ແຂວງເຊກອງປະກາດແຕ່ງຕັ້ງຫົວໜ້າພະແນກ ການເງິນ ແລະ ຄັງເງິນຄົນໃໝ່

     ແຂວງເຊກອງໄດ້ຈັດພິທີປະກາດການແຕ່ງຕັ້ງ, ຍົກຍ້າຍ ແລະ ອະນຸມັດໃຫ້ພະນັກງານພັກການຮັບອຸດໜູນບໍານານຂຶ້ນໃນວັນທີ 18 ກຸມພານີ້ ທີ່ສະໂມ ສອນເມືອງລະມາມ, ໂດຍມີທ່ານ ຄໍາເຜີຍ ບຸດດາວຽງ ເຈົ້າແຂວງເຊກອງ ເຂົ້າຮ່ວມເພື່ອປະຕິບັດຕາມຂໍ້ຕົກລົງຂອງລັດຖະມົນຕີກະຊວງການເງິນ ແລະ ຂໍ້ຕົກລົງຂອງທ່ານເຈົ້າແຂວງເຊກອງ, ໂດຍໄດ້ຕົກລົງອະນຸມັດໃຫ້ທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງເຊກອງ, ທ່ານ ນາງ ອ່ອນນັນ ພົມມະຫາໄຊ ຫົວໜ້າຄັງເງິນແຫ່ງຊາດປະຈໍາແຂວງ ພັກການຮັບອຸດໜູນບໍານານ ແລະ ຕົກລົງແຕ່ງຕັ້ງທ່ານ ຄໍາຮູ້ ອ່ອນມະນີ ຮອງຫົວໜ້າພະແນກການເງິນແຂວງຂຶ້ນ ເປັນຫົວໜ້າພະແນກການເງິນແຂວງຄົນໃໝ່ ແຕ່ງຕັ້ງທ່ານ ສຸກັນ ວໍລະປັນໄຊ ຮອງຫົວໜ້າກວດກາພາສີປະຈໍາແຂວງ ເປັນຮອງຫົວໜ້າພະແນກການເງິນແຂວງ ແລະ ແຕ່ງຕັ້ງທ່ານ ກໍລະກັນ ສົມບູນທິບ ຮອງຫົວໜ້າຄັງເງິນແຫ່ງຊາດປະຈໍາແຂວງຂຶ້ນເປັນຫົວໜ້າຄັງເງິນແຫ່ງຊາດປະຈໍາແຂວງ.

     ໃນໂອກາດນີ້, ທ່ານ ເຈົ້າແຂວງເຊກອງໄດ້ສະແດງຄວາມຍ້ອງຍໍຊົມເຊີຍ ແລະ ເນັ້ນໃຫ້ຜູ້ທີ່ໄດ້ຮັບການແຕ່ງຕັ້ງຈົ່ງສືບຕໍ່ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ຖັນແຖວພະນັກງານ-ສະມາຊິກພັກຢ່າງຕັ້ງໜ້າ, ສືບຕໍ່ຍົກລະດັບຄວາມຮູ້ໃຫ້ພະນັກງານມີວິໄນ, ມີຈັນຍາບັນ ແລະ ຈັນຍາທໍາຕໍ່ໜ້າທີ່ວຽກງານຂອງຕົນ ແລະ ຕີຖອຍປະກົດການຫຍໍ້ທໍ້ຕ່າງໆໃນຂະແໜງການເງິນໃຫ້ກ້າວໄປເທື່ອລະກ້າວ.