ໂຣເບີດສັນ ຄວ້າແຊ້ມສະນຸກເກີ ເວລ ໂອເພັນ 2019
ການແຂ່ງຂັນສະນຸກເກີລະດັບສາກົນ ລາຍການ ເວລ ໂອເພັນ 2019 ທີ່ນະຄອນຫລວງຄາດິຟ ປະເທດເວລ ໃນວັນທີ 11-17 ກຸມພານີ້ ຊີງເງິນລາງວັນລວມ 366.000 ປອນ. ຮອບຊີງຊະນະເລີດ ໃນວັນທີ 17 ກຸມພາຜ່ານມາ ນຽວ ໂຣເບີດສັນ ແຊ້ມປີ 2007 ຈາກອົດສະຕຣາລີ ມື 10 ຂອງລາຍການ ເອົາຊະນະ ສະຈ໊ວດ ບິງແຮມ ມື 12 ຂອງລາຍການ ຈາກອັງກິດ ແຊ້ມປີ 2017 ແບບສຸດມັນ 9-7 ເຟຣມ ພາກທີ 1 ຈຳນວນ 8 ເຟຣມທຳອິດ ນຽວ ໂຣເບີດສັນ ຂຶ້ນນຳ 5-3 ເຟຣມ.
ພາກທີ 2 ຈຳນວນ 9 ເຟຣມສຸດທ້າຍ ສະຈ໊ວດ ບິງແຮມ ໄລ່ຕີສະເໝີ 7-7 ເຟຣມ ແຕ່ 2 ເຟຣມສຸດທ້າຍເປັນ ນຽວ ໂຣເບີດສັນ ສາມາດກັບມາເກັບໄດ້ ເອົາຊະນະ 9-7 ເຟຣມ ຄວ້າແຊ້ມມາຄອງເປັນສະໄໝທີ 2 ຕໍ່ຈາກປີ 2007 ຮັບຂັນແຊ້ມ ພ້ອມເງິນລາງວັນ 70.000 ປອນ. ພ້ອມກັນນີ້ ກໍໄດ້ເພີ່ມອີກ 85.000 ປອນ ຈາກການເຮັດ Maximum Break ເທົ່າກັບ ນົບພົນ ແສງຄຳ ຈາກໄທ, ສ່ວນຮອງແຊ້ມລາຍການນີ້ໄດ້ຮັບ 30.000 ປອນ.
ໂຣເບີດສັນ ໄດ້ແຊ້ມສະນຸກເກີລະດັບສາກົນ ເປັນລາຍການທີ 24 ໃນຊີວິດ ແລະ ເປັນລາຍການທີ 15 ສະນຸກເກີ້ລະດັບສະສົມຄະແນນໂລກ. ສຳລັບການແຂ່ງຂັນລາຍການຕໍ່ໄປໃນອາທິດນີ້ ເປັນເລາຍການ Shoot-out ທີ່ວັດຟ໋ອດ ປະເທດອັງກິດ ຊີງເງິນລາງວັນລວມ 146.000 ປອນ.
