັນ? ບົດຄວາມມີຊື່ເປັນອັງກິດແປເປັນລາວໄດ້ຄວາມ ໝາຍຈັ່ງຊີ້: “ຜົນການສຳ ຫລວດ ບອກຢ່າງຈະແຈ້ງວ່າ ເງິນບໍ່ສາມາດຊື້ຄວາມສຸກ ສຳລັບຊາວບາງກອກໄດ້” ອ່ານແຕ່ຊື່ບົດກໍຮູ້ໂລດວ່າ ຄົນ ໃນເມືອງຫລວງເຖິງຈະມີ ເງິນລົ້ນຖົງແຕ່ກໍບໍ່ມີຄວາມ ສຸກສົມກັບຈຳນວນເງິນທີ່ມີ.

ຜົນການສຳຫລວດທີ່ ສຳເລັດລົງໃນອາທິດທີ 3 ຂອງເດືອນມັງກອນປີນີ້ ໄດ້ຊີ້ອອກວ່າຄົນໃນນະຄອນຫລວງບາງກອກມີລາຍຮັບສູງສຸດທຽບກັບຄົນຢູ່ບັນດາ ແຂວງນອກຄືໂດຍສະເລ່ຍ ແລ້ວແຕ່ລະຄອບຄົວມີລາຍ ໄດ້ 29.300 ບາດຕໍ່ເດືອນ ແຕ່ລະດັບຄວາມສຸກຂອງຄົນ ພັດຕ່ຳສຸດໃນປະເທດ.

ຄະແນນຄວາມສຸກຂອງບັ້ນສຳຫລວດນັ້ນແມ່ນ 1 ເຖິງ 5. ຄະແນນຄວາມສຸກຂອງ ຊາວບາງກອກຢູ່ໃນລະດັບ 3,59 ຄົນໃນບັນດາແຂວງ ຕາເວັນອອກສຽງເໜືອ (ອີສານ) ນັ້ນຄອບຄົວໜຶ່ງມີລາຍຮັບປະມານ 10.800 ບາດຕໍ່ເດືອນ, ແຕ່ລະດັບ  ຄວາມສຸກນັ້ນຢູ່ຕົວເລກ 3,8, ຄອບຄົວໃນບັນດາ ແຂວງພາກກາງ (ລວມທັງ ບາງກອກ) ມີລາຍຮັບໂດຍ ສະເລ່ຍ 17.600 ບາດຕໍ່ ເດືອນສ່ວນລະດັບຄວາມ   ສຸກນັ້ນຢຸດຢູ່ຕົວເລກ 3,72. ໃນພາກເໜືອແຕ່ລະຄອບ ຄົວມີລາຍໄດ້ສະເລ່ຍຕໍ່ ເດືອນ 14.300 ບາດ ສ່ວນ ລະດັບຄວາມສຸກນັ້ນແມ່ນ 3,74 ລາຍຮັບໂດຍສະເລ່ຍ ຂອງຄອບຄົວໄທໃນພາກໃຕ້ນັ້ນແມ່ນ 20.000 ບາດຕໍ່ ເດືອນ, ລະດັບຄວາມສຸກນັ້ນ ພັດສູງຄືຢູ່ໃນຕົວເລກ 3,84.

ສຳລັບສ່ວນບຸກຄົນທີ່ມີ ຄວາມສຸກໜ້ອຍທີ່ສຸດໃນປະ ເທດໄທນັ້ນແມ່ນຍິງໝ້າຍ ທີ່ມີອາຍຸສູງ, ຖັດມາກໍແມ່ນ ເດັກນ້ອຍທີ່ຖືກປະໄວ້ຢູ່ນຳ ພີ່ນ້ອງຍ້ອນພໍ່ແມ່ອອກໄປ ເຮັດວຽກຢູ່ເຂດໄກ. ເງື່ອນ ໄຂທີ່ໃຊ້ເປັນໂຕຊີ້ວັດບັນຫາ ທີ່ພາໃຫ້ບໍ່ມີຄວາມສຸກໃນ ການສຳຫລວດຄັ້ງນີ້ປະ   ກອບມີສາຍພົວພັນ ເຊິ່ງກັນ ແລະ ກັນ, ບົດບາດ ແລະ ພັນ ທະ, ຖານະທາງເສດຖະກິດ, ການເພິ່ງພາຕົນເອງ, ສະ  ພາບຄວາມກົມກຽວໃນປະ ຊາຄົມ, ການພັດທະນາທາງ ດ້ານຈິດໃຈ, ການສຶກສາ, ການເບິ່ງແຍ່ງສຸຂະພາບ   ແລະ  ການເປັນຢູ່ທີ່ພຽງພໍ.

ຕົວຊີ້ວັດທີ່ໄດ້ຄະແນນ ຕ່ຳສຸດແມ່ນຖານະຫລືສະ ພາບເສດຖະກິດ. ບົດຄວາມບອກວ່າ ເຫດຜົນທີ່ຊາວບາງກອກມີຄວາມສຸກໜ້ອຍ ທີ່ສຸດນັ້ນ ແມ່ນມາຈາກສະພາບການຈາລະຈອນຕິດຂັດຮ້າຍແຮງເຮັດໃຫ້ການ ເດີນທາງຊັກຊ້າອິດເມື່ອຍ ແລະ ເສຍເວລາ, ການພົວ ພັນລະຫວ່າງຄົນໃນຄອບຄົວ ນັ້ນມີໜ້ອຍແຕ່ຮ້າຍແຮງທີ່ສຸດແມ່ນບັນຫາມົນພາວະທີ່ເປັນເພັດຊະຄາດສັງຫານ ຄວາມສຸກຂອງຄົນໃນນະຄອນຫລວງ.

ການສຳຫລວດລະດັບ ຄວາມສຸກຂອງຄົນໄທຄັ້ງ ນີ້ມີຈຸດປະສົງເນັ້ນຄວາມສຳ ຄັນຂອງຄວາມສົມດູນລະຫວ່າງຊີວິດ ແລະ ການງານ ແລະ ເພື່ອໃຫ້ບັນດາອົງການທີ່ກ່ຽວຂ້ອງໃຫ້ການຊ່ວຍເຫລືອຄົນໃນກຸ່ມອາຍຸ ທີ່ມີບັນຫາ.

ຢູ່ບ້ານເຮົາກໍຢາກໃຫ້ມີການສຳຫລວດແນວນີ້  ເຊັ່ນກັນເພື່ອໃຫ້ຮູ້ວ່າ ຄົນໃນນະຄອນຫລວງວຽງຈັນທີ່ຖົງຕື່ງກັບຄົນຖົງແວບຢູ່ບ້ານນອກນັ້ນແມ່ນໃຜແທ້ທີ່ມີຄວາມສຸກຫລາຍກວ່າກັນ?./.