ພ້ອມກັນຫັນນ໋ອດເຄັ່ງໂສ້
ໂດຍ: ກ້ອງສ່ອງ ອິດສະຫລະ
ຄືດັ່ງພວກເຮົາຮັບຮູ້ນຳກັນແລ້ວວ່າ: ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ຫາກໍຈົບລົງໝາດໆ. ເທົ່າທີ່ຜູ້ຂຽນໄດ້ຕິດຕາມກອງປະຊຸມຄັ້ງນີ້ເຫັນວ່າມັນມີຄວາມໝາຍທາງດ້ານປະຫວັດສາດ ທັງໄດ້ຮັບໝາກຮັບຜົນ ແລະ ເປັນໄປຕາມແຜນການທີ່ໄດ້ຄາດກະເອົາໄວ້ ເຊິ່ງສະແດງອອກຄື: ກອງປະຊຸມໄດ້ຮັບຟັງການລາຍງານໂດຍສັງເຂບຂອງທ່ານນາຍົກລັດຖະມົນຕີ ທອງລຸນ ສີສຸລິດ ກ່ຽວກັບຜົນການຈັດຕັ້ງປະຕິບັດວຽກງານຈຸດສຸມໃນໄລຍະ 6 ເດືອນຜ່ານມາ ແລະ ໄດ້ຮັບຟັງທິດທາງແຜນການວຽກຈຸດສຸມໃນ 6 ເດືອນຕໍ່ໜ້າ, ຮັບຟັງການລາຍງານຈາກທ່ານຮອງນາຍົກລັດຖະມົນຕີ ສົມດີ ດວງດີ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2016 ແລະ ຜັນຂະຫຍາຍການຈັດຕັ້ງປະຕິບັດແຜນປີ 2017, ຜົນການຈັດຕັ້ງປະຕິບັດແຜນງົບປະມານແຫ່ງລັດ 3 ເດືອນຂ້າມຜ່ານທ້າຍປີ 2016, ສະພາບການຈັດຕັ້ງປະຕິບັດແຜນງົບປະມານແຫ່ງຊາດງວດທີ 1 ປີ 2017 ແລະ ຄາດຄະເນທິດທາງແຜນການ 9 ເດືອນປີ 2017, ພິຈາລະນາຮັບຮອງເອົາບົດລາຍງານກ່ຽວກັບສະພາບການຄຸ້ມຄອງລາຄາສິນຄ້າ, ທິດທາງ ແລະ ມາດຕະການແກ້ໄຂໃນຕໍ່ໜ້າຂອງທ່ານລັດຖະມົນຕີກະຊວງອຸດສາຫະກຳ ແລະ ການຄ້າ, ຮັບຮອງເອົາການເລືອກຕັ້ງປະທານອົງການກວດສອບແຫ່ງລັດ, ຜົນການຈັດຕັ້ງປະຕິບັດວຽກງານກວດສອບໃນໄລຍະ 5 ປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າ (2017-2021) ແລະ ບັນຫາອື່ນໆທີ່ກ່ຽວຂ້ອງເຖິງວຽກງານຂອງສານປະຊາຊົນ, ໄອຍະການ, ວຽກກຳມາທິການສະພາແຫ່ງຊາດ ແລະ ຮັບຮອງເອົາກົດໝາຍຈຳນວນໜຶ່ງ. ທັງໝົດທີ່ຜູ້ຂຽນໄດ້ຍົກມານີ້ລ້ວນແລ້ວແຕ່ເປັນບັນຫາຂອງຊາດ, ພົວພັນເຖິງຄວາມຮັບຜິດຊອບຂອງພັກ ແລະ ລັດຖະບານ ກໍຄືສະພາແຫ່ງຊາດທີ່ມີຕໍ່ຊາດ ແລະ ປະຊາຊົນ.
