ກອງປະຊຸມສະຫະພາບອາຟຣິກາເນັ້ນຫາລື ເລື່ອງຜູ້ລີ້ໄພ, ສັນຕິພາບ ແລະ ຄວາມໝັ້ນຄົງ
ກອງປະຊຸມສຸດຍອດສະຫະພາບອາຟຣິກາ (AU) ຄັ້ງທີ 23 ເລີ່ມຂຶ້ນແລ້ວຢູ່ນະຄອນຫລວງແອດດິສອາບາບາ ຂອງເອທິໂອປີ ໃນວັນທີ 10 ກຸມພາ ຕາມເວລາທ້ອງຖິ່ນ ເພື່ອຫາລືບັນຫາສຳຄັນໃນພາກພື້ນເຊັ່ນ: ການບັງຄັບອົບພະຍົບຍ້າຍຖິ່ນຖານ, ສັນຕິພາບ ແລະ ຄວາມໝັ້ນຄົງ.
ຜູ້ນຳປະເທດສະມາຊິກ AU ໃນກອງປະຊຸມໄລຍະເວລາ 2 ວັນ ມີບັນຫາຫາລືເລື່ອງການປະຕິຮູບອົງການສະຫະພາບອາຟຣິກາ ແລະ ເຂດການຄ້ເສລີໃນພາກພື້ນ. ທ່ານ ມຸສຊາ ຟາກີ ມະຮະໝັດ ປະທານຄະນະກຳມາທິການສະຫະພາບອາຟຣິກາ ກ່າວໃນໂອກາດເປີດກອງປະຊຸມເຖິງບັນຫາການບັງຄັບອົບພະຍົບຍ້າຍຖິ່ນຖານໃນອາຟຣິກາ ເຊິ່ງຖືເປັນບັນຫາທີ່ສຳຄັນ ແລະ ຈຳເປັນຕ້ອງແກ້ໄຂໃຫ້ເຖິງສາເຫດທີ່ມາ, ສອດຄ່ອງກັບຫລັກປະຕິບັດຂອງໜ່ວຍງານດ້ານມະນຸດສະທຳໃນອາຟຣິກາ. ທາງດ້ານທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ ຫວັງວ່າ: ຈະໄດ້ຮ່ວມມືກັນຫລາຍຂຶ້ນ ເພື່ອສັນຕິພາບໃນອາຟຣິກາ ເພື່ອສົ່ງເສີມພາລະກິດຮັກສາສັນຕິພາບຂອງ UN ໃຫ້ມີປະສິດທິພາບ, ເຄື່ອງມືທີ່ດີ, ປອດໄພຂຶ້ນ ແລະ ແຂງແຮງຂຶ້ນ.
