ແມນຢູ ພ້ອມໃຫ້ຄ່າເມື່ອຍຈຳນວນຫລາຍ ຫວັງດຶງ ແຣຊຟອດ
ເດິ ມິເຣີ ສື່ຂອງອັງກິດ ລາຍງານວ່າ: ແມນເຊັສເຕີ ຢູໄນເຕັດ ພ້ອມໃຫ້ສັນຍາສະບັບໃໝ່ກັບ ມາຣຄັສ ແຣຊຟອດ ໂດຍຈະເພີ່ມຄ່າເມື່ອຍເປັນ 150.000 ປອນຕໍ່ອາທິດ ຫລັງຈາກ ແຣຊຟອດ ເປັນຈຸດສົນໃຈຂອງ ຣີລ ມາດຣິດ ແລະ ຢູເວນຕຸສ.
ແມນເຊັສເຕີ ຢູໄນເຕັດ ຍອດສະໂມສອນແຫ່ງ ພຣີເມຍລີກ ອັງກິດ ພ້ອມຈະມອບສັນຍາສະບັບໃໝ່ໃຫ້ ມາຣຄັສ ແຣຊຟອດ ກອງໜ້າດາວຮຸ່ງຂອງທີມ ໂດຍຈະເພີ່ມຄ່າເມື່ອຍໃຫ້ລາວເປັນປະມານ 150.000 ປອນຕໍ່ອາທິດ.
ໄລຍະຜ່ານມາມີກະແສຂ່າວລືວ່າ: ຣີລ ມາດຣິດ ແລະ ຢູເວນຕຸສ ສົນໃຈຈະດຶງ ແຣຊຟອດ ໄປຮ່ວມທັບ ເພາະພວກເຂົາເຊື່ອວ່າດາວເຕະຊາວອັງກິດມີປະສິດທິພາບທີ່ດີ ເຖິງວ່າລາວຈະສ້າງຜົນງານໄດ້ບໍ່ໜ້າປະທັບໃຈເທົ່າໃດໃນໄລຍະທີ່ ແມນເຊັສເຕີ ຢູໄນເຕັດ ມີ ໂຊເຊ່ ມູຣິນໂຢ ເປັນຜູ້ຈັດການທີມກໍຕາມ.
ທັງນີ້, ແຣຊຟອດ ໂຊຟອມໄດ້ໂດດເດັ່ນຫລາຍຂຶ້ນ ຫລັງຈາກ ແມນເຊັສເຕີ ຢູໄນເຕັດ ສັ່ງປົດ ມູຣິນໂຢ ແລ້ວດຶງ ໂອເລ່ ກຸນນາ ໂຊລຊາ ເຂົ້າມາເປັນຜູ້ຈັດການທີມຊົ່ວຄາວ ໂດຍໄລຍະ 6 ເກມຈາກທຸກລາຍການທີ່ ໂຊລຊາ ເຂົ້າມາຢູ່ໃນຕຳແໜ່ງນັ້ນ ນັກເຕະໄວ 21 ປີ ໄດ້ລົງຫລິ້ນຄົບທຸກນັດ ແລະ ຍິງໄດ້ເຖິງ 4 ປະຕູ ກັບອີກ 1 ແອສຊິສ.
ຜົນງານອັນໂດດເດັ່ນດັ່ງກ່າວເປັນສ່ວນໜຶ່ງເຮັດໃຫ້ ແມນເຊັສເຕີ ຢູໄນເຕັດ ພ້ອມຈະຈັບ ແຣຊຟອດ ຕໍ່ສັນຍາແລ້ວ ຫລັງຈາກຂໍ້ຕົກລົງສະບັບເກົ່າຈະໝົດອາຍຸລົງໃນປີ 2020 ເຖິງວ່າພວກເຂົາຈະມີອັອບຊັນຂະຫຍາຍສັນຍາ 1 ປີ ແຕ່ ແມນເຊັສເຕີ ຢູໄນເຕັດ ຢາກໃຫ້ ແຣຊຟອດ ເຊັນສັນຍາໄລຍະຍາວຫລາຍກວ່າ.
ຖ້າຫາກ ແຣຊຟອດ ໄດ້ຄ່າເມື່ອຍເພີ່ມເປັນປະມານອາທິດລະ 150.000 ປອນແທ້ໆ ຈະຖືວ່າຫລາຍກວ່າເກົ່າເຖິງ 2 ເທົ່າ ເພາະປັດຈຸບັນລາວຮັບຄ່າເມື່ອຍຢູ່ທີ່ 75.000 ປອນຕໍ່ອາທິດ.
