ຕໍາຫລວດ (ຕມ) ຈະຍົກສູງຄຸນນະ ພາບການປະຕິບັດໜ້າທີ່ໃຫ້ດີກວ່າເກົ່າ

  ທ່ານພັນໂທ ສາຍສະໝິງ ສີວິໄລ ຫົວໜ້າກົມຕໍາຫລວດກວດຄົນເຂົ້າ-ອອກ ເມືອງ (ຕມ) ກະຊວງປ້ອງກັນຄວາມສະຫງົບ ໃຫ້ຮູ້ວ່າ: ຈະສືບຕໍ່ຍົກສູງຄຸນນະພາບການປະຕິບັດໜ້າທີ່ໃຫ້ດີກວ່າເກົ່າ, ພາຍຫລັງເຫັນວ່າເປັນສ່ວນສໍາຄັນຂອງການຕ້ອນຮັບແຂກຕ່າງປະເທດເຂົ້າມາ ສປປ ລາວ ດ້ວຍຄວາມສະດວກວ່ອງໄວ ຄື:ໃນຕໍ່ໜ້ານີ້, ຈະເລັ່ງສ້າງບຸກຄະລາກອນໃຫ້ມີຄຸນນະພາບ, ໂດຍສຸມໃສ່ຍົກລະດັບຄວາມຮູ້, ຄວາມສາມາດວຽກງານວິຊາສະເພາະ ແລະ ເພີ່ມທະວີເອົາໃຈໃສ່ບໍາລຸງພາສາຕ່າງປະເທດ ເພື່ອສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໄລຍະໃໝ່ ກໍຄືໃຫ້ບໍລິການປະຊາຊົນເຂົ້າ-ອອກປະເທດ ຫລື ຜູ້ເດີນທາງມາທ່ອງທ່ຽວ ສປປ ລາວ ໃຫ້ສະດວກວ່ອງໄວ, ທັງຮັບປະກັນຄວາມຖືກຕ້ອງຕາມລະບຽບກົດໝາຍ.

  ແນວໃດກໍຕາມ, ຕາມການສະຫລຸບວຽກງານສົ່ງເສີມປີທ່ອງທ່ຽວລາວ 2018 ຜ່ານມານີ້, ຊຶ່ງເຫັນວ່າຕົວເລກນັກທ່ອງທ່ຽວເຂົ້າມາຫລຸດຄາດໝາຍວາງໄວ້ຄື 5 ລ້ານເທື່ອຄົນ ແລະ ໜຶ່ງໃນສາເຫດທີ່ພາໃຫ້ບໍ່ສາມາດບັນລຸຕົວເລກດັ່ງກ່າວແມ່ນການກວດກາການເຂົ້າ-ອອກເມືອງມີຄວາມຊັກຊ້າ, ການກວດກາປັບໃໝເອົາເງິນຈາກນັກທ່ອງທ່ຽວຂອງເຈົ້າໜ້າທີ່ຕາມເສັ້ນທາງ, ຕາມສະຖານທີ່ທ່ອງທ່ຽວ ແລະ ເກັບຄ່າທໍານຽມ-ຄ່າບໍລິການຕ່າງໆຢູ່ແຕ່ລະດ່ານບໍ່ເປັນເອກະພາບ, ຊຶ່ງບັນຫານີ້ ຂະແໜງການກ່ຽວຂ້ອງໄດ້ສະເໜີລັດຖະບານມີມາດຕະການແກ້ໄຂໂດຍໄວ.