ສປປ ລາວ ຕີລາຄາສູງຕໍ່ການມາຢ້ຽມຢາມລາວຂອງເລຂາທິການໃຫຍ່ ປະທານປະເທດ ແຫ່ງ ສສ ຫວຽດນາມ
ລັດຖະບານລາວ ຕີລາຄາສູງ ຕໍ່ການຈະເດີນທາງມາຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການຂອງ ສະຫາຍ ຫງວຽນ ຝູ ຈ້ອງ ເລຂາທິການໃຫຍ່, ປະທານປະເທດ ແຫ່ງ ສສ ຫວຽດນາມ,ເຊິ່ງຈະມີຂຶ້ນໃນວັນທີ 24-25 ກຸມພານີ້ ທີ່ນະຄອນຫລວງວຽງຈັນ.
ໃນໂອກາດໃຫ້ສຳພາດຕໍ່ສື່ມວນຊົນລາວ ແລະ ຫວຽດນາມ ໃນວັນທີ 20 ກຸມພານີ້, ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ, ທັງເປັນປະທານຄະນະກຳມະການຮ່ວມມື ລາວ-ຫວຽດນາມ ໃຫ້ຮູ້ວ່າ: ການມາຢ້ຽມຢາມ ສປປ ລາວ ຂອງສະຫາຍ ຫງວຽນ ຝູ ຈ້ອງ ຄັ້ງນີ້ມັນມີຄວາມໝາຍສຳຄັນຍິ່ງ ໃນການເຄື່ອນໄຫວຢ້ຽມຢາມຕ່າງປະເທດຄັ້ງທຳອິດ ໃນການດຳລົງຕຳແໜ່ງ ເປັນເລຂາທິການໃຫຍ່ ທັງເປັນປະທານປະເທດ ສສ ຫວຽດນາມ ພ້ອມຈະເປັນການປະກອບສ່ວນສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບ ດ້ານລະຫວ່າງສອງປະເທດໃຫ້ນັບມື້ແຕກດອກອອກຜົນເຂົ້າສູ່ລວງເລິກ ແລະ ມີປະສິດທິຜົນຍິ່ງຂຶ້ນຢ່າງບໍ່ຢຸດຢັ້ງ ແລະ ເປັນເງື່ອນໄຂພື້ນຖານເພື່ອຂຸດຄົ້ນທ່າແຮງບົ່ມຊ້ອນແກ່ສອງຝ່າຍກ່ຽວກັບການຮ່ວມມືລົງທຶນ ລະຫວ່າງສອງປະເທດໃຫ້ສອດຄ່ອງກັບສະພາບການໃນໄລຍະໃໝ່, ເຊິ່ງໂອກາດດັ່ງກ່າວ ສອງຝ່າຍຈະໄດ້ລົງນາມຮ່ວມກັນໃນເອກະສານຫລາຍສະບັບທີ່ມີຄວາມໝາຍຄວາມສໍາ ຄັນຕໍ່ກັບການຮ່ວມມືຂອງສອງປະເທດ ເພື່ອຊຸກຍູ້ເສີມຂະຫຍາຍການພົວພັນຮ່ວມມືກັນໃນຕໍ່ໜ້າ ແລະ ຈະໄດ້ສຸມໃສ່ສືບຜັນຂະຫຍາຍຂໍ້ຕົກລົງຂອງການ ນໍາຂັ້ນຂອງສອງພັກ-ລັດ ໃຫ້ປະກົດຜົນເປັນຈິງ, ສ້າງບາດກ້າວບຸກທະລຸໃໝ່ ໃຫ້ແກ່ການພົວພັນແບບພິເສດ, ການຮ່ວມມືຮອບດ້ານລະຫວ່າງສອງປະເທດ ແລະ ການຊື້-ຂາຍໄຟຟ້າ ຈາກລາວ ເປັນການສ້າງວຽກເຮັດ ແລະ ສ້າງລາຍ ໄດ້ໃຫ້ແກ່ປະຊາຊົນສອງຊາດ ລາວ-ຫວຽດນາມໃນອານາຄົດອີກດ້ວຍ.
ໃນໂອກາດອັນສະຫງ່າລາສີນີ້, ຂ້າພະເຈົ້າຕາງໜ້າໃຫ້ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງຕໍ່ພັກ-ລັດຖະບານ ແລະ ປະຊາຊົນຫວຽດນາມ, ເຊິ່ງຍາມໃດກໍເຊີດຊູນໍ້າໃຈສາກົນອັນຜ່ອງໃສ, ຄວາມສາມັກຄີພິເສດ ໃຫ້ການສະໜັບສະໜູນຊ່ວຍເຫລືອອັນໃຫຍ່ຫລວງ, ມີຜົນສັກສິດ ແລະ ທັນການແກ່ ສປປ ລາວ ໃນການສ້າງສາພັດທະນາປະເທດຊາດຂອງພວກຂ້າພະເຈົ້າຕະຫລອດມາ; ການມາຢ້ຽມຢາມສັນທະວະໄມຕີ ສປປ ລາວ ຂອງສະຫາຍ ຫງວຽນ ຝູ ຈ້ອງ, ເລຂາທິການໃຫຍ່, ປະທານປະເທດ ແຫ່ງ ສສ ຫວຽດນາມ ໃນຄັ້ງນີ້ ກໍແມ່ນໄດ້ສະແດງເຖິງນໍ້າໃຈມິດຕະພາບອັນຍິ່ງໃຫຍ່, ສຄວາມສາມັກຄີພິເສດ ອັນເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ ໄດ້ຢືນຍົງຄົງຕົວຕະຫລອດກາລະນາ.
