ລັດຖະບານເລັງປັບປຸງຄວາມສະດວກໃນການດໍາເນີນທຸລະກິດ ແລະ ການລົງທຶນຢູລາວ
ໃນວັນທີ 7 ກຸມພານີ້, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປັບປຸງຄວາມສະດວກໃນການດໍາເນີນທຸລະກິດ ແລະ ການລົງທຶນ ຢູ່ລາວ ຕາມຄໍາສັ່ງເລກທີ 02/ນຍ ໂດຍການເຂົ້າຮ່ວມຂອງ ທ່ານ ຄໍາລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ນິໂຄລາ ພອນທາຣາ ຫົວໜ້າຫ້ອງການທະນາຄານໂລກ ປະຈໍາລາວ ແລະ ທ່ານ ນາງ ວາລີ ເວດຊະພົງ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ ເຂົ້າຮ່ວມນໍາດ້ວຍ.
ໃນກອງປະຊຸມໄດ້ຮັບຟັງລາຍງານກ່ຽວກັບລະບຽບການ ແລະ ນິຕິກໍາຕ່າງໆ ທີ່ໄດ້ຮັບການປັບປຸງອໍານວຍຄວາມສະດວກແກ່ການດໍາເນີນທຸລະກິດຢູ່ລາວຄື: ດໍາລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດ ຈະການສໍາປະທານຂອງລາວ ເພື່ອອໍານວຍຄວາມສະດວກໃຫ້ແກ່ການອະນຸ ຍາດລົງທຶນໄວຂຶ້ນ, ນະໂຍບາຍດ້ານພາສີ, ອາກອນມູນຄ່າເພີ່ມສໍາລັບແຜນນໍາເຂົ້າຂອງວິສາຫະກິດໃຫ້ຮັດກຸມວ່ອງໄວ ແລະ ໂປ່ງໃສ ກວ່າເກົ່າຄື: ການອອກເລກປະຈໍາຕົວຜູ້ເສຍອາກອນພ້ອມກັບໃບທະບຽນວິ ສາຫະກິດເລີຍ, ການຍົກເລີກໃບອະນຸຍາດຄວັດກາປະທັບ ແລະ ບໍ່ມີຂັ້ນຕອນຂໍອະນຸຍາດນໍາໃຊ້ກາປະທັບອີກ.
ທ່ານ ຮອງລັດຖະມົນຕີກະຊວງ ແຜນການ ແລະ ການລົງທຶນ ໄດ້ກ່າວວ່າ: ລັດຖະບານຈະສືບຕໍ່ຄົ້ນຄວ້າປັບປຸງ ແລະ ອອກລະບຽບການຕ່າງໆທີ່ຈໍາເປັນ ເພື່ອເຮັດໃຫ້ການດໍາເນີນທຸລະກິດມີຄວາມສະດວກ. ພ້ອມທັງພັດທະນາເຄື່ອງມືໃນການຕິດຕາມຂອງຂະແໜງການກ່ຽວຂ້ອງໃຫ້ມີຄວາມວ່ອງໄວ, ໂປ່ງໃສ ແລະ ມີຜົນສັກສິດ. ຕ້ອງໄດ້ປະສານກັບພາກທຸລະກິດ ແລະ ຟັງຄໍາສະເໜີຂອງເຂົາເຈົ້າຢູ່ສະເໝີເພື່ອປຶກສາຫາລື ແລະ ຊອກຫາວິທີແກ້ໄຂເພື່ອທັງສອງຝ່າຍໄດ້ຮັບຜົນປະໂຫຍດຮ່ວມກັນ.
ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ ໄດ້ເນັ້ນຕື່ມວ່າ: ຄວາມພະຍາຍາມຂອງລັດຖະບານໃນການປັບປຸງ 10 ຕົວຊີ້ວັດໃນການດໍາເນີນທຸລະກິດນີ້, ບໍ່ພຽງແຕ່ຈະເຮັດໃຫ້ອັນດັບຂອງລາວດີຂຶ້ນ ແຕ່ຍັງສົ່ງຜົນຕໍ່ສະພາບແວດລ້ອມການລົງທຶນໂດຍລວມ ເຊິ່ງທາງສະພາການຄ້າ ແລະ ອຸດສາຫະກໍາແຫ່ງຊາດ ກໍຈະປະກອບສ່ວນເປັນແຮງໜຶ່ງ ໃນການລະດົມພາກທຸລະກິດ ໃຫ້ມີຄວາມຮັບຮູ້ ແລະ ເຂົ້າໃຈກ່ຽວກັບນິຕິກໍາ ແລະ ລະບຽບການຕ່າງໆທີ່ໄດ້ຮັບການປັບປຸງ ແລະ ສະໜອງຂໍ້ຄິດເຫັນຂອງ ພາກທຸລະກິດ ເພື່ອຊ່ວຍລັດຖະບານໃນການວາງນະໂຍບາຍໃຫ້ຖືກຕ້ອງ.
