ທະນາຄານໂລກແນະນຳໃຫ້ລາວລົງທຶນດ້ານຊັບພະນາກອນມະນຸດຫລາຍຂຶ້ນ
ທະນາຄານໂລກແນະນຳໃຫ້ລາວລົງທຶນໃສ່ດ້ານມະນຸດເພື່ອເພີ່ມຜະລິດຕະພາບໂດຍໃຫ້ເຫດຜົນວ່າຈະເປັນການສະໜັບສະໜູນການຂະຫຍາຍຕົວຂອງເສດຖະກິດໃນໄລຍະຍາວ ແລະ ເຮັດໃຫ້ຄວາມທຸກຍາກຫລຸດລົງ. ອີງຕາມບົດລາຍງານການຕິດຕາມເສດຖະກິດຂອງ ສປປ ລາວ ສະບັບຫລ້າສຸດຂອງທະນາຄານໂລກ ໃນວັນທີ 18 ມັງກອນນີ້ ໃຫ້ຮູ້ວ່າ: ການຂະຫຍາຍຕົວຂອງເສດຖະກິດ ສປປ ລາວ ຄາດວ່າຈະເຕີບໂຕຢູ່ 6,5% ໃນປີ 2018 ຫລຸດລົງຈາກ 6,9% ໃນປີ 2017 ເຊິ່ງກໍມາຈາກຫລາຍປັດໄຈພາຍໃນ ແລະ ພາຍນອກຄື: ຜົນກະທົບທາງລົບທີ່ເກີດຈາກບັນຫາໄພນໍ້າຖ້ວມທີ່ສ້າງຄວາມເສຍຫາຍຕໍ່ຂະແໜງກໍ່ສ້າງທີ່ຕິດພັນກັບການສ້າງພື້ນຖານໂຄງລ່າງ, ສົ່ງອອກໄຟຟ້າ ແລະ ຂະແໜງບໍລິການຍັງຄົງເປັນປັດໄຈຂັບເຂື່ອນສໍາຄັນຕໍ່ການຂະຫຍາຍຕົວຂອງເສດຖະກິດໃນປີ 2018. ພາບລວມຂອງເສດຖະກິດໃນໄລຍະກາງຍັງຄົງມີລັກສະນະເອື້ອອໍານວຍ ແຕ່ກໍອາດຈະຖືກກະທົບຈາກຄວາມສ່ຽງຫລາຍຢ່າງ ໃນນັ້ນ, ລວມມີສະພາບແວດລ້ອມເສດຖະກິດໂລກທີ່ຍັງສັ່ນໄຫວ.
ທ່ານ ນິໂຄລາ ພອນທາລາ ( Nicola Pontara ) ຫົວໜ້າ ຫ້ອງການທະນາຄານໂລກ ປະຈໍາລາວ ກ່າວວ່າ: “ການຂະຫຍາຍຕົວຂອງເສດຖະກິດຢູ່ ລາວຍັງເຂັ້ມແຂງ ເຊິ່ງລັດຖະບານມີຜົນງານໂດດເດັ່ນຫລາຍຢ່າງໃນຂົງເຂດການປະຕິຮູບ ໂດຍສະເພາະການເກັບລາຍຮັບ. ນະໂຍບາຍການຮັດກຸມດ້ານການເງິນງົບປະມານແມ່ນໄດ້ສືບຕໍ່ ເຖິງວ່າຈະຖືກກະທົບຈາກບັນຫາໄພພິບັດທາງທໍາມະຊາດໃນຫວ່າງບໍ່ດົນມານີ້ກໍຕາມ”. ທ່ານໄດ້ກ່າວຕື່ມວ່າ: ເມື່ອເບິ່ງໄປຂ້າງໜ້າແລ້ວລາວ ຄວນລົງທຶນໃສ່ການພັດທະນາດ້ານມະນຸດເພື່ອເພີ່ມຜະລິດຕະພາບ ເຊິ່ງຖືເປັນກຸນແຈສຳຄັນຕໍ່ການສະໜັບສະໜູນການຂະຫຍາຍຕົວຂອງເສດຖະກິດໃນໄລຍະຍາວ ແລະ ເຮັດໃຫ້ຄວາມທຸກຍາກຫລຸດລົງຕື່ມອີກ. ອີງຕາມບົດລາຍງານດັ່ງກ່າວ, ການຂາດດຸນງົບປະມານເຫັນວ່າຫລຸດລົງມາຢູ່ທີ່ 4,7% ຂອງ GDP ໃນປີ 2018 ເຊິ່ງຫລຸດຈາກ 5,3% ໃນປີ 2017 ລັດຖະບານກໍໝາຍໝັ້ນໃນການຫລຸດລະດັບໜີ້ສິນສາທາລະນະ ເຊິ່ງຢູ່ໃນລະດັບ 60% ຕໍ່ GDP ໂດຍການດຳເນີນນະໂຍບາຍການຮັດກຸມດ້ານການເງິນງົບປະມານ ໂດຍເນັ້ນໃສ່ເພີ່ມການເກັບລາຍຮັບ, ຄວບຄຸມລາຍຈ່າຍພາກລັດ ແລະ ປັບປຸງການຄຸ້ມຄອງໜີ້ສາທາລະນະໃຫ້ດີຂຶ້ນກວ່າເກົ່າ, ອັດຕາເງິນເຟີ້ຄາດວ່າຢູ່ປະມານ 2,1% ໃນປີ 2018 ຈາກເງິນເຟີ້ສະເລ່ຍທີ່ 0,8% ໃນປີ 2017 ອັນເປັນຍ້ອນລາຄາສະເລ່ຍຂອງສະບຽງອາຫານ ແລະ ລາຄາຂາຍຍ່ອຍນໍ້າມັນທີ່ເພີ່ມສູງຂຶ້ນ ເຊິ່ງສ່ວນໜຶ່ງມາຈາກການອ່ອນຄ່າຂອງເງິນກີບທຽບໃສ່ບັນດາສະກຸນເງິນຕາຕ່າງປະເທດທີ່ສໍາຄັນ. ນອກນັ້ນ, ຍັງເນັ້ນ ໃຫ້ເຫັນຄວາມສໍາຄັນຂອງການລົງທຶນໃສ່ການສ້າງຄົນ, ເດັກທີ່ເກີດຢູ່ລາວ ໃນປັດຈຸບັນມີພຽງ 45% ຂອງທ່າແຮງເຕັມສ່ວນ ທີ່ເຂົາສາມາດປະກອບສ່ວນຜະລິດຕະພາບໃຫ້ສັງຄົມໄດ້ ຫາກກຸ່ມຄົນເຫລົ່ານັ້ນໄດ້ຮັບບໍລິການການສຶກສາ ແລະ ສຸຂະພາບຢ່າງຄົບຖ້ວນ.
ການປັບປຸງຜົນໄດ້ຮັບດ້ານການພັດທະນາມະນຸດໃນວຽກງານສຶກສາ ແລະ ສາທາລະນະສຸກໃນລາວ ຕ້ອງປະສົມປະສານບັນດາກິດຈະກໍາແກ້ໄຂສະເພາະຂະແໜງການ ແລະ ການປະຕິຮູບລະບົບລວມ ຕົວຢ່າງ: ການລົງທຶນເພີ່ມຂຶ້ນ ແລະ ມີປະສິດທິພາບກວ່າເກົ່າ, ໃສ່ໃຈສຸຂະພາບຂອງແມ່ ແລະ ເດັກ ກໍຄືໃສ່ໃຈຄຸນນະພາບການສຶກສາ ນັບແຕ່ການສຶກສາກ່ອນໄວຮຽນ ສາມາດຊ່ວຍເພີ່ມທ່າແຮງໃຫ້ຄົນຮຸ່ນໃໝ່ມີການເຕີບໂຕທີ່ມີສຸຂະພາບແຂງແຮງ ແລະ ມີຜະລິດຕະພາບສູງ. ນະໂຍບາຍດັ່ງກ່າວ ຄຽງຄູ່ກັບການປະຕິຮູບດ້ານສະຖາບັນ ເພື່ອປັບປຸງການໃຫ້ບໍລິການສຶກສາ ແລະ ສາທາລະນະສຸກ ຈະຊ່ວຍຊຸກຍູ້ເສດຖະກິດຂອງປະເທດໃນໄລຍະຍາວດີຂຶ້ນ.
