ຈີນສັ່ງຈຳຄຸກຕະຫລອດຊີວິດ ອະດີດນາຍທະຫານຮັບສິນບົນ
ສານທະຫານຂອງຈີນ ສັ່ງລົງໂທດ ພົນເອກ ຟາງ ເຟິງຮຸຍ ອະດີດທະຫານລະດັບສູງ ຈຳຄຸກຕະຫລອດຊີວິດ ຈາກຄວາມຜິດຮັບສິນບົນ ແລະ ຄອບຄອງຊັບສິນມະຫາສານບໍ່ສາມາດບອກທີ່ມາໄດ້.
ພົນເອກ ຟາງ ຖືກປົດຈາກຕຳແໜ່ງປະທານເສນາທິການທະຫານ ກອງທັບປົດແອກປະຊາຊົນຈີນ (PLA) ໃນເດືອນສິງຫາ 2017. ຕໍ່ມາ ທາງການຈີນ ຢືນຢັນວ່າ: ພົນເອກ ຟາງ ຖືກສອບສວນຂໍ້ຫາທຸຈະລິດ ແລະ ຖືກປົດອອກຈາກສະມາຊິກພັກກອມມູນິດ ແລະ ຖືກປົດຈາກຄະນະກຳມະການກາງທະຫານ ທີ່ມີປະທານປະເທດ ສີ ຈິ້ນຜິງ ເປັນປະທານ ໃນເດືອນຕຸລາປີດຽວກັນ.
ສຳນັກຂ່າວຊິນຮົວ ລາຍງານວ່າ: ສານທະຫານຍັງສັ່ງຕັດສິດທາງການເມືອງຕະຫລອດຊີວິດ ແລະ ສັ່ງຍຶດຊັບສິນທັງໝົດ, ແຕ່ບໍ່ໄດ້ລະບຸຈຳນວນ ແລະ ບໍ່ມີການເປີດເຜີຍລາຍລະອຽດກ່ຽວກັບການພິຈາລະນາຄະດີ.
ສ່ວນກອງທັບ ລະບຸກ່ອນໜ້ານີ້ວ່າ: ພົນເອກ ຟາງ ຝ່າຝືນວິໄນການເມືອງ ແລະ ກົດຂອງພັກ ແລະ ກອງທັບຢ່າງຮ້າຍແຮງ, ທີມສອບສວນ ລະບຸວ່າ: ການກະທຳຂອງ ພົນເອກ ຟາງ ໂຫດຮ້າຍ ແລະ ປະລິມານເງິນທີ່ກ່ຽວຂ້ອງກັບຄະດີ “ມະຫາສານ”, ທ່ານບໍ່ມີຄວາມຈົງຮັກພັກດີ ແລະ ຊື່ສັດຕໍ່ພັກ, ມີແນວຄິດທຳລາຍພັກກອມມູນິດ ແລະ ເຮັດໃຫ້ພາບພົດຂອງກອງທັບໝົ່ນໝອງ.
ພົນເອກ ຟາງ ອາຍຸ 67 ປີ ມາຈາກແຂວງສ່ານຊີ ເຂົ້າເປັນທະຫານໃນສັງກັດກອງກຳລັງພາກພື້ນດິນ ໃນປີ 1968 ກ່ອນເລື່ອນຕຳແໜ່ງຂຶ້ນເລື້ອຍໆຕະຫລອດ 30 ປີໃນຫລາຍໜ່ວຍທະຫານທາງຕາເວັນຕົກສຽງເໜືອຂອງຈີນ, ກ່ອນດຳລົງຕຳແໜ່ງປະທານເສນາທິການ ກອງບັນຊາການທະຫານກວາງໂຈ ໃນປີ 2003 ແລະ ຂຶ້ນເປັນຜູ້ບັນຊາການກອງບັນຊາການປັກກິ່ງໃນ 4 ປີຕໍ່ມາ, ຕິດຍົດ ພົນເອກ ໃນປີ 2010 ແລະ ໃນປີ 2012 ໄດ້ຮັບແຕ່ງຕັ້ງເປັນປະທານເສນາທິການກອງທັບຈີນ ແລະ ເປັນໜຶ່ງໃນຄະນະກຳມະການກາງທະຫານ.
