ຍົກລະດັບຄວາມຮູ້ໃຫ້ຜູ້ຊ່ວຍພິພາກສາທົ່ວປະເທດ

  ຜູ້ຊ່ວຍພິພາກສາເກືອບຮ້ອຍຄົນທີ່ມາຈາກສານປະຊາຊົນສູງສຸດ, ສານພາກ, ສານເຂດ, ສານທະຫານ ແລະ ສານແຂວງ ໃນທົ່ວປະເທດ, ໄດ້ເຂົ້າຮ່ວມຍົກລະດັບຄວາມຮູ້ກ່ຽວກັບການດໍາເນີນຄະດີໃຫ້ຖືກຕ້ອງຕາມລະບຽບກົດໝາຍ, ພາຍຫລັງເຫັນວ່າວຽກງານດັ່ງກ່າວມີຄວາມສໍາຄັນຕໍ່ການສ້າງຄວາມເຊື່ອໝັ້ນໃຫ້ສັງຄົມໃນລະບົບຍຸຕິທໍາຢູ່ປະເທດເຮົາ, ໂດຍສະເພາະແມ່ນສ້າງຄວາມ ເພິ່ງພໍໃຈຕໍ່ຄູ່ຄວາມໃນຄະດີຕ່າງໆ.

  ວ່າການຫົວໜ້າສະຖາບັນຄົ້ນຄວ້າ ແລະ ຝຶກອົບຮົມສານປະຊາຊົນສູງສຸດ ໃຫ້ຮູ້ວ່າ: ຊຸດອົບຮົມນີ້ຈະດໍາເນີນໄປແຕ່ວັນທີ 11-31 ກຸມພານີ້, ຊຶ່ງຜູ້ເຂົ້າຮ່ວມຈະໄດ້ຮຽນຮູ້ເຊື່ອມຊືມທາງດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ຈັນຍາບັນ-ຈັນຍາທໍາຂອງຜູ້ຊ່ວຍພິພາກສາ, ຄົ້ນຄວ້າຮໍ່າຮຽນສໍານວນຄະດີ, ການເອົາຄໍາໃຫ້ການ, ການຊັ່ງຊາຕີລາຄາຫລັກຖານ, ການໄກ່ເກ່ຍ, ການຂຽນຄໍາຕັດສີນ ແລະ ວຽກງານອື່ນໆ ເພື່ອໃຫ້ການປະຕິບັດໜ້າທີ່ຂອງຜູ້ຊ່ວຍພິພາກສາມີປະສິດທິພາບ, ຖືກຕ້ອງຕາມລະບຽບຫລັກການ, ມີຈັນຍາທໍາ ແລະ ເປັນທີ່ຍອມຮັບຂອງຄູ່ຄວາມ ກໍຄືປະຊາຊົນ.

   ຊຸດອົບຮົມນີ້, ຈັດໂດຍສານປະຊາຊົນສູງສຸດຮ່ວມກັບສະຖາບັນຊ່ວຍເຫລືອດ້ານກົດໝາຍ ແລະ ວິຊາການ (ລຸກຊໍາບວກ), ໂດຍການກ່າວເປີດຂອງທ່ານ ຄໍາພາ ແສງດາລາ ຮອງປະທານສານປະຊາຊົນສູງສຸດ.