ຕາມເຮົາຄິດ, ການເວົ້າວ່າທຸກສິ່ງຢ່າງທີ່ໄດ້ຜ່ານ ແລະ ຮັບຮອງໃນກອງປະຊຸມສະພານັ້ນ ມັນກໍຍັງເປັນນາມມະທຳຢູ່, ສິ່ງສຳຄັນແມ່ນການນຳເອົາທິດທາງແຜນການຄັ້ງນີ້ໄປຈັດຕັ້ງປະຕິບັດໃຫ້ເກີດດອກອອກຜົນເປັນຮູບປະທຳຢ່າງຈິງຈັງ ແລະ ດີຂຶ້ນ. ຢາກໄດ້ຕາມຄາດໝາຍທີ່ກ່າວມານີ້ ພວກເຮົາໝົດທຸກຄົນໃນຊາດຕ້ອງພາກັນ “ຫັນນ໋ອດເຄັ່ງໂສ້” ດ້ວຍການນຳໜ້າພາທາງຂອງບັນດາທ່ານຜູ້ແທນປະຊາຊົນ, ຂອງຜູ້ເປັນຫົວຈັກຫລັກແຫລ່ງ ນັບແຕ່ຂັ້ນສູນກາງລົງຮອດບັນດາກົມກອງທ້ອງຖິ່ນ. ເທົ່າທີ່ຜູ້ຂຽນເຫັນຕາມກະແສຂ່າວ ບໍ່ວ່າໃນໜັງສືພິມ, ສື່ສັງຄົມອອນລາຍ ແລະ ທັງເຮົາເອງໄດ້ລົງໄປທ້ອງຖິ່ນຊົນນະບົດບາງບ່ອນໄດ້ຍິນເຂົາຊຸບຊິບຈົ່ມກັນວ່າຍັງມີບຸກຄົນ, ກຸ່ມຄົນພາກັນລັກຕັດໄມ້ຢູ່ ວ່າຊັ້ນ ! ຊ່ອງຫວ່າງຊ່ອງໂຫວ່ໃນການເກັບລາຍຮັບເຂົ້າງົບປະມານຂ້ອນຂ້າງຍັງອືດອາດປານດຶງຂາເຕົ່າ ໂດຍສະເພາະແມ່ນຢູ່ຂັ້ນທ້ອງຖິ່ນບາງເມືອງ ແລະ ບາງແຂວງ ຍ້ອນວ່າມັນຄືຄຳພັງເພີຍເຂົາວ່າ: ເຮັດນຳອັນໃດກໍອາໄສກິນນຳອັນນັ້ນ “ນ້ຳບໍ່ຍ້ອຍ ຫອຍກໍບໍ່ໄຕ່” ດ້ວຍສາເຫດທີ່ກ່າວມາຂ້າງເທິງນີ້ ໃນການຈັດຕັ້ງປະຕິບັດແຜນງົບປະມານ 3 ເດືອນຂອງປີ 2017 ຜ່ານມາ ບາງບ່ອນຈຶ່ງບໍ່ໄດ້ຕາມຄາດໝາຍ.
ເຖິງຢ່າງໃດກໍດີ, ຕາມເຮົາວ່າ ພາຍໃຕ້ການຊີ້ນຳ-ນຳພາຂອງພັກ ແລະ ລັດຖະບານ ໂດຍສະເພາະລັດຖະບານຊຸດທີ 8 ທີ່ມີວິໄສທັດອັນກວ້າງໄກ, ມີມາດຕະການອັນເດັດຂາດ ສົມທົບກັບກຳລັງແຮງສັງລວມຂອງທຸກຄົນໃນຊາດ ພ້ອມກັນຫັນນ໋ອດເຄັ່ງໂສ້ການສ້າງສາພັດທະນາປະເທດຊາດຂອງພວກເຮົາຕ້ອງເດີນໜ້າໄວກວ່າທີ່ຜ່ານມາຢ່າງແນ່ນອນ.
